BBC navigation

نوروز بيره مي مراسمي مزار شريف شهريده نشانلندي

Сўнгги янгиланиш 21 март 2013 - 13:07 GMT

جهنده بالا مراسمي قتيغ خوف سيزليك چاره تدبير لر بيلن مينگلب افغانستان ليك اشتراكي بيلن يولگه قوييلدي.

مذكور مراسمده بلخ حاكمي بيلن قوشيمچه ينه بير قنچه مركز و ولايت لر مقام لري همده قوشني مملكت لر نماينده لري هم قتنشگن ايديلر.

جهنده كوتاريش جريانيده نيچه توپ آتيليب، قتنه شگن لرنينگ هيجانلنتيريشيگه سبب بولدي. عين زمانده تيك اوچرلر نوروز بيره مي نينگ قوتلاو پيام لري ني آسماندن مزارليكلرگه ترقه تديلر.

روضه نينگ تورت تماني هم جدي خوف سيز ليك چاره تدبيرلر آلينيشي بيلن اوتيب قيته ديگن رخصت بيريلمس ايدي. و آدم لر هم بيرته بيرته تيكشيريليب روضه نينگ ايچيگه كيريشگه امكان تاپريدي.

مراسم رسمي شكلده باشلنيشي بيلن بلخ حاكمي سوزگه چيقيب، 1391 نچي ييلده قيته قوريش، معارف و عالي تحصيلات، اقتصاد و تجارت همده زراعت بوليم لريده عملگه آشيريلگن لايحه لرني باره سيده معلومات بيردي.

بلخ حاكمي عطا محمدنور سوزلري جريانيده، افغانستانده ملي بيرلشيشي نينگ مملكت كيله جگي آيدينلشيشي اوچون اساسي يوللردن بيري ديشيب، اگرده بو بيرلشيش عملگه آشيريلمه سه افغانستان وضعيتي يمان تمانگه كيتيشي بيلن آگاه لنتيردي.

عين زمانده او، صلح پروسه سي دن حمايت بيلديريب ليكن افغانستان جمهور رييسي تمانيدن مذكور لايحه قيته كوريب چيقيليشيني طلب قيلدي.

"ميلادي 2014 نچي ييلده بير ييل قالگن و بو ييلدن كيين خارجي لر افغانستان نينگ ترك ايتيشي بيلن مملكت سياسي و حربي بوليمي يمان وضعيتده اوچره شيش خواطرلري بارليگي ايتيلماقده. واقعيت گپ بو كي اگر سياسي رهبرلر، و مملكت نينگ تنيقلي شخصيت لري امتياز طلبليك لر گه دچار بوليب و تفرقه اورته لريگه توشسه، و وضعيت نينگ يخشي باشقره آلمسه لر، مملكت 2014 دن آلدين هم هر لحظه بحرانگه ايلنيشي احتمالي بار."

روضه ده جهنده كوتاريش مراسمي افغانستان ملي و محلي تلويزيون لري آرقه لي جانلي شكلده ترقه تيلدي.

مذكور مراسمده افغانستان اخبارات و مدنيت وزيري سيد مخدوم رهين هم سوز يوريتيب، اسلام عالمي نوروز نينگ نشانله يشي اوستيده تاكيد له دي.

رهين جنابلري شونگه قوشيمچه قيليب، دنيا نينگ اون دولتي نوروز ني تورلي شكلده نشانله يشي ني ايتيب بو مسئله خلق ارا مقياسيده انچه اهميتگه ايگه ايكن ليگي ني هم بيان قيلدي.

مراسم توگه يشي بيلن مزار شريف شهري گه كيلگن مينگلب مهمانلر، مذكور شهرده يولگه قوييلگن ايريم بزكشي مراسمي و كنسرتلر و سومه لك پيشيروچيلر مراسم لريگه قتنه شيش گه حركت قيلديلر.

نوروز بيره مي، مزار دن تشقري كابل، هرات، باميان و ينه بير قنچه ولايت لرگه نشانلنگن بولسه ده- بيراق، كوپ گينه ولايت لرده ايسه مذكور بيره م دين عالم لري نينگ قرشي مناسبت لريگه بنأً طنطنه لي شكلده يولگه قوييلمه گن.

[an error occurred while processing this directive]

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.