BBC navigation

اورمانزارلرنی سقلش اوچون اونلب میمنه لیک چارودار بولدی

Сўнгги янгиланиш 21 ноябр 2012 - 11:06 GMT

فارياب ولايتي نينگ ايكين چيليك وچارواچيليك رياستي باشليغي اسد الله بهارگه كوره بواداره تمانيدن فارياب ولايتي و ميمنه شهري اطرافيده جايلشگن اورمانلر ني سقلش اوچون اونلب اینک ترقه تیلگن.

بو اینک لر ایسه قيشلاق وتومن اهالي سيدن قوريلگن 8 اويوشمه دن ايكيته سي نينگ اعضالريگه بيريلگن وقالگني هم آليب بيريلماقده.

" بيزلرگه بيرپروژه كيلگن ايدي، اهالي گه اورمان لرني يخشي راق قوريشي باره سيده بيرمقدار پول ايدي، اويوشمه اعضالري تكليف لري گه قره ب ميمنه شهري گه تيگيشلي تورپاختو قيشلاغي ده گي اويوشمه اعضالريگه 14ته سوت بيره ديگن اينك ني آليب بيرديك وكوهيخانه ليك لرگه هم پولي گه قره ب اينك آليب بيره ميز، بوندن مقصد اورمان لرني يخشي سقلب- اويلش بوليب زراعت وزيرليگي ريجه سيگه كوره اورمان لرني قوريش اوچون مخصوص آدم كيره ك ايمس انه شواينك آليب بيريلگن لراورمانلرني يخشي راق قوريش مقصديده ترغيب بوليشي اوچون شوياردمني قيلگن واورمان قوريش ايسه بوتون اهالي تيگيشلي بوليب احتياط قيليب قوريش لري كيره ك چونكه اولر گه تعلقلي بولگن" دييدي فارياب ولايتي نينگ ايكين چيليك وچارواچيليك رياستي نينگ رئيسي اسدالله بهارجنابلري.

ميمنه ليك صوفي نورمحمد ايدي اونينگ عايله اعضا سي اوزاق ييللردن بيري سوت وقتيغي دن فايده له نيش اوچون اينك لي بوليشلريني دايم آرزو قيليب كيلرديلر. اما كمبغل ليك سبب اينك ساتيب آليشگه قربلري ييتمه گن ايدي يقينده اوشبو ولايت نينگ ايكينچيليك وچارواچيليك رياستي تمانيدن ميمنه شهريگه تيگيشلي قيشلاق لردن بيريده گي اوندن آرتيق عايله گه بوجمله دن صوفي نورمحمد گه اينك ساتيب آليب بيريلگن بوايسه اونينگ آروزلريني رويابگه چيقرگن اوبوندن اوزخرسندليگي ني بيلديره دي.

"قوشني لريميزنينگ ايريم لري اينك لي ايدي، باله لريم آته بيزلرگه اينك آلينگ سوت قتيق ايچه ميزديب اله قچان دن بيري ايتيب كيلرديلراما ساتيب آليشگه علاجيم ييتمس دي بخت گه موافق يقينده آرزوميزايسه رويابگه چيقدي، ايكينچيليك اداره سي تمانيدن اينك آليب بيريلدي، بيرنيچه هفته ده توغه دي خدا خواه لسه سوت وقتيق مول بوليب قاله دي كمبغل ايديك بوندن نهايت خرسندميز" دييدي صوفي نورمحمد.

شونينگ ديك او بيريلگن اينك محصولاتي ني اوز روزگاريدن آشيره آلگن حالده سوت وقتيغيدن بازارده هم ساتيشيني تيل گه آله دي.

ميمنه شهري اطرافيده جايلشگن دولتگه تيگشلي تيپه لركوركم بوليب توريشي اوچون ايكين چيليك وچاروا چيليك اداره سي تمانيدن پسته و بادام ايكيليب اورمان قيلينگن.

اورمان يقينيده جايلشگن قيشلاق اهالي سي اورمان ني يخشي راق قوريب و سقلش اوچون ايكين چيليك اداره سي تشبثي بيلن قيشلاق اهالي سي دن تشكيل تاپگن اويوشمه اعضالري گه انه شواينك لرساتيب آليب بيريلگن.

حكومت تمانيدن بيريلگن اينك كه ايگه بولگن لرحيواني آذوقه آليب بيريشگه قرب لري ييتمسليگي سبب دولت تمانيدن حيواني آذوقه مساله سي ياردم ايتيليشي ني، ضرورديب ايته ديلر.

" دولت دن منت دارچيليك بيلديره ميزاما اينك آذوقه سي ني ساتيب آليب بيريش بيزلرگه آغيرتوشه دي امكاني بولسه سمان وكنجاره هم آليب بيرسه يخشي بوله دي" دييدي اينك آلگن اهالي دن بيري.

اينك سوت قتيغي دن تورلي طعام لرتيارله نيله دي، باشقه تاماندن بونينگ طعامي ارزان توشه دي، شواوچون باشقه لرگه قره گنده كوپراق كمبغل عايله لرنينگ اينك كه بولگن احتياج لريني آشيره د ي، اما اينك ني بازاردن ساتيب آليش گه كته مبلغ كيره ك بوله دي بيرقنچه كمبغل عايله لرحكومت تمانيدن بيريلگن اينك لراولرگه هم آليب بيريليشي ني ايسته يديلر.

مالدارليك فارياب اهالي سي نينگ اساسي شغللري بوليب، اينيقسه عايله لرده اينك سقلب بونينگ محصولاتي آرقه لي روزگارتيبره تيش بواهالي گه بابا واجداددن قالگن ميراث حسابلنه دي. اما اوتگن ييللرده ايزمه- ايز قورغاق چيليك يوزبيريشي سبب حيواني آذوقه ني تامين لش قيين لشگن ليگي اوچون كوپگينه عايله لركوپچيليك چاروا لري بوجمله دن سوت وقتيغي دن فايده له نيب كيله ياتگن ماللريني قولدن بيرگن ايديلر.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.