BBC navigation

زینت کرزی حیاتی دن ایته دی

Сўнгги янгиланиш 10 март 2013 - 07:21 GMT

حامد کرزی نینگ رفیقه‌سی (عمر یولداشی) داکتر زینت کرزی اوتگن اون بیر ییل جریانیده اطلاعات ییتکزوچی واسطه‌لرده آزارق کورینگن. کرزی خانیملری بی بی سی بیلن قیلگن صحبتیده بونینگ سببینی افغانستانده‌گی ناقوله‌ی شرایط دیب نامله‌گن. شونده‌ی بولسه- ده، او افغانستان نینگ بیرینچی بیکه‌سی اوله‌راق، اوز زمه‌سیده‌گی وظیفه‌لرنی یخشی بجرگنلیگینی ایته‌دی.

سوال:

بیرینچی سوالیم شوکه، افغانستان نینگ بوکونگی وضیعیتده خایتن- قیزلر حقیده انچه‌گینه بحث و مناظره‌لر بولیب توره‌دی. یعنی افغانستانده بحث بولیشگه ارزییدیگن مسله‌لردن بیری هم عینن عیاللرنینگ یشش و تحصیل آلیشلری حقیده‌گی سوز و سخنلر دیر. سیز قنده‌ی وضیعتده یشه‌دینگیز، قنده‌ی بیلیم آلیب، تحصیل کوردینگیز؟

جواب:

آچیغینی ایته‌دیگن بولسم، مین تحصیل قیله‌دیگن پیتلر افغانستانده اوروشلر آقیمی بینل بیرگه بولگن. مکتب یا که بیلیم یورت گه درس اوچون قلدم قویگن وقتلریمده، افغانستانده اوروش و تارتیشوولر اوز اوجیده ایدی دیسم هم بوله‌دی.

سوال:

عایله‌نگیز اوچون سیزنینگ اوقیمیشلی بولیشینگیز قنچه‌لیک مهم بولگن؟

جواب:

اوته مهم، جوده‌یم اونملی. عایلم بیلیم پرور بیر خاندان بولیشگن. آتم معراف اهلی بولیب، دییرلی 30 -35 ییل معارف ده خذمت کورستگنلر. آنم هم شونده‌ی، آچیق روحیه‌‌لی بیلیملی عیال بولگن. او فرزندلری اوچون جوده جانکویرلیک قیلگن. اولر باعث بیز افغانستانده‌ی بیر مملکتده هم مکتب، هم یونیورسیتیتنی موفقیت بیلن اوقیب بیتیردیک.

سوال:

قیزیغی شو که، سیز هم کوپگینه افغان عایله‌لریگه اوخشب، پاکستان اولکه‌سیگه باریب، مهاجرت تجربه‌سینی کورگن‌سیز. سیز اوچون بو قنچه‌لیک آغیر کیچدی، قنچه‌لیک هیجانلی ایدی؟

جواب:

اوز وطنینگ دن چیقیب، اوزگه ممکلتلرده یشش نینگ قنچه‌لیک آغیرلیگینی مهجرت قیلگن آدملر بیلیشه‌دی. افغانستان یشاوچیلریگه ایندی آنه وطنلریدن اجره‌لیب، باشقه‌لرگه محتاج بولمسلیکلرینی ایسته‌یمن.

سوال:

مهاجرتدن قیتگنینگیزده، سیزنینگچه افغانستان نی قدر اوزگرگن ایدی؟

جواب:

جوده کوپ، افغانستانده کته‌گینه اۉزگریشنی کوردیم، او خرابه‌گه ایلنگن ایدی. برچه ساحه‌لرنی کوزگه توتیب ایته‌دیگن بولسم، او بوتونله‌ی بوزیلیب کیتگن ایدی، بوتونله‌ی! یعنی اقتصادي، اجتماعي، تعلیمي و صحي ساحه‌لرده. آرتیق افغانستان اوچون هیچ نیمه قالمه‌گن ایدی.

سوال:

کورینیشیچه، سیز و فرزندلرینگیز غایت آغیر بولگن خوفسیزلیک شرایطیده حیات کیچیریب کیلماقده سیز. شو شرایطلر عادی حیاتینگیزنی قیین قیلگنی یوق می؟

جواب:

مرکب قیلگن، مین باشقه عادی عیاللرگه اوخشب تشقریگه چیقیب یورالمه‌یمن. بونیسی کو انیق.

سوال:

نظرینگیزده، افغانستان نینگ ایریم سیاسی چهر‌ه‌لرینینگ مداخله‌سی باعث، سیز و جناب کرزی اورته‌سیده قنده‌ی دیر بیر توشینماوچیلیک یاکه جنجال تورغیزگن می؟

جواب:

یوق، اونده‌ی کو بولمه‌گن. ولیکن بو ایر- خاتینلیک حیاتی، سیاست حیاتی تارتیشوولر بولیشی ممکن. اما، حاضرگچه اورته‌میزده هیچ بیر ناقوله‌ی شرایط اورته‌گه چیققنی یۉق.

سوال:

سیز قنده‌ی حیاتنی یاقتیره‌سیز، قصر حیاتی می، یاکه قصردن تشقریده‌گی عادی حیاتنی می؟

جواب:

جوابیم البتّه که قصردن تشقری بوله‌دی. زیرا، عادی فقرا حیاتی کوپگینه حاللرده جنجال سیز بوله‌دی. مین عادی ‌گینه روزغارنی بهاله‌گن بولردیم.

سوال:

بوگون مین سیزنینگ کیچیک یاشده‌گی قیزینگیز ملاله جان نی کوریب قالدیم. و بیزنینگ افغانستانده‌گی شرایط قیزلر اوچون آغیرراق. میلی بو بار اویینگیزگه قیز بولدی، باشقه مرته اوغیل بولر دیب هیچ سیزگه ایتیشدی می؟

جواب:

بو تورگن گپ! هه، بونقه‌سینی ایتیشیتگنمن، مینگه شونده‌ی دیگنلر هم بولدی. بیراق، مین و آته‌سیگه اوغیل می قیز می بری بیر. بو مسله‌ بیز اوچون هیچ مهم ایمس. هم اوغلیمیز، هم قیزیمیزگه بیرده‌ی قره‌ب، بیرخیل زمینه یره‌تیب کیلماقده‌میز. خدا خواهله‌سه ایکاوی هم افغانستانگه خذمت قیله‌دی.

سوال:

عمر یولداشینگیز- کرزی جنابلری حقیده سوره‌شنی ایسته‌گن بولردیم. خوجه‌ینیگیز هم دولت اربابی، هم ایکی فرزند آته‌سی. اولرگه بو ایکله‌سیدن- یعنی هم باله‌لرینگیز، همده دولت ایشلریگه باش- قاش بولیش مشکُل ایمس می؟

جواب:

اونینگ اون ییلدن بیری ایش بیلن شغللنیب یورگنینی بیله‌سیز. ایرته‌دن کیچگچه ایش ییریده بوله‌دی. آقشام اویگه قیتگچ ایسه، فرزندلری بیلن یقین علاقه‌ده بوله‌دی. اولرگه جوده مهربان و رحملی آته. باله‌لرینی اونگه بولگن احتیاجینی مهر اوله‌راق اولرگه البتّه بیره‌دی.

سوال:

عمر یولداشینگیز سیز و باله‌لرینگیز بیلن خریدگه باریش اوچون، ارگده قدم اوریشگه گاهیده وقت تاپه‌دیلرمی؟ سیزگه سونگی بار ساوغه آلیب کیلگنلیکلری ایسینگیزده می، قچان ایدی؟

جواب:

بیحد ایش بیلن بند بولگنی اوچون، تشقریگه چیقیشیمیز درگمان. فقط گاهیده بیزگه وقت اجره‌ته‌آله‌دی. و، ساوغه‌گه کیله‌دیگن بولسم، یوق، او مینگه ساوغه آلیب کیلمه‌گن. باله‌لریگه ساوغه- سلام آلیب کیله‌دی. مینگه ایسه، جمهور ریسلیک لوازمیگه چیقگنیدن بیری هیچ قنقه ساوغه کیلتیرمه‌گن. اوندن اول قه‌ییرگه بارمه‌سین مینگه ساوغه‌لر آلیب کیلردی.

سوال:

ایش- یوموش ده هم سیزگه یاردم بیریب تورگن موقعلر هم بولگن می؟

جواب:

بوش وقتی بولگنده، هه، او مین بیلن یاردملشیب توره‌دی. لیکن، او اون ایکی ساعت دفترده بوله‌دی.

سوال:

سیز بیلیملی عیال سیز، افغانستان عیاللریگه یخشی اورنک بولیشینگیز ممکن. شونده‌ی ایکن، نیگه جمیعتده‌گی فعالیتینگیز آزراق، اورینگیز بوش؟

جواب:

اوتّیز ییلدن بیری افغانستان اوروش گردابیده قالیب کیلگن. بیله‌سیزکه مین هیچ قنده‌ی خارجی سفرلرده کورینمه‌گنمن. سببی، جمیعتیمیزنینگ اوته عنعنه‌دارلیگی، یانیده سیاسي مسله‌لر باعث هم مین تشقریگه چیقمه‌یمن. افغان جمیعتی نینگ کوپراق زمانگه احتیاجی بار. شونده‌ی بولسه- ده، مین قولنی قول اوستیگه قوییب اولتیرگنیم یوق. اکتیف عیاللر بیلن علاقه‌ده من.

سوال:

ایتیلیشیچه، عمر یولداشینگیز- حامد کرزي جنابلری، عنعنه‌ و سنتلر سببلی، سیزنینگ هرقنده‌ی اجتماعي- سیاسي خط و حرکتلرینگیزگه قرشی. شوند‌ه‌ی می؟

جواب:

یوق، بو نا توغری. چونکه، کرزی جنابلرینینگ ضیالی بیر کیشی ایکنلیکلرینی نه فقط مین بلکه همه بیله‌دی. انه‌شونده‌ی بیر ذهنیت هیچ کیم نینگ مییه‌سیده بولمسلیگینی چین دیلدن ایسته‌گن بولردیم. افغانستان هلی اوزگره‌دی. استه- سیکینلیک همه‌سی یخشی بولیب کیتیشی اوچون مناسب فرصتیمیز بولیشی کیره‌ک.

سوال:

عادی عیاللر بیلن قنده‌ی مناسبتده‌سیز؟ شهر و تومنلرگه چیقیب، اولر بیلن یقیندن گپله‌شیب هم توره‌سیزمی؟

جواب:

سفرگه چیقگمه‌گنمن. شونگه قره‌مه‌ی اولر کیلیشه‌دی، کوره‌من، گپله‌شه‌من. افغانستان نینگ برچه فعال خاتین- قیزلری بیلن اوچره‌شیب توره‌من، خواه عادی فقرا بولسین، خواه فعال عیاللر ارتباطده من. کیله‌دیلر، کوره‌من.

سوال:

سیزنینگ کرزی جنابلری حقیده کتاب یازه‌یاتگن سیز دیب ایشیتدیک، توغری می بو؟ کتاب نینگ آتی نیمه؟ قنده‌ی موضوعلرنی قمره‌ب آله‌دی؟

جواب:

یوق مین کتاب یازمه‌گنمن. بو حقیقت ایمس.

سوال:

کرزی خانیملری، افغانستان نینگ بیرینچی عیالی تانیلگن بیر چهر‌ه‌سی بولیشی کیره‌کلیگی مسله‌سی اهالی اوچون قانیقرلی بوله‌دی می اویله‌یسیزمی؟

جواب:

مین ینه اوشه اولگی جوابلریمنی ایسلب اوته‌من. افغانستان نینگ حاضرگی شرایطیده بیزگه انچه گینه وقت کیره‌ک.

سوال:

بیز ییگیرمه بیرینچی عصرده میز. منه ایندی، ایرککلری بیلن ملکه ثریا و حمیرا بیگیم کبی عیاللر بیرگه قدم قوییشگنلر. اوشه عیاللر سیز اوچون اورنک بوله‌آله‌دی‌می؟

جواب:

هه، ایکله‌سی هم، هم ملیکه ثریا، همده حمیرا بیگیم. لیکن بونده‌ی قره‌یدیگن بولسم، ینه بیر تماندن اولرنینگ زمانی بیلن مین یشه‌یاتگن چاغ فرق قیله‌دی. اورته‌ده کتّه آره‌لیق فرق بار. بیزنینگ زمانگه احیاتیمیز کتّه. اولر یشه‌گن پیت بیلن بیزنیکینی قیاسلب هم بولمه‌یدی. اولر یخشی زمانده یشب اوتیشدی. بیز کوپ اوروشلرگه گواه بولدیک.

سوال:

جهان نینگ قیسی بیرینچی بانولری بیلن یقیندن علاقه‌ده بولگن‌سیز؟ اولرنینگ اجتماعي فعالیتلرینی کوپلیگیگه ایشانه‌سیزمی؟

جواب:

هه، مین جهان نینگ بیرینچی بیکه‌لری بیلن اوچره‌شگنمن. مثال اوچون، فرنسیه نینگ سابق پرزیدینتی نینگ رفیقه‌سی بیلن اوچره‌شگنمن. او ایکی مرته افغانستانگه سفر قیلیب کیلگندی. ایلک بار او باله‌لر اوچون مخصوص بیر کسلخانه نینگ تمل تاشینی قوییب کیتدی. اوشنده اونی کورگن ایدیم. امیریکه نینگ ایسکی پریزیدینتی نینگ عیالی لورا بوش خانیملری بیلن هم اوچره‌شگنمن. اولر هم ایش اوچون کیلگن ایدی. قیزلر اوچون بیر یاتاقخانه ایجاد ایتیب کیتگن ایدیلر. ینه تونی بیلیر خانیملری، هندوستان صدراعظمی جناب من موهن سنگ نینگ عمر یولداشی نی هم یقیندن کورگنمن. ایران جمهور ریسی نینگ رفیقه‌سی خاتمی خانیملری بیلن ملاقات قیلگنمن. اولر جوده صمیمی و یخشی عیاللر ایدی. همه‌سی تعریفگه ارزیگولیک.

سوال:

سیز، اوز حیاتینگیز و دنیا نینگ بیرینچی عیاللری حیاتی اورته‌سیده‌گی فرق نی نیمه‌ده دیب بیله‌سیز؟

جواب:

افغانستان و باشقه اولکه لرنینگ شرط- شرایطی باشقه‌چه. اروپا و امیریکه بیلن افغانستان حیاتی بوتونله‌ی باشقچه‌ دیسه هم بوله‌دی. بیزنینگ و اولرنینگ حیاتیمیز آره‌سیده اوزگریشلرنینگ بولیشی هم شرط، نیگه دیگنده بیزده وضیعت سل باشقچه‌راق.

سوال:

گاهیده جمهور ریس دولتی مسله‌لر اوچون سیز بیلن مصلحتلشه‌دی می؟ و سیزهم زمان- زمان اونگه مصلحت بیره‌سیزمی. او قبول قیله‌دی می؟

جواب:

سیاست بابیده می، یوق، سیاسي بحثلرده نه مین اونگه مصلحت بیره‌من، نه او مین بیلن مصلحتلشه‌دی. ولیکن باشقه ساحه‌لرده مین او بیلن گپیریب توره‌من. مثلن ساغلیک بولیملرده، عیاللرگه عاید موضوعلرده او بیلن فکرداشلیک قیلیب توره‌من.

سوال:

کوپراق قیسی ساحه‌لرده افغان جمهور ریسی نینگ بویروغیده ینگلیش بار دیب اویله‌یسیز؟ شونینگدیک قیسی ساحه‌لرده امری توغری دیگن فکرده سیز؟

جواب:

اول هم ایتگنیم دیک مین اونینگ برچه فعالیتلریدن راضی من. همه ساحه‌لرده‌گی ایشلریدن راضی من. چونکه، اوتگن اون ییل جریانیده اونینگ قیلگن خذمتلرینی هیچ کیم نیکی بیلن قیاسلب بولمه‌یدی. اول شوکه، بیزنینگ بیراغیمیز اوروپادن تارتیب، امیریکه و اورته آسیا مملکتلری آره‌‌سیده تانیلدی. خلص، بیراغیمیز جهان مقیاسی درجه‌سیگچه کوتریلدی. معلوم که بو افغانستان اهالی اوچون کتّه شان- شرف و فخر. او کیلگندن کیین ملت اورته‌سیده بیرلیکنی ایتمه‌یسیزمی، پرچه‌لنگن ملت نی بیر- بیریگه قاووشتیردی. اونینگ خذمتلرینی سنب اولتیرسک حسابگه سیغمه‌یدی. ایندی بیله‌میز که اورگنیش وزیرلیگیمیز توبدن یوق بولیش حالگه کیریب قالگن ایدی. ینه ایته‌من قیلگن حرکتلری بویوک بهگه ارزییدی. اورگنیش ساحه‌سیده، خوفسیزلیک ساحه‌لریده، پولیس خادملرینی تربیه‌لش حاللری و ینه بیر قطار فایده‌لی خط حرکتلر بولدی. همه نرسه‌نینگ ایلدیزی قوییلیب بولدی. خدا خواهله‌سه همه سی بوندن زیاده هم یخشی بولیب کیته ویره‌دی. مین اوندن یوزده- یوز راضی من. باشقه‌لر راضی بولیشلری تعین گپ. البتّه راضی بولیشلری هم کیره ک.

سوال:

جهان ینگیلیکلرینی قنده‌ی؟ کوزه‌تیب هم باره‌سیزمی؟ انتیرنیت آرقه‌لی بولسه کیره‌ک، هه؟

جواب:

انتیرنیت ایمس. تلویزیون اکرنلریدن کوزه‌تیب باره من.

سوال:

و سیزنینگچه طالبان دولتی قوله‌تیلگندن کیین افغان عیاللری وضیعیتی قنچه‌لیک اوزگرگن؟

جواب:

جوده کتّه، مثلسیز اوزگریش کیلگن. بونگه همه میز گواهمیز. صحتدن باشلب، اورگنیش قسملریگچه اوزگریشنی حس قیلیش ممکن. هربیر عالی گاه و مکتبده قیزلرنینگ سانی کون سایین آرتیب بارماقده. یعنی بو، سیزیلرلی اوزگریشلرنینگ بارلیگیدن درک بیره‌دی.

سوال:

اونده نیگه بیز هردایم خاتین- قیزلرگه هرقنده‌ی زوراوانلیک حالتلری کوپ دیب ایتشیته‌میز؟!

جواب:

درواقع بیز اوتّیز ییل اوروش کوردیک، عیاللرنینگ بوگونکی وضیعیتی اوشه مرکب تارتیشوولرنینگ نتیجه‌سی دیسم توغری بوله‌دی.

سوال:

یعضیده بورقع سالگن می سیز؟ سالگن بوله‌سنگیز نیمه لر حس قیلگنینگیزنی بیلسک بوله‌دی می؟

جواب:

قیزیق، راستدن هم قیزیق. هه، بورقع سالگنمن. درحقیقت سالیشگه مجبور بولگنمن. بیلیم یورتده درسلریم اوز پایانیگه ییتگن پیت ایدی و مین کابلدن قندهار باریشیم درکار ایدی. انه اوشه مناسبتنی دیب مین بورقع گه اوره‌لیب سفرگه چیقگن ایدیم.

سوال:

افغانستان عیاللری بورقع سالیشلری بیلن، سیزنینگ عمر یولداشینگیز ایسه، چپان (چپن) و قره‌قل کلاهی بیلن جهانگه مشهور. سیزنینگچه بولر نیمه نینگ رمزي معناسی؟

جواب:

جمهور رییس جنابلری نیکی کو ملی وحدیتیمیزگه اشاره. دوپّی سی بیر ولاتدن، چپنی باشقه سیدن، و کویلگی هم بیزنینگ ملی لباسیمیز. و خاتین- قیزلرنینگ بورقع‌سی ایسه اصلیده افغانستانلیکلردن ایمس. او جوده اوللردن باشقه منطقه‌لردن کیلتیریلگن و شونده‌ی قالگن. بیزنینگ محلی کییملریمیز عینن اوشه اطراف- محیطده‌گی عیاللرده‌گی کییملر. کتّه قرصلر بیلن سالینه‌دیگن کویلکلر یخشی-ده، هم حجاب، هم ملی کییمیمیز. مینیمچه اوزیمیزنی کویلکلر یخشی.

سوال:

فرزندلرینگیزنینگ تحصیل کوریشی اوچون چیت ایلنی یخشی دیگن بولردینگیزمی، یاکه افغانستاننی می؟

جواب:

البتّه که فغانستانده بیلیم آلیشلرینی ایسته‌یمن. چونکه مین اوزیم هم شو وطنده اوقیدیم. اولرنینگ هم شو ییرده اوقیب، زمینیمیزگه خذمت قیلیشلرینی خواهله‌یمن.

سوال:

سکّیزینچی مارچ کونی اوچون عیاللرگه نیمه دیگن بولردینگیز؟

جواب:

سکّیزینچی مارچ ایامینی تبریکله‌گن حالده، برچه قیز- خاتینلرگه خوشبختلیک و دنیاده‌گ یبار ایزگو آرزو- نیتلرنی تیله‌یمن. وطنیمیزده دایمي تینچلیک برقرار بولسین. تینچلیک بیلن بیرگه عیال قتلمی هم اوز آراملرینی تاپیشه‌دی. ینه بیر بار همه‌گه تینچلیک تیله‌یمن. اینیقسه عیاللرگه.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.