تجارت وزیری: هندوستان، افغانستان صادراتی اوچون اینگ یخشی بازار حسابلنه دی

افغانستان صادراتی رواجلنیشی بوییچه مصلحت بیریش اوچون هندوستان دن بیر گروه تجارت متخصصلر کابل گه کیلگنلر.

اوتگن ییلی هندوستان، افغانسان توارلری نینگ باجخانه تعریفه لری نی صفر گه ییتکزگن ایدی، اما افغان تاجرلری اوشبو فرصتدن یخشی روشده فایده لنه آلمه گنلر.

مسووللر گه کوره، افغانستان نینگ بیرقطار محصولاتلری نینگ صفتی قویی بولگنی، وافغان تاجرلری نینگ هندوستان بازارلری حقیده انیق معلوماتگه ایگه بولمه گنلیگی، فایده لنه آلمه گنلیکلری گه اساسی سبب بولگن.

هندوستان گه افغانستان صادراتی باجخانه سالیغی معافیتی نامی آستیده اویوشتیریلگن اوشبو سیمنار ده هندوستاندن کابلگه کیلگن تجارت متخصصلردن تشقری افغانستان تجارت و صناعت وزیری همده هندوستان نینگ کابلده گی ایلچیسی وبیر قطار تاجرلر اشتراک ایگن ایدیلر.

هندوستان اوتگن ییلی افغانستان نینگ او مملکتگه صادر ایتیله دیگن توارلری نینگ تخمینآ برچه باجخانه تعرفه لرینی صفر گه ییتکزگن ایدی. لیکن، اوشبو قوله ی شرایط و امتیاز دن افغان تاجرلری یخشی روشده فایده لنه آلمه گنلر.

افغانستان تجارت رسمیلری، بونگه تاجرلرنینگ هندوستان بازارلریگه نسبتآ معلوماتی یوقلیگی و محصولاتلرنینگ صفتی قویی لیگی نی سبب قیلیب کورستماقده لر.

شو مناسبت بیلن هندوستان حکومتی بیر گروه متخصص تاجرلرنی، افغانستان نینگ صادراتی رواجلنیشی گه یاردم بیریش و تاجرلر گه اوز تجربه لرینی اورتاقلشیش اوچون اوشبو مملکتگه جونتگن.

افغانستان تجارت وصناعت وزیری انور الحق احدی، اوشبو مناسبت بیلن برپا ایتیلگن سیمنار ده چیقیش قیلیب، هندوستان نینگ افغانستان گه کورستگن یاردملرینی آلقیش لب، هندوستان افغانستان محصولاتی اوچون اینگ یخشی بازار ایکنی باره سیده تاکیدله دی:" بیز هندوستان بازارلریگه ییتیب بارگن میز بوندن جوده هم خرسند میز. هندوستان بازاری منطقه ده اینگ کته بازار حسابلنه دی. بیز اونگه بار توارلریمیز نی صادر ایته آله میز و قنچه که صادر ایتسک، هنوزهم آز. هندوستان حکومتی گه هم بیزنینگ توارلریمیز نی قبول قیلیش قوله ی توشه دی."

احدی جنابلری، هندوستان افغانستان نینگ صادراتی رواجلنیشی ده کته رول اوینب، حاضرگی کونده فغانستان 60 فایز دن آرتیق محصولاتی نی هندوستان گه صادر ایته دی دییدی.

عین حالده، هندوستان نینگ کابلده گی ایلچیسی گوتم پیدیا، او مملکت حکومتی و خصوصی سکتورلری افغانستان ده کوپراق سرمایه یاتقیزیش و ایکله مملکت ارا تجارت علاقه لری یوکسلیشی باره سیده سعی و حرکت آلیب باره یاتگنی دن خبر بیریب، مملکتی افغانستان نی اقتصادی نقظهء نظردن ایاق اوستیده توره آلیشی اوچون یاردم کورستیشی ممکنلیگی نی تاکیدله دی:" اوشبو سیمنار دن اساسی مقصد هندوستان گه افغانستان نینگ صادراتی نی آشیریش عبارت. هندوستان بازارلری افغانستان نی ایاق اوستیده توره آلیشی اوچون کوپراق یاردم قیلیش گه قادر."

افغانستان نینگ امریکه و چین مملکتلریگه صادر ایتیله دیگن بیر قطار توارلری دن هم سالیق آلینمه یدی، اما هندوستان ایلک مملکت بولیب، افغانستان صادرات محصولاتلری دن سالیق آلیش نی توخته تیب قویگن.

افغانستان هندوستان بیلن پاکستان وایران بندرلری آرقه لی بیر بیریگه تجارت توارلرینی صادر ایته دیلر.

افغانستان تجارت رسمیلری گه کوره، افغانستان نینگ کوپچلیک تجارت توارلری پاکستان آرقه لی هندوستان گه صادر ایتیله دی، اما پاکستان هندوستان محصولاتلریگه اوز خاکی آرقه لی افغانستانگه وارد قیلیشگه رخصت بیرمه یدی.

سونگی ییللر دوامیده هندوستان افغانستان بازارلریده کوزگه کورینرلی درجه رول اوینب کیلگن. او مملکت افغانستان گه 2 میلیارد دن آرتیق دالر یاردم کورستگن. اوتگن ییلی هندوستان افغانستان ده سرمایه یاتقیزووچیلرنی جلب ایتیش مقصدی بیلن، اینگ کته کنفرانس نی میزبانلیک قیلگن ایدی.