جنرال دانفورد: افغانستان یوتوقلری خطرگه رو په ره

ناتو نینگ افغانستانده گی کوچلری باش قوماندانی جنرال جوزف دانفورد نینگ بی بی سی گه ایتیشیچه، اوشبو مملکت مهم یوتوقلرگه ایریشگن، اما حاضر گه قدر یوتوقلر استوار ایمس.

دانفورد جنابلری اوتگن فبروری ده ناتو کوچلری قوماندانلیگی مسوولیتی نی قولگه آلگنی دن سونگ اوتکزگن ایلک صحبتلریدن بیریده، دنیا جماعه چیلیگی کیله سی ییلده حربی ماموریتلریدن اوز باسیملریگه دوام ایتدیرمه گن تقدیرده، افغانستان خلق ایرکینلیگی و عیاللر حقوقی ساحه سیده ایریشگن یوتوقلرینی قولدن بیریشی ممکنلیگی نی ایتدی.

ناتو کیله سی هفته ایچیده اوزی نینگ افغانستان ده گی خوفسیزلیک مسوولیتی نی بوتونلی روشده اوشبو مملکت کوچلریگه تاپشیره دی.

ناتو کوچلری باش قوماندانی آلمان حربیلرینی اوچره شیش مقصدیده، شو ییل نینگ آخریگچه خوفسیزلیک مسوولیتی مملکت کوچلریگه تاپشیریلیشی کوتیله یاتگن شمالی قندوز گه سفر قییلگن.

میلادی 2014 ییل نینگ اداغیگچه اینگ آخرگی خارجی عسکرلرافغانستان نی ترک ایتیشی ممکن.

افغانستان خوفسیزلیک کوچلری مملکت خوفسیزلیک مسوولیتی نی اوز ذمه سیگه آلیش گه تیارگرلیک آله دی. اما جنرال دانفورد بو آلغه سیلجیش کیسکین و کفالتلی ایمس دییدی.

جوزف دانفورد: "بیز 2014 ییل ایمس، 2018 ییل حقیده اویله شیمیز کیره ک. اوشبو بیش ییل دوامیده یوتوقلرنی دایمی سقله شیمیز اوچون ییترلی درجه لی فرصتگه ایلگه بوله یلیک".

دانفورد جنابلری: "بیز آی سونگی گچه مملکت بویلب خوفسیزلیک نی تامینلش رهبرلیگی نی افغان کوچلریگه تاپشیره میز، اوتگن اون ییل ایچیده قولگه کیریتیلگن یوتوقلرنی سقلب قالیش اولرنینگ ملکه سی".

ناتو باش قوماندانی گه اوشبو یوتوقلردن بیر قسمی قولدن کیته دی دیب اویله ی سیزمی؟ دیگن سوالگه "بله؛ قولدن کیتیشی ممکن. بو پیتگچه بیز قطار آلغه سیلجیشلرگه ایریشدیک، لیکن بولر بهری بیر دایمی سقله نیش باسقیچیگه ییتمه گن میز" دیدی.

اونینگ ایتیشیچه،اولر بو مسله گه کیله سی 18 آیده جدی اعتبار قره ته دی. او، طالبان بیلن مذاکره زمانی مساعد می دیگن سوال گه" بو جنگ سیاسی یوللر بیلن نهایه تاپیشی کیره ک" دیدی.

ناتو قوماندانی نینگ تاکیدلشیچه، افغانستان خلقی مملکت گه قیته دیگن شخصلر بیلن موافقلشووی کیره ک.