افغانستان مدافعه وزيری: قیصار وغورماچ تومنلریده خوف سیزلیک تامین لنگن

افغانستان مدافعه وزيري فارياب ولايتيگه سفرقيلگن. ايتيليشيچه، اونينگ اوشبو سفريدن اساسي مقصد، ولايت نينگ قيصار و غورماچ تومنلري وضعيتيني يقيندن تيكشيريش بولگن.

فارياب نينگ مذكور ايكي تومني نينگ ايريم قيشلاقلري سونگي ايكي هفته دوام ايتگن قوراللي جنگده طالبان نينگ تصرفيگه اوتگن ايدي.

مدافعه وزير، منطقه ده وضعيت برقرار ايكني ني معلوم قيلگن.

اما، فارياب بيرقطار اهاليسي هنوز هم بعضي بير حدودلر قوراللي طالبان نينگ تصرفيده ايكني ني ادعا قيلگنلر.

مملكت مدافعه وزيري بسم الله محمدي، قوراللي طالبان تصرفيدن قيته ريب آلينگن قيصار و غورماچ تومنلري نينگ ایریم قیشلاق لری خوفسيزليك وضعتيني تيكشيريشدي. اونينگ ايتيشيچه، افغانستان دشمنلري هوا ايسيب باريشي بيلن اوز هجوملريني شدتلشتيريشگه حرکت قيليب، دولت گه شكست ييتماقچي.

او، قيصا ر وغورماچ تومنلري وضعيتي حقيده بونده ي ديدي: "بيز اوتگن كون غورماچ ني كوريب چيقديك، برچه منطقه لر عمومآ طالبان تصرفيدن تازه لنگن. خوفسيزليك كوچلري قيته دن اوز قرارگاه لريگه قيتگنلر. بونگه بيز بيلن منطقه گه سفر قيلگن دركچيلر گواه. هم قيصار و هم غورماچ ده وضعيت برقرار".

محمدي جنابلريگه كوره، افغان خوفسيزليك كوچلري حاضر گي كونده كوچ و قوتگه ايگه بوليب، قوراللي مخالفلرنينگ هر قنده ي هجوملريگه جواب بيريشگه قادر.

او، خاجي كوچلرنينگ بوندن 8 آي آلدين فارياب دن چيقيب، خوفسيزليك مسووليت لرني افغانستان كوچلري گه تاپشيرگنليگي گه قره مه ي، مملكت خوفسيزليك كوچلري اوزلري يكه ليكده مملكت ني مدافعه قيليش امكاني گه ايگه ايكني ني ايتدي.

او، قوراللي مخالفلر ناتو كوچلري نينگ فارياب دن خوفسيزليك مسووليتيني ترك ايتگن دن سونگ، مذكور منطقه لرني قوله يليك بيلن تصرف ايتيش اميديده هجوم قيلگنلر دييدي. اونگه كوره، منطقه لر قيته ريب آليش مقصديده عملگه آشيريلگن عمليات جريانيده قوراللي مخالفلرگه آغير تلفات ييتكزيلگن.

او، فارياب اهاليسي گه، قوراللي مخالفلر قيته دن هجوم اويوشتيريش امكانيگه ايگه بولمسليگي حقيده ايشانچ بيردي.

فارياب ولايتي قيصا ر وغورماچ تومنلري نينگ 12 قيشلاغي سونگي ايكي هفته ايچيده روي بيرگن اوروش جريانيده قوراللي مخالفلرنينگ تصرفيگه اوتگن ايدي. ايريم خبرلرگه كوره، حاضر هم بعضي بير محل لر طالبان تصرفيدن تازه لنمه ي قالگن.

محل مسووللري، مخالفلرنينگ آلغه سيلجيشلريگه، محلي پوليس قوماندانلريدن بيرقطاري طالبان بيلن علاقه اورنه تيب، اوز قرارگاه لريني اولرگه تسليم بيرگنلري سبب بولگني ني ايتگنلر. مذكور عملياتده، يوزلب اهالي اوز اوي جاينلريني ترك ايتيشگه مجبور بولگنلر.