قیرق کون جریانیده، کوکنارگه قرشی کورشه یاتگن 131 کیشی هلاک ایتیلگن

افغانستان حکومتی، جاری ییلده 131 کیشی کوکنار ایکن زارلری نینگ اورته دن ایلته یاتگن دولت خادم لری هلاک ایتیلگنی نی خبر قیلگن.

هلاک ایتیلگن لرنینگ کوپراغی ملی اردو، پولیس و دهقان لر دن عبارت بولگن.

کوکنار ایکن زارلریگه قرشی کوره شیش ریجه سی قریب 40 کون ایلگری، قندهار، هلمند و فراه ولایت لریده باشلنیب حاضر ننگرهار، لغمان و بادغیس گه دوام تارتماقده. و یقین کیله جگده مملکت شمالی حدود لریده هم بو ریجه عملگه آشیریلیشی ایتیلگن.

افغانستان رسمیلری گه کوره، اوتگن قیرق کون جریانیده قریب آلتی مینگ هکتاز زمین کوکنار ایکن زارلریدن پاکیزه لنگن. و ینه توقیز مینگ هکتار هم اورته دن ایلتیلیشی اوچون سعی و حرکت لرنینگ جریانی بار.

مخدره ماده لرگه قرشی کوره شیش وزیرلیگی نینگ اورین باسری محمد ابراهیم ازهر گه کوره، کوکنار ایکن زارلری نینگ اورته دن ایلته یاتگن افغان کوچلری طالبان تمانیدن هلاک ایتیلگن.

ازهر جنابلری، بو ریجه نینگ عملگه آشیریلیشی اوچون انچه قیین چیلیک لر بیلن یوزمه یوز ایکن لیک لرینی بیان ایتدی.

" سونگی وقت لرده ملی اردو نینگ همکارلیک قیلمس لیگی ملی پولیس کوچلری میزنینگ هم تشویشگه سالدی. چونکه، کوکنار ایکن زارلریگه قرشی عملیات یولگه قوییله یاتگن منطقه لرده، طالبان و دولت گه قرشی بیر قنچه گروه لر هم تیارگرلیک آلگن لر. بیز نیچه مرته و نیچه ییرده کتته قیینچیلیک لر بیلن دوچ کیلگن میز. سونگی مرته کاپیسا نینگ تگاب تومنیده کتته قیینچیلیک گه قالدیک ایندی امید بیلدیره میز که تگاب ده گی عملیاتی میزنی اوچ کون دن کیین ینگی دن کوچلی شکلده باشله ب نهایه سیگه ییتکزسک."

مخدره ماده لرگه قرشی کوره شیش وزیرلیگی نینگ اورین باسری شونگه قوشیمچه قیلیب، هوا نینگ ایسیقلیگی و طالبان نینگ کوچلی شکلده تیارگرلیک کورگن لری همده امریکا قوشمه ایالت لری یاردم لری توخته تیلیب قالگنی باعث، جاری ییلده گی کوکنار حاصلاتی کوپه یشیگه سبب بولگن دیب بیان قیلدی.

افغانستان حکومتی نینگ قیلگن تخمینی گه کوره، جاری ییلده 150 مینگ هکتار ییرگه کوکنار ایکیلگن. اما مخدره ماده لرگه قرشی کوره شیش وزیرلیگی یالغیزگینه 15 مینگ هکتار زمین نی کوکنار دن پاکیزه لش گه قادر. بو مسئله گه هم اساسی سبب افغانستان حکومتی گه کوچ و قوت آزلیگی دیب ایتیله دی.

کوکنار ایکیلگن هر بیر هکتار زمین دن، 45 دن تا 50 کیلو گرام تریاک ایشله ب چیقاریله دی. افغانستان و خلق ارا هم جمعیت مملکت لری نینگ کوکنار ایکن زارلری گه قرشی قیله یاتگن سعی و حرکت لریگه قرگنده، حاضر هم افغانستان دنیا نینگ 90 فایز مخدره ماده لری نینگ ایشله ب چیقاره دی.

رسمیلرگه کوره، دنیاده گی مافیا نینگ افغانستان مخدره ماده سیگه بولگن تاثیری باعث هر ییلی کوکنار ایکیلیش حالت لری کوپه ییب بارماقده.