نی تشکیلاتی: پلیس نینگ ژورنالیستلرگه نسبتا ناتوغری یانده شوو میزانی آشیب بارماقده

افغانستانده ايركين مطبوعات يا ژورناليستلرني حمايه ايتووچي ني اداره سي سونگي پيتلرده پوليس نينگ ژورناليستلر گه نسبتآ نا توغري يانده شووي ميزاني آشگني باره سيده اوز خواطريني اظهار ايتگن.

اوشبو اداره سي مسووللري، شونده ي يانده شوولر نينگ تيزآره ده آلدي آلينمه گنده، ژورناليستلرنينگ فعاليتي معما گه رو په ره بوليشي ممكنليگي حقيده آگاه لنتيرگنلر.

مذكور اداره، عين حالده، خوفسيزليك ارگانلريني بوحقده جدي همكارليككه چقيرگن.

افغانستان ايچكي ايشلروزيرليگي، يقين كيله جكده، ژورناليستلرگه اوتكزيله ياتگن تهديدلرني آلديني آليش، يانده شوولر تيكشيريليشي و ژورناليستلرگه معلومات بيريشگه ياردم بيرووچي بير مخصوص كميسيون تشكيل ايتيشي دن گپيرگن.

افغانستان ده ايركين مطبوعات و ژورناليست لرني حمايه ايتووچي ني اداره سي باشليغي صديق الله توحيدي، اوتگن بير هفته ايچيده پوليس تمانيدن ژورناليستلرگه قرشي سكيز ناتوغري يانده شوو عملگه آشيريلگني ني ايتدي.

توحيدي حنابلري، بوحقده تشويش بيليريب، خوفسيزليك اداره لريدن دايمي همكارليك طلب قيلدي. اونگه كوره، ژورناليستلرگه قرشي شوكبي ناتوغري يانده شوولر حاللري كوپه ييب بارگن حالده، اولر قنده ي بولمه سين سانسورگه دوچ كيليشلري ممكن": افغانستان ده اوتگن بير هفته دن كوپراق مدت ايچيده ژورناليستلرگه قرشي زوره وانليك لر ميزاني آشگن. شو هفته ده سكيزدن زياد زوره وانليك حالتي رويخطگه آلينگن بوندن ايكي حالتي ني ژورناليستلرنينگ جاني اويوشتيريلگن قوراللي هجوم تشكيل بيره دي. اوشبو مدتده انده سنده ژروناليستلرگه قرشي تهديد، كلتكلش وتوهين حالتلري كوزه يتلگن. بو مسله مملكت بويلب ژورناليستلرنينگ تشويشيگه سبب بولگن."

توحيدي، ژورناليستلرگه قرشي تهديدلر شوكبي عملگه آشيريليب كيته ويرگن تقديرده، ييل نينگ اداغيگچه زوره وانليكلر ميزاني جدي روشده آشيشي ممكنليگي حقيده آگاه لنتيردي.

عين حالده، افغانستان ايچكي ايشلروزيرليگي رسميلري، پوليس تمانيدن شوكبي يانده شوولرعملگه آشيريله ياتگني ني تصديقلب، بو خصوصده جدي تيكشروو آليب، اوني آْلدي ني آليش اوچون چاره تدبير كوريب چيقيشي باره سيده تاكيدله ديلر.

اوشبو وزيرليك سوزچيسي صديق صديقي نينگ ايتيشيچه، مذكور تدبيرده بيرمخصوص كميسيون تشكيل ايتيليب، ولايتلرده گي پوليس قوماندانلري گه هم ژورناليستلر بيلن توغري يانده شيليشلري اوچون دستور بيريليشي ممكن:" افغانستان ملي پوليسي سيزلرنينگ فعاليتلرينگيزني قوللب قوتله يدي. بيز، بو ييل بير نيچه نفر ژورناليستگه قرشي زوره وانليك و ناتوغري يانده شوو عملگه آشيريلگني دن افسوسده ميز. ايچكي ايشلروزيري بونده حادثه لرني قتيق قاره له دي و بوحقده ايچكي ايشلروزيرليگي ده بير كميسيون تشكيل ايتيليب، ژورناليستلرگه قرشي اوتكزيلگن برچه تهديدلر و زوره وانليكلرني جدي روشده تكشيره دي. بوندن باشقه، يقين كونلرده ايچكي ايشلروزيرليگي ولايتلرده گي برچه پوليس قوماندانلريگه ژورناليستلر ومطبوعات بيلن يقين همكارليكده بوليشلري اوچون بير دستور صادر ايته دي."

صديقي جنابلري، بوندن آلدين هم بو حقده بيرقطار تحقيقات وتيكشيروولر عملگه آشيريليب، حادثه ده عيبلنگن پوليسلرگه هم جزا بيريلگني ني ايتدي. او، كوپچيليك آدملر مطبوعاتگه معلومات بيريش توغريسيده ژورناليستلرگه همكارليك قيليش گه سعي و حركت قيلماقده بو همه گه آشكار دييدي او.

افغانستانده فعاليت كيله ياتگن ژورناليستلر، قطار معمالر گه رو په ره. دولت كوچلري دن تشقري قوراللي مخالفلر كوپينچه حالتلر ده ژورناليستلر اوچون كته تهديد حسابلنه دي. اوشبو مسله، ژورناليستلر نينگ پايتختدن تشقري ولايتلرده فعاليت قيله آلمسليكلري گه سبب بولگن.

سونگي بير هفته ايچيده بدخشان، تخار، هرات و فراه ولايتلريده بير قطار ژورناليستلر پوليس تمانيدن ناتوغري يانده شوو عملگه آشيريلگن.