توكيو كنفراسيده بيريلگن وعده لرنينگ تطبيقي، كابلده تيكشيريله دي

Image caption دنيا همجمعتي بوندن بير ييل آلدين مقدم ميلادي 2015 ييلگچه افغانستان گه اوزي نينگ ناحربي ياردمي دن 16 ميليارد دالر كومك قيليشي ني وعده قيلگن ایدی.

افغانستان ني ياردم قيله ياتگن مملكت لر، افغانستان نينگ اوتگن كنفرانسلرده بيرگن وعده لري عملده تطبيق ايتيش ميزاني ني كوزه ته ديلر.

اوشبو ييغين چهارشنبه 21 سرطان كابلده اويوشتيريليب، اونده ييتميش دن آرتيق مملكت، ايلچيخانه، نماينده ليك و افغانستان رواجلنيشي اوچون ياردم كورسته ياتگن تشكيلاتلر قتنشگنلر.

دنيا همجمعتي بوندن بير ييل آلدين مقدم ميلادي 2015 ييلگچه افغانستان گه اوزي نينگ ناحربي ياردمي دن 16 ميليارد دالر كومك قيليشي ني وعده قيلدي، اما افغانستان اونينگ عوضيده حكومتدارليكده كينگ شكلده اصلاحات كيريتيشي ني وعده قيلگن ايدي.

افغانستان اداري و مالي فساد گه قرشي كوره ش، انسان حقلري اينيقسه، عياللر حقوقي تامينلنيشي و يخشي حكومتدارليك و قانون حاكميتي ني جاري قيليشي ني دنيا همجمعتي گه ايتگن ايدي.

بوندن تشقري، ميلادي 2014 ييلده مملكت بويلب جمهور ريسليك و 2015 ييلده پارلمان سيلاولريني شفاف اوتكزيشگه زمينه يره تيش همده مملكت ماليوي تيزيمي استوار رواجلنيشي باره سيده هم قطار وعده لر بيرگن.

كابلده چهار شنبه كونگي ييغينده، دنيا هم جمعيتي نماينده لري هم افغانلرگه ياردم وعده لري عملي بوليشي باره سيده گزارش بيريشي ممكن.

كنفرانس ني ميزبانليك قيله ياتگن افغانستان ماليه وزيري عمر زاخيلوال، دنيا هم جمعيتي تمانيدن عملگه آَشيريلگن ياردملردن خرسند چيليك بيلديريب، افغانستان دولتي جمهور رييسليك سيلاولري شفاف اوتكزيليشي گه تيارگركورگني ني ايتدي، او شونينگ ديك، اداري فساد گه قرشي كوره شده هم قطارآلغه سيلجيشلر عملگه آشيريلگني باره سيده تاكيدله دي.

ييغينده، بيرلشگن ملتلر تشكيلاتي نماينده سي يان كوبيش هم افغانستان دولتي دن اداري و مالي فساد گه قرشي جدي كوره ش آليب باريشيني سوره ب، عياللرگه قرشي زوره وانليك ني توسه ديگن قانون تيزراق تصديقلنيشي و سيلاولر شفاف بوليب اوتيشي كيره ليگي ني ايتدي.

مذكور ييغينده گي بيرقطار خارجي ديپلماتلرنينگ بي بي سي دركچيسي هارون نجفي زاده گه، افغانستان دولتي نينگ اداري ومالي فساد گه قرشي كوره ش ساحه سيده آليب بارگن حركتي دن بولمه گنليكلريني ايتگنلر. جاپان دپلماتلريدن بيري، دولت بو توغريده ييترلي درجه ده ايش قيلم گن ديگن.

خلق ارا شفافيت اداره سي نينگ ييلليك گزارشيگه كوره، افغانستان دولتي شونينگ ديك فساد گه بوتگن دنيا مملكت لريدن بيري حسابلنه دي.

شوبيلن بيرگه، خلق ارا عفو تشكيلاتي، كابلده گي ييغين اشتراكچيلريدن افغانستانده اهالي گه عدالت بيلن تامينلنيشي تيزلشتيريليشي ني سوره دي.

اوشبو تشكيلات افغانستان دولتي نينگ توكيو ييغينيده عياللرنينگ عدالت گه ايريشيشي حقيده گي وعده لريگه اشاره قيليب، اشتراكچيلردن عدالت تامينليشي گه كته اهميت بيريشي ني سوره دي.

خلق ارا عفو تشكيلاتي افغانستان انسان حقلري مستقل كميسيوني نينگ بي طرفليگي گه نسبتآ جدي تشويش بيلديريب، ييغين اشتراكچيلريدن هم بو مسله ني تيكشيريشي ني سوره گن.

سونگي ده افغانستان جمهور رييسي حامدكرزي، بيرقطار سابق جهاد اعضالريني انسان حقلري كميسارلري صفتيده تعينله دي.

باشقه تماندن، افغانستان نينگ تحليل و آگاه لنتيريش گروهي، دولت دن خارجي كوچلرنينگ مملكت ني ترك ايتگن سونگ، اهالي تشويشيني انيق استراتيژي بيلن برطرف ايتيشي ني سوره گن.