حكومت: بوندن كيين انجو يا نا دولت تشكيلاتلر فعاليتي قتيق نظارت ايتيله دي

افغانستان حكومتي بوندن كيين مملكتده گي برچه انجو يا نا دولت تشكيلاتلر فعاليتي ني قتيق نظارت ايتيشيني نظرده توتگن.

افغانستان اقتصاد وزيرليگي، اون ييلدن آرتيق مدت ايچيده اوشبو موسسه لر كته مقدارمبلغ لرني صرفلب، كوزگه كورينرلي خذمتلرني بجرمه گنليگي ني تنقيد ايتگن.

حاصرگي كونده، ايكي مينگ گه يقين ايچكي و كميده اوچ يوز ته خارجي نادولت تشكيلات يا موسسه افغانستان ده فعاليت يوريه ياتگني ايتيله دي.

اونلب انجو يا نادولت تشكيلاتلرنماينده لري و افغانستان نينگ بيرنيچه دولت اداره لري مسووللري كابلده ييغيليب، اوتگن اون ييلدن آرتيق مدت ايچيده نادولت تشكيلاتلرنينگ مملكت ده عملگه آشيرگن فعاليتلريني تيكشيروو آستيگه آلگنلر.

افغانستان حكومتي، اوتگن بيردهه ايچيده بيرقطار نادولت موسسه لر ايريم ساحه لرده بير آز يخشي فعاليت يوريتيب، ثمره لي ايشلرني بجرگنلر، اما انجولردن بيرقطاري دولت اداره لري بيلن علاقه ده بولمه ي، ياردملرني صرفلشده هم اوز باشيمچه عمل قيلگني ني ايتماقده.

مملكت اقتصاد وزيري عبدالهادي ارغنديوال، موافق سيزليك لر حكومت نينگ اقتصادي لايحه لري عملده اجرا ايتيليشيده ضعيف بولگني، كته مقدار ده گي مبلغ لرنينگ قولدن كيتيشيگه سبب بولگني ني تاكيدله يدي:"اوتگن اون ييل دواميده افغانستانگه بيريلگن كته مقدار مبلغ لرگه قره گنده، هيچ بير لايحه ده سرمايه ياتقيزيلمه گن. بيز افغانستانده بير مينگ آدم دوامدار ايش تاپيب ايشلب تورگن بيرار پروژه ميزبولسه، يوق. برچه لايحه لر قيسقه مدتلي بوليب، شو پاليسي لر اساسيده ايشلب كيينگن. بيز اوتگن اون بير ييل ايچيده اساسي خذمتلرني بجرگن ده ايديك، خارج دن برق كيلتيريشگه احتياجيميز يوق ايدي. افسوس كه بيز بونده ي ايشلرني عملگه آشيره آلمه ديك، وبونگه افغانستان دولتي نينگ اقتصادي لايحه لريده نقصان بارليگي هم ايته آله من".

اقتصاد وزيرليگي، نادولت تشكيلاتلرنينگ اكثريت خادملري يوقاري معاش بيلن متخصصلرنامي آستيده خارجدن افغانستان گه كيليب، ايچكي ياش ايشچي و كار فهيم شخصلرنينگ اورينيني ايگلله گنلر ديدي. ارغنديوال جنابلري بوندن كيين مذكور شخصلرنينگ افغانستان گه قيله ديگن سفري جدي نظارت ايتيليشي ممكنليگي ني تاكيدله دي.

اما، اقتصاد وزيرليگي ده گي انجو لر اداره سي رييسي سيد هاشم بصيرت، نادولت تشكيلاتلرنينگ عملگه آشيرگن ايش فعاليتلريدن راضيليك بيلديريب، كيچيك نادولت تشكيلاتلر و خلق ارا كته تشكيلاتلرنينگ اورته سيده فرق قايل بوليش كيره ك دييدي:"اكثرآ كته پروژه لر انجولرگه بيريلمه يدي، كيچيك و اورته چه پروژه لر انجولرنينگ اختياريگه قوييله دي. كته پروژه لر شرطنامه لردن عبارت، شرطنامه انجولرگه تيگيشلي ايمس. يوللر ني قوريش وباشقه كته پروژه لرنينگ خرجتي توغريدن توغري تونرلري تمانيدن توله نيله دي. خلقيميز انجولر و خلق ارا شركتلر يا تشكيلاتلرنينگ اورته سيده گي فرق ني بيلمه يديلر. هر گاهي كه بير يول ويران بولسه، اوني انجو اسفالت قيلگن دييديلر، حال بوكه يول ني انجو قورمه يدي".

عين حالده، اهالي دن بيرقطاري نادولت انجو يا موسسه لرنينگ ايش فعاليتي، دولت تمانيدن اساسي شكلده نظارت قيلينمه گني ني تنقيد ايتيب، اولرنينگ عملگه آشيرگن خذمتلري اهالي اوچون قانيقرلي بولمه گني ني ايتماقده لر. مزارشريف اهالي سيدن سيد عبدالناصر انجولر اوتگن اون ييل دواميده هيچ قنده ي اساسي ايشلرني بجرمه گن دييدي.

افغانستان اقتصادي وزيرليگي نينگ حساباتيگه كوره، حاضرگي كونده ايكي مينگ گه يقين ايچكي انجو يا نادولت تشكيلات و كميده اوچ يوز خارجي نادولت تشكيلات افغانسانده فعاليت آليب يوريتماقده.