"پاکستان ، استراتیژیک حجتی نی امضالش اوچون دییرلی همکارلیک قیلمه یاتیر"

افغانستان دولتی، پاکستان وافغانستان ارا اوزاق مدتلی همکارلیکلر کیلیشوو نامه امضالنمه ی قالگنی گه، پاکستان نینگ بو توغریده همکارلیک کورستمه یاتگنی سبب بولگنی نی ایتگن.

افغانستان تشقی ایشلروزیرلیگی رسمیلری، پاکستان افغانستان بیلن اوزاق مدتلی همکارلیکلر بیتیمی امضالنیشیده صداقتلی همکارلیک قیلمه ی، افغانستان نینگ بو خصوصده گی تکلیف و شرطلرینی نظرده توتمه ی یاتگنی باره سیده تاکیدله گنلر.

اولر گه کوره، پاکستان دولتی افغانستان بیلن امضاله گن ترانیزیت کیلیشوو نامه سی نی هم رعایه قیلمه یدی.

افغانستان اوتگن اوچ ییل جریانیده بیرقطار مملکتلر بیلن اوزاق مدتلی همکارلیکلر کیلیشوونامه امضاله دی. اما هنوزگچه اوزاق چیگره نی تشکیل ایتووچی قوشنی سی پاکستان بیلن همکارلیک حجت گه قول قویمه گن.

پاکستان بوندن بیر نیچه آی آلدین افغانستان بیلن اوزاق مدتلی همکارلیکلر حجت امضالشینی سوره گن ایدی، اما حاضر گه قدر افغانستان دولتی پاکستان نینگ اوشبو تکلیفی نی انبابتگه آلمه گن.

افغانستان تشقی ایشلروزیرلیگی سوزچیسی جانان موسی زی، افغانستان، پاکستان بیلن دوستلیک و هر تمانلمه همکارلیککه طرفدار، اما پاکستان تمانی افغانستان نینگ تکلیف و شرطلرینی نظرده توتیشی کیره کلیگی ضرور دییدی:"بیز هر دایم پاکستان بیلن اوزاق مدتلی همکارلیکلر کیلیشوو نامه امضالشگه راضیلیک بیلدیریب کیلگن میز. اما پاکستان تمانی بیز بیلن اولا تیروزیم گه قرشی کوره شده صداقتلی و عملی همکارلیک کورستیب، ایکله مملکت ارا ترانزیت کیلیشوونامه سی نی بوتونلی روشده تطبیق ایتیشی و پاکستانده گی افغان مهاجرلری نینگ تقدیری توغریسیده جدی قرار قبول قیلیشی کیره ک."

سونگی پیتلرده، افغانستان و پاکستان ارا سیاسی و اقتصادی علاقه لر تره نگلشیب کیتگن.

رسمیلرنینگ ایتیشیچه، پاکستان تیروزیم گه قرشی کوره شده افغانستان بیلن همکارلیک کورستگنی اورنیده، ایکی ییلدن بویان اوشبو مملکت نینگ چیگره حدودلرینی راکت بیلن نشانگه آلیب کیلماقده.

اوشبو مسله ایکله مملکت ارا جنجللرمیزانی نینگ آشیشی گه سبب بولیب، افغانستان تمانی هر دایم پاکستان نی افغانستانده تامینلنه یاتگن تینچلیک نی برهم اوره یاتگنلیکده عیبلب گن. لیکن، پاکستان بونی رد ایتیب کیلگن.

افغان رسمیلری، شوکیچه کونلرده پاکستان دولتی افغانستان نینگ چیگره حدودلریده ناقانونی حربی قرارگاه قوره یاتگنلیگی نی ادعا قیلگنلر.

افغانستان اوتگن اوچ ییل جریانیده، امریکا، فرانسه، آلمان، ایتالیا، هندوستان، ناروی، بیریتانیا و آستیرالیا مملکتلری بیلن اوزاق مدتلی همکارلیک لر کیلیشوو نامه امضاله دی.

بیرقطار تحلیلچیلر، ایکله مملکت ارا علاقه لر تره نگلیگی ده ی قاله ویرسه، اوزاق مدتلی همکارلیکلر حجتی امضالنمسلیگی ممکنلیگی نی ایتماقده لر.