"يوزلب قوراللي طالب نورستانگه هجوم اويوشتيريشگه تيارگرليك آلگن"

نورستان ولايتي امنیت مسووللري يوزلب قوراللي طالبان كامديش و برگمتال تومنلريگه قرشي هجوم اويوشتيريشده تيارگرليك آلگني دن خبر بيرگنلر.

نورستان واليسي تميم نورستاني نينگ بي بي سي گه ايتيشيچه، كميده بيرمينگ قوراللی طالب كامديش و برگمتال تومنلريني تصرف ايتيش اوچون هجوم گه تيارگرليك كورگن. والي نينگ ايتيشيچه، طالبان ني هجوم اويوشتيريشده پاكستان استخبارات تشكيلاتي رهبرليك قيلماقده.

والي ، منطقه ني هجوم دن اسره ب قاليش اوچون ايكي يوز محلي پوليس هم محل گه جونه تيلگن، اما او اوشبو كوچلر ييترلي ايمس وكابل هم بو خصوصده اعتبار سيز قالمه يدي دييدي.

او شونينگ ديك، قوراللي طالبان ايكي ييلدن بيري كامديش و برگمتال ني تصرف ايتيشده سعي و حركت آليب بارماقده لر، ليكن موفق بوله آلمه گن دييدي.

نورستان حاکمی نینگ ادعا قیلیشیچه :" ايندي حاضر پاكستانليك طالبلر محل گه كيليب، اهالي و قوراللي طالبان ني كامديش ني تصرف ايتيش اوچون جنگ گه ترغيبله ماقده و اولرگه پول هم ترقه تيب بيرگن."

اونگه كوره، اولر هم اوشبو هجوم ني باستيريشگه تيار.

نورستان رسميلرنينگ ايتيشيچه، اولر افغان كوچلريني شونده ي بير كته چپاول ني آلديني آليش باره سيده آلديندن خبردار قيليب قويگنلر.

اوتگن ييللر ايچيده كامديش و برگمتال تومنلري گه قوراللي طالبان بار بار هجوم اويوشتيرگنلر و اوشبو تومن لر گاهي هم طالبان نظارتيگه اوتيب و دولت قيته دن عمليات اوتكزيب، اولرني تصرف ايتگن.

مذكور تومنلر نينگ پاكستان گه يقين بولگني ،اوييردن قوراللي جنگريلرنينگ تيز تيز هجوم اويوشتيريشگه سبب بولماقده.