عیاللرگه قرشی زوروانلیکلر آلدینی الیش قانون لایحه سی قرشی لیککه سبب بولدی

افغانستان اولوسي جرگه سي اوزي نينگ شنبه كونگي عمومي ييغينيده عياللرگه قرشي زوره وانليكلر ني توسووچي قانون لايحه سي ني تصديقلشده موفق بوله آلمه دي.

لايحه نينگ تصديقلنمه گنليگي گه، نماينده لر ارا اونينگ تفصيلاتي باره سيده پيدا بولگن قرمه قرشيليك لر سبب بولگن.

اوچ ييلدن بويان عملگه جاري قيلينيب كيلگن حامدكرزي نينگ عياللرگه قرشي زوره وانليك لرني توسووچي قانون باره سيده گي تقنيني فرماني، حاضر گه كيليب، اونينگ تصديقلنيشي اولوسي جرگه نينگ عمومي ييغينيده بحثگه آليندي، اما وكيللر ارا پيدا بولگن قره مه قرشيليكلر، اونينگ تصديقلنمسليگيگه سبب بولدي.

افغانستان جمهور رييسي بوندن اوچ آلدين اوزي نينگ بير تقنيني فرمانيده، عياللر گه قرشي زوره وانليكلر ني توسووچي قانون لايحه سي ني تصديقله گن ايدي، اما اولوسي اعضالري جمهور رييس نينگ فرماني ني اعتقاداتلر و اسلام احكتملريگه قرشي ديب، اصلاحات كيريتيشگه احتياجي بارليكي ني ايتگنلر.

عين حالده، نماينده لرعياللرگه قرشي زوره وانليكلر ني توسووچي لايحه تصديقلنيشي باره سيده تورلي خيل فكر بيلديريب، اوني تصديقله مه گنلر.

اولوسي اعضاسي عبدالستار خواصي، اوشبو قانون لايحه سي اساسي موضوع صفتيده اولوسي جرگه نينگ عمومي ييغينيده بحثگه آلينيشي كيره كليگي ني تاكيدله دي.

خواصي جنابلري گه كوره، افغانستان جمهور رييسي، شريعت گه قرشي قانون ني امضاله گني ني انيقلشتيريليشي كيره ك. اونينگ ايتيشيچه": ارگ سرايي ميني حيرتگه سالدي، شريعت گه قرشي قانون ني جمهور رييس نيمه ديب امضاله گن؟ اوزي( حامدكرزي) اساسي قانون ني امضاله گني دن سونگ، اونين آلتي ماده سي الله نينگ كلامي گه ضد ايكنليگي ني باره سيده فرمان صادر ايته دي".

اما نماينده لردن بيرقطاري نينگ تاكيدلشيچه، عياللر گه قرشي زوره وانليك ني توسووچي قانون لايحه سي،اولوسي جرگه عمومي ييغيني نينگ اساسي بحث موضوعيگه آلينيشي كيره ك.

كابل اهاليسي نينگ اولوسي جرگه ده گي نماينده سي فرخنده زهرا نادري، نماينده لردن بيرقطاري عياللرگه قرشي زوره وانليكلر ني توسووچي قانوني ني تصديقش لايحه سي ني مجلس نينگ ايش دستوري دن آليب چيقه ريش اوچون، بيرقطار وكيللرنينگ امضاسي ني ييغيشتيرديلر، اما نتيجه بيرمه دي، دييدي.

خانم نادري گه كوره، نماينده لر دن بيرقطاري، مجلس نينگ عمومي ايش دستوريده قانون تصديقلنيشيگه لايحه كيريتليشي گه قرشيليك بيلديرگنلر، لايحه عياللر تمانيدن ايشگه سالينيشي ريجه لشتيريلگن ايدي، و قانون نينگ ماده لري ايرككلرنينگ فكر و انديشه لري منفعتيگه داير اوزگرتيريليشي ممكن ايدي.

نهايت، اولوسي جرگه رييسي عبدالروف ابراهيمي، عياللر ايشلري بوييچه كميسيون گه، عياللرگه قرشي زوره وانليكلر ني توسووچي قانون لايحه سي ني مجلس نينگ عليحده وي 18 كميسيونلريده بحثگه آليب، كميسيونلر رييسلري تمانيدن اصلاحات كيريتيلگني دن سونگ، عمومي ايش دستوريگه يوباريليشي باره سيده دستور صادر قيلدي.

اما افغانستان عياللر وزيرليگي، اوشبو قانون نينگ بحث و اوزگريشگه احتياجي يوقليگي ني ايتگن.

عياللر وزيرليگي معاوني مژگان مصطفوي نينگ بي بي سي گه معلوم قيليشيچه، اوشبو قانون اوچ ييلدن بويان عملگه جاري قيلينيب، افغانستان برچه محكمه لري عياللر گه قرشي زوره وانليكلر نينگ دوسيه لري توغريسيده قانون ني ايشگه سالگن.