BBC navigation

کابل شهریده، اهالی چونتک کیسرلیک حالتلری آشیب باره یاتگنی دن شکایت قیلگنلر

Сўнгги янгиланиш 19 феврал 2013 - 13:14 GMT

پایتخت کابلده سونگی پیتلرده چونتک کیسرلیک حالتلری کوپه یگنی ایتیله دی. اهالی، چونتک کیسر اوغریلر سانی کون کونگه آشیب باره یاتگنی دن شکایت قیلماقده لر. اولر، چونتکده گی پوللری، اوغریلر تمانیدن سیرلی روشده اوغرلنه یاتگنی نی ایتیب، بوحقده پولیس نی چونتک کیسرلرنی اوشلب، جزالنمه یاتگنلیکده عیبله گنلر. اما پولیس، شهرده چونتک کیسرلرسانی کوپه ی گنی نی رد ایتمه ی، اولرنی اوشلب، جزاله یاتگنلیگی نی ایتماقده.

چونتک کیسر اوغریلر، شهرنینگ سیرجمعیت ساحه لریده، اهالی نینگ چونته گینی نی کیسیب، پوللرینی آلیب کیته دیلر. سودا آلیش مقصدیده شهر گه کیلیب، چونتک کیسرلیککه دوچ کیلگن عیاللردن بیری بوحقد بونده ی دییدی:"مین تیمورشاهی مارکیتیده خرید قیلماقده ایدیم، بیر عیال مینینگ بکسیم نی تارته یاتگنی نی سیزیب قالیدیم، نیمه قیله سیز دیب بکسیم نی قولیدن آلدیم، ایچیده بیر مینگ افغانی بار ایدی، آچیب کورسم ده، اوشه بیرمینگ افغانی نی آلیب کیتیبدی".

عین حالده، غلام علی اسملی باشقه بیر شخص، بیرقطار اوغریلر، اونی و یولداشلری نینگ پوللرینی اوغیرلش اوچون، اولرنی تعقیب ایتگنی نی ایته دی. اونگه کوره، اوزلرینی، بیرنیچه نفردن عبارت بولگن اوغریلردن قوتقه زیش اوچون، اورتاقلریگه تلفون قیلیب، اولرنی یاردم چقیرگنلر.

اوشبو حالتلر، نه فقط سودا بازارلرده روی بیره دی، بلکه چونتک کیسر اوغریلر، موترلرده هم یولاوچیلرنینگ پولی و تیلفونلرینی اوغیرله یدیلر. نورستان دن کابلگه سودا آلیش مقصدیده کیلگن ظفر اسملی شخص، چونتک کیسرلر اونینگ چونته گیدن آلتمیش مینگ افغانی سی نی اوغیرلب کیتگنی باره سیده بونده ی حکایه قیله دی:"مین هیچ قچان سرویس گه مین مسدیم، بیرکون تکسی موترتاپیلمه ی قالدی، اوشه کون سرویس گه میندیم، قوای مرکزی گه ییتیب بارگنیمده قولیم نی چونته گیم گه سالدیم ،کوردیم که جونتک ده پول یوق. آلتمیش مینگ افغانی پولیم نی چونته گیم دن اوغیرلب کیتدی".

اونگه کوره، اطراف منطقه لر دن کابل شهریگه کیله دیگن لر نینگ اکثریتی، شونده ی حالتلرگه دوچ کیلیب، پوللری نی قولدن بیره دیلر.

چونتک کیسر اوغریلر، هر دایم پول اورغیرلشگه قادر بوله آله دی می؟ بو حقده چونته گیگه قول سالیب، پولینی اوغیرلشگه موفق بوله آلمه گن اغری نینگ حکایه سینی احسان الله اسملی بو شخص بیزگه آچیقلیب بیردی:"مین بیرکون آیلیگیم نی بانک دن آلیب شهردن سودا آلماچی ایدیم، بیر کیشی کیلیب، قولینی مینینگ چونته گیم گه سالدی. مین تیز ده خبر بولیب، اونینگ قولینی توتیب آلدیم. چونتک ده گی پوللریم چونته گیم نی کوته ریب، تورگندی".

اما کابل امنیه قوماندانلیگی جنایی ایشلربوییچه اداره سی رییسی، چونتک کیسرلیککه قول اورگن اوغریلر اوشلنگن تقدیرده، باش قاره لاوچیلیککه تاپشیریلیب، اوغیرله گن پول نینگ مقداری اساسیده جزا تعیینلنیشی نی ایتدی:"چونتک کیسرلر گه آلتی آیدن اوچ ییلگچه، اوغیرله گن پولری اساسیده جزا تعیینلنیب، باش قاره لاوچیلیککه تاپشیریله دی. اولردن بیرقطاری حاضرهم قماق جزاسی نی اوته ماقده لر. بیز اولرنینگ هر کونی اوچته تورت ته دوسیه سی نی تیکشیره میز. بوحقده هر بیر وطنداریمیزمراجعت قیلسه، بیز خذمت گه تیار میز".

اهالی نینگ، شهرده انده سنده روی بیره دیگن ناخوش حادثه لردن قورقه یاتگنلیگگه قره مه ی، چونتک کیسرلیک و باشقه شوکبی جنایتلر میزانی آشیب باره یاتگنی دن شکایت قیله یاتگن بیرپیتده، خوفسیزلیک مسووللری، بونگه شهرده جمعیت سانی آشگنینی سبب قیلیب کورستماقده لر.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.