تخارده طلبه لرنینگ درس تشلش اعتراضی دوام ایتماقده

اوشبو نمايش واعتراض دن اساسي مقصد، زوره وان شخصلر تمانيدن تخار بيليم يورتي گه قره شلي كميده 800 جريب يير نينگ باسيب آلينگنليگي دن عبارت بولگن.

اعتراضچيلرنينگ ايتيشيچه، جنجلگه ايلنگن ييرلر گه عايد شرعي حجتلر بيليم يورتده موجود بولگني گه قره مه ي، دولت ملازملري زوردن باسيب آلينگن ييرلرني قيته ريب بيريشگه هيچ قنده ي جدي بير حركت آليب بارمه گنلر.

تخار بيليم يورتي گه قره شلي ييرلرني زوره وان شخصلر تمانيدن باسيب آلينيشي ينگي بير مسله بولمه گن، بوندن آلدين هم بو توغريده قطار جنجللر پيدا بولگن ايدي. اوشبو ييرلر كيملر تمانيدن باسيب آلينه ياتگني، خوفسيزليك مسله لر باعث، فاش ايتيلمه ي قالگن.

عين حالده، نمايشچيلر، دولت مسووللري، اوشبو معماني تيز آره ده برطرف ايتيشده جدي اعبتار قره تمه گن تقديرده، ولايت بويلب كينگ نمايشلرگه قول اوريشلري ممكنليگي باره سيده آگاه لنتيرماقده لر. بوحقده اولردن بيري" اون ييلگه تحصيل دن محروم ايتيلسك ميلي، سيلرنينگ حقلرينگيزني حمايه قيليشگه حركت ايته ميز، خيانتكارلرگه قرشي كوره شه ميز، اولر اوزاق زماندن بيري ضعيفلرني باستيريب كيگنلر"دييدي احمدالله اسملي اوشبو شخص.

حاضر مذكور محل ده استقامت شهرچه لر قوريلگن، او ييرگه ايريم خوفسيزليك مشكللرباعث، باريش قيين تويله دي. تمانلر ارا پيدا بولگن تارتيشوولر، محل ني جوده هم خوفگه سالگن.

تخار ولايت رسميلري ايسه، مسله حلي اوچون، مخصوص بير كميسيون تشكيل ايتيليشي باره سيده قرار قبول قيلديلر. اولر، تشكيل ايتيلگن مذكور كميسيون معما ني يقين كوزه تيب، اونينگ حلي اوچون تيزكار عمل قيليشي ممكنليگي ني تاكيدله ماقده لر.

اما، نمايشچيلرگه كوره، مذكور كميسيون معما گه ايچيم تاپيشگه قادر بولمه ي، بوندن آلدين هم دولت تمانيدن جنجللرني حل قيلاووچي شوكبي كميسيونلر ايجاد ايتيليب، هيچ قنده ي ايجابي نتيجه بيرمه گن.

حاضر گي كونده تخار بيليم يورتي ده كميده 3 مينگ طلبه تحصيل قيلماقده لر، اولردن يريمي ايسه، درس تشلشگه قول اورگنلر.

بيليم يورت 1840 جريب يير حدوديده قوريلگن، اما اوشبو يير دن كميده 8 يوز جريبي جنجللي بوليب، حاضر گه قدر حل ايتيلمه ي قالگن.