عالی اوقودرگاه لرده دایمی انترنت اورنه تیله دی

Image copyright BBC World Service

افغانستان مخابرات وزیرلیگی مملکتده گی عالی اوقو درگاه لریده انترنت خذمت لری نینگ اورنه تیشینی خبر بیردی.

مذکور ریجه کیله سی آلتی آی جریانیده، مملکت نینگ حاضر گی بیش عالی اوقو درگاه لریده عملی بولیب کیینچه لیک کیینگه یشی ایتیلماقده.

افغانستان مخابرات و عالی اوقولر وزیرلیک لری آره سیده امضالنگن کیلیشیو اساسیده، بو برنامه بیرینچی ییلده 3 ملیون دالر هزیینه کوتاریب، فایبر نوری خذمتی کیینگه یشی بیلن بو مبلغ آزه یشی هم ممکن.

افغانستان عالی اوقولر وزیرلیگی، نیچه ییل دن بیری ناتو و ینه بیر قنچه تشکیلات لر تمایندن یره تیلگن انترنت خذمت لریدن مملکت نینگ بیر قنچه عالی اوقو درگاه لریده فایده لنریدی. اوشبو وزیرلیک وزیری داکتر عبیدالله عبید گه کوره، بو انترنت خذمت لری اوچون انچه مبلغ لر صرفلنیب، شو نینگ دیک بیر قنچه قیین چیلیگی هم باردی.

فایبر نوری نینگ اساسی خصوصیت لریدن بیری هم انترنتده سرعت بیریشی دیر. مخابرات وزیری امیرزی سنگین بو پروژه نینگ دستلبکی هزینه سی اوچ ملیون دالرگه ییتیشیشی نی هم معلوم قیلدی.

"بو کیلیشو دن اساسی مقصد افغانستان حکومتی اوز ایاغیگه توخته یشی دیر. عالی اوقو درگاه لری گه کیره ک بولگن نرسه لرنینگ آلیش اوچون، یاردم بیروچی تشکیلات لر گه محتاج بولمه ماغی کیره ک. شونده ی بیر حالده فایبر نوری عالی اوقو درگاه لرنینگ قیین چلیک لرینی برطرف قیله دی چون که قیمتی انچه آز. و عالی اوقودرگاه لریده تعیین بوله یاتگن قیمت لرگه تخفیف هم بیریله دی. و بو مبلغ هر ایککله وزیرلیک لرنینگ عادی بودجه سیگه کیریتیلیشی هم ممکن. "

باشقه تماندن، افغانستان عالی اوقولر وزیری داکتر عبیدالله عبید هم فایبر نوری خذمت لری مملکت عالی اوقو درگاه لریده اورنه تیلیشی بیلن، افغانستان عالی اوقو درگاه لری بیر بیراوی بیلن یقین مجازی علاقه ده بولیشی همده بو عالی اوقو درگاه لر خارجی عالی اوقو درگاه لر بیلن ویدیو کنفرانس قیلیشی عین دمده مملکتده گی تحصیل تیزیمی یخشی لشتریلیشی توغری سیده انچه تاثیر قوییشی ممکنلیگینی ایتدی.

شونده ی بیرحالده مملکت ده گی طلبه لرنینگ کوپ قسمی انترنت خذمتی دن فایده لنه آلمه یدیلر. اما انترنت خذمتی نینگ اورنه تیلیشی اولر اوچون انچه اهمیت گه ایگه ایکن لیگی نی هم معلوم قیله دیلر.

کابلده گی طلبه لردن بیری:

"حاضر کابل عالی اوقو درگاهی و کابل طبیات فاکولته لریده شونده ی درس لر بار کی، انترنت دن فایده لنیب ایلگری کیتیشی کیره ک. یعنی، بو درس لرنی یخشی اورگنیش اوچون همده طلبه لر یخشی تحقیق قیلیش لری اوچون انترنتگه انچه احتیاج لری بار."

سونگی پیت لرده امریکا قوشمه ایالت لری 9 مینگ افغان طلبه انترنتده قول تاپیشی اوچون اوچ ملیون دالرنی هزینه قیلیب یاردم بیردی. اما مملکت مخابرات وزیرلیگی ایسه، افغان طلبه لری اوچون دایمی شکلده انترنت خذمت لری نینگ ییتکزیش اوچون فایبر نوری ترماغی آرقه لی سعی قیلیشینی ایته دی.

مخابرات وزیرلیگیگه کوره، فایبر نوری ترماغی اوچ مینگ کیلومتر دن کوپراق اوزینلیگی بولیب، قریب 80 فایز ایشی افغانستانده توگه گن. مذکور وزیرلیک نینگ معلوم قیلیشیچه، مملکت تورت ولایتی یعنی، لوگر، پکتیا، پکتیکا و خوست ولایت لریدن تشقری برچه ولایت لر فایبر نوری ترماغی بیلن باغلنگن.