BBC navigation

بگرام قماقخانه سی مسوولیتی افغانلرگه بیریلدی

Сўнгги янгиланиш 10 сентябр 2012 - 13:16 GMT

امریکا قوشمه ایالت لری حربی لری، اوچ مینگ دن آرتیق طالبان جنگچیلری سقله نیب کیلگن بگرام قماقخانه نظارتینی افغانستان دولتیگه تاپشیریگن. 6 یوز افغان جنگریلر و 50 خارجی عصیان کارلر امریکا تمانیدن سقله نیب کیلماقده.

میلادی 2014 نچی ییل ناتو کوچلری افغانستاننی ترک ایتیشیدن آلدین بیرچه قماقخانه لر مسوولیتی نی افغانلرگه تاپشیریش کیلیشوی دایره سیده عملگه آشیریلگن.

افغانستان جمهور رییسی حامد کرزی، مملکت ایچکی ایشلر وملی مدافعه زیرلیگی، همده ملی خوفسیزلیک اداره سیگه سنبله آیی نینگ 20-سیده بگرام قماقخانه سی نینگ مسوولیتینی امریکالیکلردن آلیش اوچون بویروغ بیرگن.

بگرام قماقخانه سیده سقله نیب کیله یاتگن لر نینگ اکثریتی افغان و خارجی کوچلر قرشی سیده یولگه قویگن عصیانچیلیک فعالیت لر عیبلنگنلردن عبارت.

ایندی ایسه مذکور قماقخانه نینگ مسوولیتینی مدافعه وزیرلیگی چوکاتیده گی قریب اوچ مینگ حربی پولیس اوز ضمه سیگه آلگن.

بگرام قماقخانه سی نینگ مسوولیتی آله یاتگن مسوولی همده حربی پولیس قوماندانی غلام فاروق گه کوره، قماققه آلینگن آلتی یوز محبوس یقین زمانده امریکا لیک لر تمانیدن افغانلرگه تاپشیریله دی.

"ینه آلتی یوز دن آرتیق کیشی کی کیلیشو دن کیین خوف سیزلیک کوچلری میز خارجی لر بیلن بیرگه اوشله ب آلگن لر، یقین کیله جکده بیزگه تاپشیریله دی. عین زمانده ینه بیر قنچه خارجی محبوس لر هم امریکالیک لر نظارتی آستیده محبوس بولیب بار. اما بیزگه تاپشیریلمه گن. بو مسئله اوچون بیزنینگ یوقاری مرتبه لی خادم لریمیز نینگ بویروغی گه کوته میز. کیین هر نرسه کی ایتسه لر اوشنده ی قیله میز. بو خارجی محبوس لر سانی هم 50 کیشی دیر".

بگرام قماقخانه سی اوتمیشده محبوس لرگه نامقبول مناسبت قیلینگنی باره سیده گی قطار عیبلاولر مرکزیگه ایلنگن ایدی.

افغانستانده کینگ کولمده فساد موجود لیگی، همده افغان کوچلری مملکتده گی قماقخانه لری نینگ یخشی سقله آلمس لیگی هم اینگ مهم تنقید لردن حسابلنیب کیلگن.

اوتگنی ییلیده قریب 500 محبوس قندهار قماقخانه سیدن قاچیش گه موفق بولگن ایدیلر. ایندی بولسه مملکت اردو کوچلری نینگ رییسی شیرمحمد کریمی ایسه، افغان کوچلری قماق خانه لرنینگ خوف سیزلیگینی تامینلشگه قادر بولگنی نی ایته دی.

" هر قنچه کی بیز مسوولیت لرنی اوز ضمه میز گه آلسک مردمی میز هم خرسند بولیب بیزگه ایشانچ لری کوپه یه دی. باشقه مسوولیت لر یانیده بیز انه بو قماقخانه مسوولیتی نی هم آلدیک. بیز بو مسوولیت نی نیچه ییل خارجی لر بیلن قوشمه ایشله ب پرسونلیمیز تعلیم آستیدن اوتیب اوز ضمه میز گه آلدیک. ایندی بیزنینگ کوچلریمیز بو وظیفه لرنی بجریشگه یکه لیکگه قادر بولگن".

بگرام قماقخانه سی نینگ قدیمکی مسوولی امریکا لیک حربی رابرت تراداش مذکور قماقخانه نینگ مسوولیتی نی افغانلرگه تاپشیریش ریجه سی انچه قیین چیلیک لر بیلن بیرگه بولگنی نی تیلگه آله دی.

"بو بویوک و خوفلی بیر وظیفه ایدی، و هر ایکله تمانگه نهایی فیصله گه ایریشیش اوچون قیین چیلیک لرنی توغدیرگن ایدی. ملی اردو عسکرلری! سیزنینگ آلتی آی لیک وظیفه لریز سیزلرنی عزتلی ایکنلیک لریزنی کورستدی. وظیفه لریزنی یخشی بجردیزلر و همکار و رهبر لریزنینگ حرمتیگه سزوار بولدیزلر".

جمهور رییس حامد کرزی، بگرام نظارتی افغانلر قولیگه اوتگنی نی آلقیشله گن. عین زمانده کرزی نینگ سیاسی رقیب لری هم مذکور قماقخانه افغانلر قولیگه توشیشیدن خرسند لیک کورستگن بولسه لر ده لیکن، مملکت ده عاید بولگن فساد و افغان کوچلری نینگ ظرفیتی آزلیگی دن شکایت قیله دیلر.

کرزی نینگ سیاسی رقیبی داکتر عبدالله عبدالله:

" تأسف بیلن دولت نینگ ظرفیتیده قیینچلیک لر بار، اوتمیش لرده بیز محبوس لرنینگ قاچیشیگه گواه بولگن میز قماقخانه لردن. جنایتچیلرنینگ آزاد ایتیلیشینی ایسته میمن. اما هر حالده، بیز مسوولیت لرنینگ افغانلر آلیشیگه طرفدار میز. اما مسوولیت لر بیلن بجریلسین. دولت مردم گه ایشانچ بیرماقچی بوله دی، بو ایشانچ بیریشی صداقت بیلن بیرگه بولیشی کیره ک".

" پروان حبس مرکزی" نامی بیلن معلوم بگرام قماقخانه سی، پایتخت کابل شمالیدن 40 چقیریم اوزاقده جایلشگن.

اوتمیش ده محبوس لرگه نامقبول مناسبت قیلینگنی باره سیده گی ماجرالر باعث بگرام" افغانستان نینگ گوانتاناموسی" صفتیده تعریفلنه دی.

میلادی 2010 نچی ییل آپریل آییده بی بی سی آلیب بارگن تدقیقاتلر نتیجه سیده بگرامده گی یشیرین بنالرده محبوس لر تحقیرلنگنی باره سیده گی حاللر انیقلنگن ایدی.

امریکا ایسه، مخفی حبس خانه لر فعالیت یوریتگنی باره سیده گی عیبلاولرنی رد ایتیب کیلگن.

میلادی 2012 نچی ییل نینگ نوامبریده افغانستان حکومتی هم امیرکا قوراللی کوچلرینی محبوس لرگه نامقبول مناسبت قیلگنیده عیبله گن ایدی.

بیر آی اوتیب، بگرامده گی امریکا حربی لری قرآن کریمنی یاقیشگنی افغانستان بویلب بیر نیچه کونلیک ناراضلیک چیقیشلری و قاتل لیکلرگه سبب بولگن ایدی.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.