BBC navigation

" میمنه شهریده اون آیی جریانیده قریب بیریریم مینگ ترافیکی حادثه یوزبیرگن"

Сўнгги янгиланиш 4 ноябр 2012 - 08:04 GMT

ميمنه شهريده جايلشگن افغان تورك دوستليك كسلخانه سي نينگ باش شفاكاري فوزيه سليمي ترافيكي واقعه لرساني اوتگن ييللر گه نسبتا بوييل كوپراق يوزبيرگن ليگيني ايتيب، نيچه آيده اوشبوولايتده يوزلب ترافيكي واقعه لر يوزبيريب بيرقطاراهالي حياتيگه ضامن بولگن ديب ايته دي.

" هركون اورته چه 6ترافيكي واقعه سبب ضررلنگلرشاشلينج صحي خذمتيميزگه مراجعه قيله ديلر، ميلادي ييل نينگ بيرينچي آيي دن حاضرگچه اوشبوولايتده 1463ترافيكي واقعه يوزبيرگن هربيرواقعه ده اينگ آز 3كيشي ضرركوره دي" دييدي ميمنه شهريده گي افغان تورك دوستليك كسلخانه نينگ باش شفاكاري فوزيه سليمي

ترافيكي واقعه لركوپراغي موترسايكل وريكشا ديب ناملنگن نقليه واسطه لرتمانيدن يوزبيريشي ايتيله دي، فارياب كسلخانه مسووللري جراحت لنگن لرياش باله لروعياللردن عبارت بولگن ديب ايته ديلر.

عين حالده ميمنه شهريده گي افغان تورك دوستليك كسلخانه مسوولي داكتر محمد قاسم پارسا بوولايتده سونگي ميزان وعقربدن بيرنيچه كون اوتگن گه قدر قريب 250 ترافيكي واقعه يوزبيريب بيرقطاراهالي حياتي گه سبب بولگن ديب ايته دي.

تيگيشلي اداره لردن ترافيكي واقعه لرسبب تلفات لررقمي قنچه ايكن ليگي باره سيده معلومات قولگه كيلتريب بولمه دي ، اما اونلب اهالي دن جان آلگن ديب تخمين قيليش ممكن.

فارياب پوليس اداره سي ترافيكي واقعه لرساني آشگن ليگي ني تصديقلب اما افغان تورك دوستليك كسلخانه سي تمانيدن ايتيلگن ترافيكي واقعه لررقمي ني رد ايته دي.

ترافيكي واقعه لرتيز- تيز ويوزبيريشي گه كوپراق عايله لرتشويش بيلديرماقده لر

عايله، باشليغ لريگه كوره اوزباله لريني بازارو مكتب گه جونتگن پيتي اويگه قيتيب كيلگونچه نهايت تشويش قيله ديلر.

ميمنه شهري هوا قونالغه سي يوليده گي دكاندارلردن صوفي دين محمد ترافيكي واقعه لرباره سيده اوزتشويشي ني بيلديره دي.

" باله لريميزگه يوللردن احتياط بولينگ ديب تاكيدقيلسك هم مكتب دن قيتيب كيلگونچه نهايت تشويشده بوليب توره ميز، ياش باله لر،جوده تيز هيده يديلرانه شوسبب ترافيكي واقعه يوزبيريشيگه سبب بوله دي، مين اوزيم قنچه سيگه گواه بولگن من، حادثه دن قنچه وقت اوتگن دن كيين ترافيك خادم لري محلگه كيله ديلر" دييدي او

ترافيك خادم لري تمانيدن ياش موترسايكل هيده يديگن باله لرآلدي آلينمسليگي سبب شهرده بلاغت ياشيگه ييتمه گن كوپلب موترسايكل هيده ياتگن ياش باله لرني كوريش ممكن، محمد رامين هم انه شوموترسايكل هيده يديگن ياشلردن بيري

"ياشيم 15ده ايكي ييلدن بيري موتر سايكل هيده يمن، موترسايكل هيده شني اكم اورگتگن، يخشي بيله من، تيزهيده مه يمن، ترافيك هم احتياط قيليب هيده ديب ايتگن" دييدي او

بيرقطار باله لرهم بار، اوزعايله لري موترسايكل ني احتياط قيليب هيده شي اوچون تاكيدقيله ياتگن لريگه اعتباربيره ديلر.

دكاندارلردن بشيراحمد گه كوره ترافيك خادم لري ترافيكي واقعه لرگه عيب داركيشي لرني قولگه آلمي، و اگرده قولگه آلگن حالده هم تيزده قوييب يوباريشي ايسه ترافيكي واقعه لرنينگ كوپ بوليشي گه سبب بولگن.

اوشبوولايت ده بولگن ترافيك اداره سي ترافيكي واقعه لرني يوزبيريشي گه مسوول بولگنلربيلن قانوني جدي معامله قيلمسليگي گه اداري فساد، تنيش- بيليش مساله لري سبب ديب ايتيله دي.

ايريم اهالي ترافيكي واقعه لرآلدي آلينيشي اوچون عايله لرگه قوشيمچه ترافيك اداره سي مسوول ايكن ليگي ني تيل گه آلماقده.

ميمنه شهريده تيزهيده ش حاللري موترسايكل هيده ياتگن لر آره سيده كوپ سانده كوزه تيله دي، بوايسه هركون ميمنه ده ترافيكي واقعه لرگه سبب بوليب، كوپلب آدملرني يره لنتيريب وبيرقنچه لرني هم هلاكت گه اوچره تيب كيلماقده.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.