افغان مقاملری: ایران پلیسی، افغان ایشچیلریگه قره ته اوق آچگن

افغان مقاملریگه کوره، نا قانونی چیگره نی کسیب اوته دیگن اون نفر افغان ایشچی، ایران چیگره قوریقچیلری تمانیدن اوققه توتیلگن. مقاملرنینگ ایتیشلریچه، ایشچیلردن بیر نیچه ته سی اولیب یره لنگن.

اما، محلی مسووللر تلفات لر باره سیده انیق حسابات یوقلیگینی ایتگنلر.

فراه ولایتی نینگ مرکزی کسلخانه رییسی عبدالجبار شایق نینگ بی بی سی گه معلوم قیلیشیچه، ایران چیگره پلیس قوریقچیلری تمانیدن نشانگه آلنیب یره لنگن شخصلر، کسلخانه گه آلیب کیلینگن:" کسلخانه گه آلیب کیلینگن شخصلرنینگ 20 یولداشی هلاک بولگن."

اما افغان ایشچیلری نینگ هلاک ایتیلگن خبری، مستقل منبع لر تمانیدن حاضرگه قدر هم تصدیق لنمه گن.

فراه ولایتی نینگ ولایت حاکمی سوزچیسی عبدالرحمان ژوندی، بیرنیچه نفر یره لنگنینی تصدیق لب، بیراق یره لنگن لردن انیق رقم، یوقلیگینی ایتگن.

فراه، ایران نینگ سیستان و بلوچستان منطقه لری بیلن چیگره داش بولیب، ایریم افغان ایشچیلری فراه ولایتیدن ناقانونی شکلده ایرانگه قره ب اوتیش اوچون بو یولنی تنله یدیلر. شونینگ دیک، بو یول آرقه لی کوپ سانده مخدر ماده ایران گه قاچاق ایتلیشی ایتیله دی.

میلادی 2012 ییل نینگ دسامبر آیده، اسلام قلعه اهالیسی هراتده ناراضیلیک نمایش یولگه قوییب، ایران چیگره پلیس قوریقچیلری تمانیدن 13 افغان نشانگه آلنیب هلاک بولگنینی ایتگندی، همده نمایشچیلر ایران نینگ هرات شهریده گی قونسیلگرلیگی بناسیگه هم هجوم اویشتیردی.

اما ایران مقاملری، نمایشچیلر ادعالرینی رد ایتیب، 13 افغان نینگ ایران توپراغیگه اوتگنی باره سیده هیچ قندی حجت یوق لیگینی تاکیدله گندی.