افغان عياللري دنيا نينگ اينگ قدرتلي انسانلري رويخطي ده

Image caption رويا محبوب افغانستان ده گي انفرمه سيون تيخنه لاگيه يونه ليشيده ايس آليب بارووچي شركت نينگ ايلك عيال اجرايي رهبري دير.

افغانستانليك بيزنيس اومن و اي سي ايس سي كمپيوتر دستورلري ايشلب چيقه ريش شركتي اساسچيسي رويا محبوب امريكانينگ "تايم" ژورنالي ريتينگيده دنيا ده گي اينگ قدرتلي 100 ته آدمدن بيرته سي ديب تن آلينگن. ينه اوشبو موضوعگه عايد اينگ حيرتلنرليسي، رويا محبوب رويخطگه ايلك بار كيريتيلگني گه قره مه ي، "باشلاوچيلر" تصنيفيده 9 اورين ني ايللگب، يوقاري اونليككه كيريشگه موفق بولگن. رويا محبوب افغانستان ده گي انفرمه سيون تيخنه لاگيه يونه ليشيده ايس آليب بارووچي شركت نينگ ايلك عيال اجرايي رهبري دير. او 2009 ييلده هرات يونيورسيتيده "كمپيوتر فنلري" بوييچه بكه لورليك، آره دن ايككي ييل اوتيب ايسه، ماليزيا ده "انفرمه سيون تكنالوژي" ساحه سيده دكتورليم مقاميني قولگه كيريتگن. رويا محبوب اوزي نينگ كمپيوتر دستورلري ايشلب چيقه ريش و كنسلتينگ شركتيگه 2010 ييلده هراتده اساس سالگن. شركت 25 آدم ني ايش بيلن تامينله گن بولسه، اولردن اكثريتي ني خاتين ـ قيزلر تشكيل ايتيشه دي. اولر افغانستانده گي هرات ملازملري، حكومت وزيرلري و خصوصي شركتلرگه كمپيوتر دستورلري و معلوماتلر منبعي تيارلب بيريش بيلن شغللنيشه دي. رويا محبوب نينگ شركتي افغانستان عالي اوقوو يورتلريده 40 ته تيكين كمپيوتر صنفلريني آچيشي ني قصد قيلگن. انترنتگه امكانلي بولگن بو صنفخانه لرده 200.000 گه يقين طلبه زمانوي تكنالوژي بيلن تنيشيش و دنيا گه باغله نيش امكانيتيگه ايگه بوليشه دي. افغانستان و مركزي آسيا ليك عياللرنينگ فعال ليگي ني آشيريش مقصديده رويا محبوب فلم انيسك شركتي نينگ كومگي بيلن اومينس انيسك ويب صحيفه سيگه هم اساس ساله دي. خاتين ـ قيزلر بو ييرده صنعت، معارف، سپورت، بيزنيس و باشقه تورلي موضوعلرده گي يوريكنامه، ويديولوحه لر و بلاگلري بيلن اورتاقلشيشلي ممكن بوله دي. افغانستانليك او يوزگه يقين خاتين ـ قيز بلاگگيرلر هم او آوازلريني ايشيتتيريش و اوز ملكه لريني دنيا گه تنيتيش اوچون اوشبو منبردن فايده لنيب كيليشه دي. "تايم" ژورنالي نينگ " مشهور و همه ارداقله گن انسانلر" تصنيفيده ايسه، رويخط ني يقينده طالبان نينگ هجوميگه اوچره گن پاكستانليك 15 ياشلي فعال ملالي يوسفزي باشلب بيرگن.