طالبان تمانیدن قرآن نسخه لرینی یاندریشگه قرشی نمایش

یوزلب نورستانلیکلر اوشبو ولایت نینگ وانت وایگل تومنیده گی دینی مدرسه لریدن بیری وقرآن نسخه لرینی طالبان تمانیدن یاندریشگه قرشی ناراضیلیک نمایش یولگه قوییگن.

نورستان ولایتی نینگ رسمیلریگه کوره اوشبو ولایت نینگ وانت وایگل تومنیده دینی مدرسه لردن بیری طالبان تمانیدن اوت قویلیب قران نسخه لری یانیب کیتگنی مردم نینگ جدی غضب لنتیرگن.

بوگون یوزلب نورستان لیک لر بونگه قرشی ناراضیلیک نمایش یولگه قویب اوشبو حادثه گه قول اورگن شخصلرنی قتیغ قاره لب چیققنلر

مقاملرگه کوره طالبان تمانیدن اوت قوییلگن مدرسه نینگ بیرنیچه حجره سی مکتب صنفی توزه لیب اوچ یوزدن ارتیق قیزو اوغیل درس کورایکنلر.

نورستان ولایتی نینگ پلیس باشلیغی غلام الله، بی بی سی بیلن بولگن صحبتیده طالبان نینگ بوعملیگه قرشی یولگه قوییلگن ناراضیلیک نمایشده یوزلب کیشی اشتراک ایتیگنینی ایتب بوحقده شوندی فکر بیلدیردی:"نمایشچیلر قرآنشریف نسخه لرینی یاندرگن، عصیانچیلرگه قرشی شعار بیررایدی. بو عمل گه قول اورگن شخصلرنی جدی جزالنتریلیشینی طلب قیلرایدی.. چونکی عصیانچیلر کیچه تماندن مدرسه گه کیلیب مدرسه و قرآنشریف نسخه لریگه اوت قوییگنلر. "شونینگدیک پلیس باشلیغی وانت وایگل تومنیده طالبان عصیانچیلری فعال بولگنینی اورغولب شوباعث هم حادثه ده طالبان قولی بارلیگینی ایتدی.محل یشاوچیلری هم بوحادثه ده طالبان عصیانچیلرینی عیبله گن.

بیراق طالبان عصیانچیلری حاضرگه چه بوخصوصده هیچ قندی فکر بیلدیرمه گن.

نورستان ولایتی پاکستان بیلن چیگره داش بولیب، اوشبو ولایت نینگ ایریم منطقه لریده طالبان عصیانچیلری حاکم ایکنی ایتیلماقده.

نه فقط نورستان بلکه افغانستان نینگ باشقه ولایتلریده هم مکتبلرگه اوت قوییش حاللری کوزه تیلگن.

هرچندی بوکبی حادثه لرگه کوپراق طالبان عصیانچیلری عیبلندی. لیکن اوشبو گروه الدینلر مکتبلرگه اوت قوییش حاللریگه قوللری بولمه گنینی ایتگندی .