BBC navigation

عاموي خبرواسطه لريده فارياب ليك عياللر اورني نيگه آز؟

Сўнгги янгиланиш 22 декабр 2012 - 09:24 GMT

شمالی فاریاب ولایتیده فعالیت قیلیب کیله یاتگن رسانه لرده تورلی معمالر سبب عیاللر اورنی نهایت آز بولگنی ایتیلماقده.بوایسه عیاللر حقلریدن حمایت ایتوچی تشکیلات لرنینگ خواطر وتنقید لرگه سبب بولگن.

مملكتده كرزي حكومتي تشكيل تاپيشي بيلن سوزومطبوعات نينگ ايركين فعاليت قيليشي گه زمينه يره تيلدي، شو سبب اوتگن اون ييلده مملكت مقياسيده اونلب راديو وتلويزيون لرفعاليت قيليب خذمت كورسه تيب كيلماقده.

انه شوفعاليت يورغيزيب كيله ياتگن رسانه لرده هم عياللروهم ايركك كوپ سانده ايش قيليب كيلماقده لراما مملكت نينگ ايريم حدودلري بوجمله دن فارياب ولايتي ده فعاليت قيليب كيله ديگن رسانه لرده تورلي معما لرسبب ايشله ياتگن عياللرساني نهايت آزبولگن.

گيتي نوري 12صنف اوقووچيسي ، او بيرنيچه ييلدن بيري، عاموي خبرواسطه لري ده ايشلشني آرزوقيليب كيله ديگن ميمنه ليك اونلب عياللردن بيري، اما گيتي نوري نينگ عايله سي رخصت بيرمه گن ليگي سبب بوآرزوسي هلي گچه رويابگه چقمه گن.

اما شونگه قره مسدن اوزقيزلري گه رسانه لرده ايشلشگه رخصت بيره ديگن عايله لرهم باراما بوكبي عايله لرنينگ ساني آز.

يولدوزخانم هم انه شو عايله لردن بيري اوبيرنيچه ييلدن بيري دولت گه تيگيشيلي فارياب ملي راديو تلويزيونيده مخبرليك قيليب كيلماقده.

يولدوزخانم هم عايله سيدن آسانليك بيلن رسانه گه ايشلش امكانيتي ني تاپمه گن .

عياللررسانه لرده اوزايستك لريگه باريب ايشله آلمسليگيگه ينه بيرسبب هم بوولايت ده گي خوف سيزليك معماسي بارليگي ديب تاكيدلنه دي.

ايريم لرگه كوره عايله لررسانه لرده ايشله گن عايله اعضا لري نينگ حياتي واوز لري نينگ حياتي خوفگه توشيشيدن قورقيب عياللرگه بوساحه ده ايش قيليش اوچون رخصت بيرمه يديلر.

بوولايتده گي كوپلب عايله لراوزقيزلري ني رسانه لرده ايشله شيني رخصت بيرمسه لرهم اما ياش قيزلرآره سيده بوساحه ده قيزيقيش كته بولگن.

رسانه لرگه باريب توغريدن – توغري ايشلش امكاني ني تاپمه گن كوپلب قيزلرراديولرترقه تيب كيله ياتگن تورلي برنامه لرگه تيلفون قيليب فعال حصه قوشيب كيلماقده لر.

ياش قيزلردن بولگن فريبا بيرقطاررسانه لرني قيزيقيب تينگلب وهم برنامه لريگه تيلفون قيليب كيله ياتگن ليگي ني ايته دي.

فارياب ولايتيده فعاليت قيليب كيله ياتگن ايريم رسانه لرنينگ مسووللري گه كوره رسانه لربيره ديگن برنامه لري گه كوپچيليك تينگلاوچي ني تاپيب وجلب قيليش گه عيال قتلمي نينگ رولي اوته كوپ بولگن.

فارياب ولايتي نينگ خاتين قيزلررياستي نينگ باشليغي خانم شريفه عظيمي رسانه لرده عيال قتلمي آزليگي گه بيرعايله لرتمانيدن رخصت بيريلمسليگي بولمي بلكه اوتميشده بوقتلم دن ژورناليست كيشي لرآزليگي سبب ديب ايته دي. شونينگ ديك او عياللركوپراق بوساحه ده فعال سهم آليش لري اوچون بوولايتده گي خاتين قيزلررياستي وايريم مدني تشكيلات لرتمانيدن بوخصوصده سعي وحركت يولگه قوييليب كيله ياتگن ليگي ني تيل گه آله دي.

حاضرگي كونده فارياب ولايتيده دولت گه تيگيشلي راديو وتلويزيوندن تشقري 6آلتي ته راديو بيرسيتي كيبل فعاليت قيله دي.

اما اوشبورسانه لرده اونلب ايركك خذمت قيليب كيلسه ده بيراق شونگه قره مسدن عياللرساني بيرنيچيته دن آشه ايمس ديسه بوله دي. بوايسه فارياب ولايتيده گي انسان حقلري بوييچه فعاليت قيليب كيله ياتگن فعاللرني خواطروتنقيدلري بيلن بيريگه بولگن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.