"عبدالصبور روحی کسللیک طفیلی فرانسه لیک عسکرلرنی اولدیرگن"

Image copyright AP
Image caption بیش فرانسه لیک عسکر کاپیسا ولایتده آتیب اولدیرلگندی

بیش فرانسه لیک عسکرنی کاپیساده آتیب اولدیرگنی اوچون اولیم جزاسیگه محکوم ایتیلگن افغان عسکری عبدالصبور نینگ عاییله سی، اونی روحی کسللیککه دچار ایکنینی ایتگن. عبدالصبور نینگ ایناغه سی محمد آصف بی بی سی بیلن بولگن صحبتیده افغانستان حکومتیدن اونینگ جزاسینی اولیمدن قماق جزاسیگه اوزگرتریشینی طلب قیلگن. عینی حالده او، اوز ایناغه سی نینگ روحی کسللیککه دچار بولگنی باره سیده حجت لر موجودبولگن حالده هم اونی شوندی جزاگه محکمه تمانیدن محکوم ایتیلگنینی قتیغ قاره لب چیققن. عبدالصبور نینگ حربی محکمه تمانیدن اولیم جزاسیگه محکوم ایتیلگنیدن بیرهفته اوترایکن بی بی سی خبرنگاری ، اونینگ باره سده تولیق معلومات قولگه کیرتیش اوچون عایله سی یانیده بارگن. محمد آصف عبدالصبور نینگ اکه سی. اونگه کوره عبدالصبور روحی کسللیککه گرفتار ایکن. بو باره ده شوندی حکایه قیلدی:"اوکم بیرکیچه اون بجه اوریندن توریب مینی مشت بیلن اوردی تیپتی، مین الدیدن قاچیب قوتیلدیم، قوشنی لرنی ایشک لرینی بیرمه بیرمه اوردی، اویلردن مردم چیقیب اونی اوشلب ایاق قولینی زنجیر بیلن باغلب کابلگه آلیب کیلدیک." عینی حالده آصف جنابلری اعدام جزاسیگه محکوم بولگن اوز ایناغه سینی نیچه مرته دوالش اوچون شفاکارلریانیده آلیب بارگنینی ایتیب ، فرانسه لیک عسکرلرگه هجوم قیلگنیدن کیین اونی دواله گن شفاکارلرگه مراجعه قیلگنینی ایتدی:"ایناغمنی دواله گن شفاکارلرگه مراجعه قیلدیم اوی یخشی بولگن ایدی می دیب سوره دیم لیکن اولرمینگه ایناغنگ هرقندی یمان بیرحادثه نی کورسه مناسبت بیلدیریشی ممکن دیدی ، خلاصه او یخشی بولمه گن دیب ایتدیلر." آصف جنابلری نینگ ایتیشچه ، عایله سی بیرینچی اول راق صبورنینگ ملی اردو صفیگه کیریشدن خبردار بولمه گن. ایندی لیکده آصف جنابلری، اوز ایناغه سی نی اعدام جزاسیدن عمربویچه قماق جزاسیگه توشریشینی حکومت دن طلب قیلماقده"حکومت دن اسیتمیز کی اگر واقعا افغانستان مردمی اوچون ایشلیدی بو فیصله سینی آلسین، مردم گه ضرر یتکزمه سین،قانونی یول بولسه عمر بویچه حبس بولسین پرواسی یوق لیکن اعدام یخشی قرار ایمس ." عبدالصبور نی محکمه تمانیدن اعدام جزاسیگه محکوم ایتیلیشی نهای قرار بولمه گن، قانون گه ماس او ، چیقاریلگن جزاینی قبول ایتمی استیناف یعنی ایککینچی محکمه گه باش اوریش حقی گه ایگه دیر. افغانستان مدافعه وزیرلیگی هم محکمه حکمی صادیر ایتلگنی پیتی اعدام جزاسیگه محکوم ایتیلگن شخص استیناف محکمه سیگه باریب اوز دعواسینی ایلگری سوریشی ممکن لیگینی ایتگندی. عبدالصبور عایله سی نینگ اظهاراتی اساسیده مدافعه وزیرلیگی نینگ فکرینی اورگه نیشگه حرکت قیلدیک لیکن، موفق بولمه دیک. عبدالصبور نی اعدام جزاسیگه محکوم ایتلگنی ایچکی و تشقی مناسبت لر بیلن بیرگه بولدی، فرانسه دولتی افغان دولتی نینگ بوخصوصده گی قراریگه حرمت بارلیگینی ایتگن انسان حقلریدن مدافعه ایتوچی خلق ارا تشکیلات لر حربی محکمه تمانیدن عبدالصبور گه قوییلگن جزانی قیته کوریب چیقیلیشینی طلب قیلگن.