BBC navigation

سپتامبر اون بیرینچی حادثه سی دن 11 ییل اوتدی

Сўнгги янгиланиш 11 сентябр 2012 - 13:37 GMT

امریکاده گی ایککی تجارتی بنا القاعده تمانیدن نشانگه آلینیب مینگلب انسان نی هلاک ایتگنی دن 11 ییل اوتدی.

القاعده ترماغی نینگ مذکور هجومی، امریکالیک لر افغانستانگه کیلیب، مذکور ترماغ و طالبان گروهی نینگ حاکمیتی نی اورته دن ایلتیشیگه باعث بولدی.

11 ییل ایلگری شو کونگه القاعده ترماغی، تورت اوچاغ نینگ اوغیرلب، نیویارک ده گی ایککی تجارتی بنا و واشنگتن ده گی پنتاگون بنا سیگه هجوم اویشتردی.

مذکور حادثه نتیجه سیده اینگ آز اوچ مینگ انسان هلاک ایتیلدی.

سپتامبر نینگ 11 نچیسی دن کیین افغانستان هم انچه اوزگریش لر بیلن یوزمه یوز بولدی.

بو اوزگریش لردن بیری هم امریکا نینگ افغانستانده تروریزم گه قرشی کوره شیش تصمیمی ایدی. قریب ایککی آی جریانیده امریکا قوشمه ایالت لریِ، افغانستان شمالی ده گی قوماندان لر همکارلیگی بیلن طالبان حاکمیتی نی اورته دن ایلتدی.

طالبان حاکمیتی آغدریلگنی دن اون بیر ییل اوتگن، اما حاضر هم افغانستانده گی اوریش لر توگه مه گن. مذکور اوریش لر انچه تلفات لر و هزینه لر اوزیدن قالدیرگن.

امریکالیک لر تمانیدن ترقه تیلگن حساباتگه کوره، امریکا اوچون مذکور اوریش حاضرگه قدر اینگ آز 500 ملیارد دالر هزینه کوتارگن.

اوتگن 11 ییل جریانیده، 3173 خارجی کوچلر افغانستان اوریش لریده هلاک ایتیلگن. مذکور رقم دن ایککی مینگی دن کوپراقی نی امریکالیک عسکرلر تشکیل بیره دی.

باشقه تماندن افغانستان مدافعه وزیرلیگیگه کوره، افغانستانده امریکا رهبرلیگی بیلن یولگه قوییلگن حربی عملیات لردن بیری 3397 افغان خوف سیزلیک کوچلری هلاک ایتیلگن و 10 مینگ و 50 نفر هم یره دار بولگن.

پولیس کوچلری نینگ تلفات رقمی 2001 نچی ییلدن تا 2005 میلادی ییلگه قدر قولگه یوق. اما افغانستان ایچکی ایشلر وزیرلیگی تمانیدن بیریلگن رقم گه کوره، 2005 نچی ییلدن تا 2012 میلادی ییلگه قدر 7911 افغان پولیسی هلاک بولیبِ، 13200 نفر هم یره دار بولگن.

افغانستان نینگ بو اون بیر ییللیک اوریش لری عادی اهالیگه هم انچه تلفات ییتکزگن.

2001 نچی ییل دن تا 2006 نچی میلادی ییلگه قدر، رقم لرنینگ منظم قید ایتیش سیستمی افغانستانده بولمه گنی اوچون انیق بیر رقم یوق اما بیرلشگن ملت لر تشکیلاتی 2006 ییل دن تا 2012 ییل نینگ یریمی گه قدر، قریب 14 مینگ عادی اهالی افغانستان اوریش لریگه هلاک ایتیلگنی نی ایته دی.

مذکور تلفات نینگ 60 فایزیدن کوپراقیگه طالبان گروهی مسوول دیب تانیلگن. اما دولتی و خارجی کوچلری هم مذکور تلفات نینگ بیر قسمی گه مسوول دیر.

مذکور تلفات لر و حادثه لر گه قرگنده، سپتامبر نینگ 11 نچیسی، افغانستان قیته قوریشی اوچون ملیارد لب دالر خلق ارا هم جمعیت مملکت لر تمانیدن بیریلدی.

اوشه زماندن حاضرگه چه، افغانستان مردمی، سیاسی بولیمی دن توتیب تا اقتصادی، اجتماعی و بشر حقلری توغری سیده بیر قنچه ایجابی اوزگریش لرگه گواه بولیب کیلگن.

افغانستان مالیه وزیرلیگی نینگ ایتیشیچه، اوتگن 11 ییل دن بیری، خلق ارا هم جمعیت مملکت لری افغانستان اوچون 60 ملیارد دالر یاردم بیرگن. بو یاردم لر حربی سیز تورلی بولیم لرده صرفلنگن.

افغان رسمیلریگه کوره، مذکور یاردم نینگ 80 فایزی خارجی تشکیلات لر تمانیدن صرفله نیب، یاغیزگینه 20 فایزی افغانستان حکومتی تمانیدن صرفلنگن.

افغانستان ده تورت مرته عمومی سیلاولر یولگه قوییلیشی، مردم نینگ مذکور سیلاولرگه کینگ کولمده قتنه شیش لری، عیاللر نینگ اجتماعی حرکت لری کینگه یشی، ایرکین سوز، 9 ملیون باله نینگ مکتب گه کیریشی، تورلی بولیم لرده اقتصادی سرمایه لر یاتقیزیلیشی، تمبل پروژه لر عملی بولیشی، شهرک لر و بلند منزل بنالر قوریلیشی و شونگه اوخشه باشقه حرکت لر افغانستان نینگ 11 ییلیک اینگ مهم یوتوق لریدن حسابلنه دی.

اما بو اون ییل ده برچه رواجلنیش و قیینچلیک لر گه قرگنده، حاضر افغانستان وضعیتی باشقه چه کورینه دی. او هم خارجی کوچلرنینگ افغانستان دن چیقیب کیتیشی دیر. مذکور کوچلر افغانستان چیقیب کیتیشی بیلن هم افغانستانلیک لر امیدلری هم کمه ییب کیتیشگه باشلنگن. دولت دن انتقاد قیلوچی لردن توتیب تا عادی اهالیگه چه، تورلی سبب لرنی دلیل کیلتیریب، کیله جک اوچون خواطر اظهار ایته دیلر. حال بوکی خلق ارا هم جمعیت مملکت لر اینیقسه امریکا قوشمه ایالت لری، افغانستان نینگ یککه قویمس لیکگه سوز بیرگن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.