ایران ده روی بیرگن ترافیک حادثه ده افغانستان اولوسی جرگه بیراعضاسی هلاک بولدی

افغانستان اولوسی جرگه سی نینگ ایکی اعضاسی هرات اهالیسی نینگ اولوسی جرگه ده گی وکیلی شهناز همتی نینگ ایرانده روی بیرگن ترافیک حادثه سیده هلاک بولگنی نی تصدیقله دی.

احمد بهزاد نینگ بی بی سی گه ایتیشیچه، خانم همتی اوتگن کون ایرانگه سفر قیلیش چاغیده موتری توقنه شیب، هلاک بولگن.

اونگه کوره، اوشبو حادثه افتیدن مشهد ـ تهران قتناو یولی آقیمیده روی بیرگن.

هرات وکیلی نینگ ایتیشیچه، خانم همتی نینگ یقینلریدن بیری اونگه مذکور حادثه ده باشقه بیرقطار یولداشلری جمله دن اونینگ تورموش اورتاغی هم یره لنگنی نی ایتگن.

هرات ولایتی اهالیسی نینگ ینه بیر نماینده سی محمد رضا خوشک وطن پرست، خانم همتی عایله اعضالریدن بیری، اونگه مذکور سفر ده اونینگ ایریدن باشقه تورت نفری هم موجود بولیب، اولر هم تن جراحتی آلگنی نی معلوم قیلگنینی ایتدی.

خوشک جنابلریگه کوره، خانم همتی نینگ ایری کوماگه کیتیب، مشهد کسلخانه لریدن بریده یاتقیزیلگن.

احمد بهزاد گه کوره شهناز همتی بوندن بیر نیچه وقت آلدین فرزندلریدن بیرینی دوالش اوچون ایران وهندوستان گه سفر قیلیب، بو بار هم فرزندی نی دوالش مقصدیده ایران گه سفر قیلماقچی ایکن.

محمد رضا خوشک وطن پرست نینگ ایتیشیچه، خانم همتی نینگ جنازه جسدی بوگون ایران دن هراتگه آلیب کیلینیشی ممکن.