ایچکی ایشلر و مدافعه وزیرلری استیضاح بوله دی

افغانستان ایچکی ایشلر ومدافعه وزیرلری کنر ولایتیده دوام تارتیب کیله یاتگن راکتی هجوم و سمنگانده یوزبیرگن انتحاری هجوم سببلی استیضاح بوله دی.

افغانستان اولوسی جرگه سی بوکونگی عمومی یغینده بو قرارنی اعلان قیلدی.

هرچند بوکونگی یغینده افغانستان ملی استخبارات رییسی و تشقی ایشلر وزیری هم چقیریلگن ایدی بیراق، مدافعه وایچکی ایشلر وزیرلری جواب گرلیککه تارتیلمی اولرنینگ استیضاح بولیشیگه قرار آلیندی.

افغانستان اولوسی جرگه سی نینگ رییسی عبدالروف ابراهیمی بو قرارگه کیم موافق وکیم مخالف دیه فکر بیلدیرگنده اکثریت موافق ایکنی اعلان قیلیندی. شو قرارگه ماس افغانستان ایچکی ایشلر ومدافعه وزیرلری کیله سی شنبه کونی استیضاح بولماقچی.

تشقی ایشلر وزیری و ملی استخبارات اداره رییسی هم راکتی هجوملر دوام تارتیب کیله یاتگنی خصوصیده جواب بیریش اوچون عمومی یغینده چقریلگن ایدی.ملی استخبارات رییسی رحمت الله نبیل راکتی هجوملرباره سیده شوندی فکر بیلدیردی:"حاضرگه قره گنده پاکستان حربیلری تورت، تور حرکت نینگ یولگه قوییب کیلماقده لر، بیرینچیسی راکتی هجوملرایککینچیسی خوف سیزلیک پوسته لرینی ایلگری آلیب کیلگن، اوچینچی موضوع پاکستان حربیلری چیگره ده حیات اوتکزیب کیله یاتگن افغانلرنی بو منطقه دن کوچیب چیقینگلر یاکی پاکستان کیملیک حجتینی آلینگنلر دیب تهدیدقیلگن."

اما بوندن الدین پاکستان باش وزیری بوکبی ادعالرنی رد ایتگن ایدی.

عینی حالده تشقی ایشلر وزیری زلمی رسول، راکتی هجوملرنی آلدینی الییش اوچون دیپلماتیک حرکت لر یولگه قویلگنینی اورغوله دی. بو ایککی مقام ایسه شوندی جواب لری بیلن ملت وکیللری نینگ قناعتینی کسب ایتدیلر.

کنر ولایتی نینگ ایریم حدودلری قریب بیرییلدن بیری، شونینگ دیک نورستان ولایتی نینگ چیگره منطقه لری پاکستان توپراغی ارقه لی سونگی پیتلرده راکت اوقلری بیلن هجومگه توتیلیب کیلینه یاتگنی افغانستان پارلمان نینگ جدی غضب لنتیرگن.

اوتگن کون افغانستان سنا مجلیسی ایچکی ایشلر ومدافعه وزیرلرینی هم عینی موضوع اوچون عمومی یغینده جوابگرلیککه چقیرگن ایدی.