رسمیلر: ملی اردو کوچلری سانی 2014 نچی ییلده 352 مینگگه ییتیب باره دی

افغانستان حکومتی کیله سی ایککی آی گه قدر حربی عملیات لرنینگ اوز ایلکه سیگه آلیشی اوچون تیارگرلیگی بارلیگی نی خبر بیرگن.

افغانستان مدافعه وزیرلیگی گه کوره، حاضر افغان حربی لری مملکت ده یولگه قوییله یاتگن عملیات لرنینگ 90 فایزینی رهبرلیک قیله دی.

حاضر افغان کوچلری مملکت نینگ 80 فایز توپراغی مسوولیتی نی اوز ضمه سیگه آلگن و جاری ییل ده مملکت بویلب خوف سیزلیک مسوولیتی نی رهبرلیک قیلیش اوچون تیارگرلیک کورماقده.

افغانستان مدافعه وزیرلیگی نینگ سوزچیسی جنرال ظاهر عظیمی، مخالف کوچلر نینگ تهدید لریگه قرگنده، افغانستان حربی لری کمیت و کیفیت نقیطه ی نظری دن انچه یوتوق لرگه ایریشگنینی بیلدیریب و جاری تهدید لرنینگ اورته دن ایلتیشگه قادر بولگنی نی ایتماقده.

عظیمی جنابلریگه کوره، افغان حربی لری حاضر هم تعلیم کورماقده و میلادی 2014 نچی ییل نینگ سونگی گه قدر، مذکور کوچلر سانی 352 مینگ گه ییتیب باریشی دن خبر بیردی.

" افغان کوچلری نینگ ظرفیتی اینیقسه ملی اردو نینگ کوچلنگنی وضعیت نی کنترول آستیده کیلتیریشی و تهدید لرنینگ اورته دن ایلتیشی اوچون هیچ قنده ی تردید یوق. بیز میلادی 2014 نچی ییلدن کیین 352 مینگ کیشی لیک بیر قوتیمیز بوله دی. و کوچلر 2014 نچی ییل نینگ سونگی گه قدر، کوچلی بولیب ظرفیت لری یوقاری کیته دی. مالی نقطه نظریدن 4 اعشاریه 100 ملیارد دالر هر ییلی مذکور کوچلر اوستیده صرفلنه دی. همده افغانستان مردمی نینگ حمایتی بیز بیلن بوله دی."

میلادی 2014 نچی ییل دن کیین افغانستان وضعیتی یمان تمانگه کیته یاتگن خواطرلرنی افغانستان مدافعه وزیرلیگی مخالف لر تمانیدن یولگه قوییلگن تبلیغ لرگه تیگیشلی دیشیب، افغان کوچلری هر کون اوتیشی بیلن ظرفیت لری کوتاریلیشی اوستیده تاکید له دی.

جنرال ظاهر عظیمی نینگ ایتیشیچه، طالبان گروهی حاضر افغان کوچلری بیلن یوزمه یوز اوریش قیلیش امکانیتیگه ایگه ایمس اما کوپراق مذکور گروه چیگره لی حدود لر گه هجوم اوییشتیریب ویا هم ترور قیلیش و عصیان چیلیک عمللریگه قول اوره دیلر.

عظیمی جنابلری نینگ مذکور سوزلریگه قرگنده، طالبان گروهی هنوز هم بیر قنچه ولایت لرگه قرشی هجوم یولگه قویه دیلر. بوندن بیر هفته آلدین فاریاب ولایتی نینگ قیصار تومنیده مذکور گروه هجوم اویشیتریب نیچه خوف سیزلیک پوسته و قشلاق نینگ اوز تصرف لریگه کیلتیردیلر.

بو هجوم عاقبتیده اونلب طالب و دولت حربی لری هلاک بولگنلیک لری ترقه تیلدی. حاضر هم فاریاب ولایتی نینگ قیصار تومنی وضعیتی یمان بیر حالت گه تورگنی ایتیله دی.

افغانستان مدافعه وزیرلیگیگه کوره، افغان کوچلری هنوز هم خارجی کوچلرنینگ تعلیم و تجهیز بولیم لریده گی یاردم لریگه احتیاج لری بار.