طالبان نینگ اوز آره لریده روی بیرگن توقنه شو ده سککیز کیشی هلاک بولیشگن

Image copyright Reuters
Image caption توقنه شو بلخ ولایتی نینگ چاربولک تومنیده روی بیرگن

اهالی و محلی مسوللرنینگ ایتیشیچه، طالبلرنینگ اوچ کیشی رهبری اوز آره لریده کیلیب چیققن تارتیشوولرده هلاک بولیشگن. رسمیلرنینگ درک بیریشیچه، حادثه اوتگن کیچه، چهاربولک ولسواللیگی نینگ گله جوی منطقه سیده یوز بیرگن. اولرگه قره گنده، بو تارتیشمه لرده سککیز کیشی طالبان قومندانی هلاک بولیب، بیش کیشی هم یره لنگن.

اوشبو تارتیشووده، سککیز کیشی طالبان رهبری هلاک بولیب، اوندن آرتیق طالب یره لنگن. تینچ اهالی نینگ گواهلیک بیریشیچه، چهار بولک ولسواللیگیده ملا نقیب الله نینگ ییغینی بولگن و بو ییغیلیشنی بوزیش اوچون ملا توفان باشچیلیگده بیر گروه طالبان اوشبو مجلس گه حمله قیلیشگن ایکن. تارتیشوودن کیین، ایککی گروه آره سیده قتتیغ اوروشلر باشلنگن و عاقبتده ایسه، سککیز کیشی هلاک بولیب بیش کیشی یره لنگن. ایتیلیشیچه، چهاربولک ولسواللیگی اوچون طالبان نینگ اوز آره لریده ولسوال تعیینلگن رهبرلری، ملا باقی هم هلاک بولگنلر جمله سیگه کیره دی. امنیت مسوللری نینگ معلوماتلریگه قره گنده، طالبلر ولسوالی نینگ اولیک جسمی کلینیککه کوچیریلگن. معلوماتگه کوره، طالبان ییغینی گه حمله قیلگن ملا توفان دولتگه تسلیم بولیب، واقع بولگن حادثه نی تصدیقلگن. باشقه تماندن اوشبو ولایتده گی تینچلیک تیزیمی مسوللری بوگون اون کیشی دولت مخالفی نینگ حکومت گه تسلیم بولگنلیکلرینی خبر قیلماقده لر. بونینگ یانیده، افغانستانده گی ناتو کوچلری، افغانستان شرقیده هوایی عملیاتلر نتیجه سیده القاعده شبکه سی نینگ کوچلی رهبرلریدن بیری و اونینگ اورینباسری هلاک بولیشگن، دییشه دی. اوشبو عملیات کنر ولایتیده یوز بیریب، تینچ اهالی گه هیچ قنده ی ضرر ییتگنیچه یوق. ناتو نینگ ایتیشیچه، القاعده نینگ مذکور قومندانی مفتی پنجابی ،عبدالقدوس و صوفیان دیگن آتلر بیلن هم تنیلگن. القاعده نینگ اوشبو قومندانی، شرقی ولایتلر، جمله دن کنر ولایتیده جنگریلر بیلن علاقه ده بولگن ایکن. اوشبو کیشی، پارتلاوچی ماده لرنی توزه تیب، افغانستانده گی القاعده جنگریلریگه یوباریب، اولرنی ایشله تیش یولینی هم اورگترکن. ناتو، شرقی کنر ولایتیده یولگه قوییلگن عملیاتلرده، القاعده برنامه لرینی تیارلاوچی فتاح گل دیگن شخص نینگ هلاک بولگنلیگینی خبر قیلگن. بوکیشی تروریست گروه لریگه تورلی ساحه لرده تعلیم بیریب، بوزوغونچیلیکلرده فعال قتنشگنی ایتیلماقده. طالبان حکومتی ییمیرلگندن سونگ، 2001 ییل آخرلریدن کیین هم القاعده حضوری افغانستانده کمه ییگن لیگی ایتیلماقده. لیکن شونگه قره مه ی، کییگنی ییللر جریانیده اوشبو شبکه اعضالری شرقی ولایتلرده فعالیت قیلماقده لر.