مدافعه وزیرلیگی: تلفاتلر میزان جاری ییلده آشگن

افغانستان مدافعه وزيرليگي جاري ييل ني قانلي و آغير ييل بوليشي ممكنليگي ني ايتيب، بو ييلده اوتگن ييلگه نسبتآ جنگ و تلفات لر ميزاني آشگن. اوشبو وزيرليك اوروش و هجوملرميزاني آشگنيگه، خوفسيزليك مسووليتلر اوز پايانيگه ييته ياتگني و سيلاولر كيريب كيليشيده قوراللي مخالفلر افغانستان دولتي گه باسيم اوتكزيب، و پاكستان دن بيرتعداد جنگريلر كيله ياتگني ني سبب قيليب كورستگن. مدافعه وزيرليگي شونينگ ديك، جمهور رييس كرزي نينگ فرماني گه اساسآ، ايسكي قورال اسلحه لرني قيته توزه تيش ايشي باشلنگني ني ايتيب، بونينگ يانيده بيرتعداد توپ و تانك لرهم قيته توزه لگني ني معلوم قيلگن. مذكور وزيرليك رسميلري، اردو صفيگه عياللرني جلب ايتيش ده هم معما گه روپه ره ايكنليكلريني تاكيدله گنلر. افغانستان ملي مدافعه وزيرليگي رسميلري جنگلر و هجوملرميزاني آشگنيگه، قورالي مخالفلر افغان كوچلريگه خوفسيزليك مسووليتلر تاپشيريلگني دن سونك، كيله جك سيلاولرده حكومت گه قتيق باسيم اوتكزيش ايكني ني سبب قيليب كورستماقده لر. مدافعه وزيرليگي سوزچيسي جنرال ظاهر عظيمي كابلده بير خبري انجمنده، پاكستان چيگره سي دن جنگريلرنينگ كيريب كيليشي، هجوم و اروروشلرنينگ شدتلنگني گه باعث بولگيني ني ايتدي:" افغانستان دشمنلري جاري ييلده برچه امكانلر دن فايده لنيب، يورت واهالي گه قرشي هجوم اويوشتيرگنلر. خودكش هجوملر و پارتلشلر، يوزلب هجومچي دن تشكيل ايتيلگن گروهي هجوملرفارياب، سنگين و وردوج كبي جايلرده عملگه آشيريلدي. اما ملي اردو و ملي پوليس دشمن نينگ برچه مقصدلريني بيكار قيليشگه قادر بولدي". ظاهر عظيمي شونينگ ديك، گرچه موسم جنگ جاري ييل اوز نهايه سيگه ييتمه گن، ليكن افغان خوفسيزليك كوچلري جنگريلر گه قرشي اوروش آْليب باريشگه قادر بوليب، خوفسيزليك مسووليتلرني اوز ذمه سيگه آليب سيلاولر خوفسييزليكي ني يكه ليك بيلن تامينله يدي دييدي او. جنرال عظيمي، جمهور رييس كرزي نينگ فرماني دن كيين، افغان اردوسي اوچون ايسكي قورال اسلحه لرو حربي تانكلر ني قيته توزه تيش ايشلري باشلنگن و حاضرگه قدر بيرقطار روسي تانكلر و توپلر شامل بيرتعداد قورال اسلحه لرهم توزه تيلگني ني معلوم قيلدي:"جمهور رييس نينگ دستوري گه بنآ، ملي اردونينگ ايسكي آغيرقورال اسلحه لري ني توزه تيش ايشلري باشلنگن. اولر تي 62، تي 55 و تي 54 تاتكلردن عبارت. شونينگديك بي ايم 21 ، 14 ميل ديسي توپلر، وباشقه لر شامل". افغانستان جمهور ريسي، بوندن بير نيچه آي آلدين ملي مدافعه وزيرليگي گه احتياجگه بنآ، بيرتعداد ايسكي قوراللر و تانكلر ني توزه تيشگه گه دستور بيرگن ايدي. اولرني توزه تيشده 60 ميليون دالر اجره تيلگن ايدي. اما حربي تحليلچي اسدالله والواليجي ايسكي قوراللر و تانكلر ني توزه تيش، فايده لي ايمسليگي ني تاكيدله ماقده. اونگه كوره، مذكور قوراللر و حربي جهازلر حاضرگي زمان ده گي هيچ بير قورال و جهاز لريگه برابر بولمه ي، افغانستان دولتي، اولرني توزه ته ياتگني دن مقصد، دنيا جماعه چيليگي اينيقسه امريكا ني، ملي اردو كوچلري ني آغير قوراللر بيلن جهاز لمه گن تقديرده، شو قوراللردن فايده لنيب، خوفسيزليك ني تامينلشگه قادر بوليشي ممكنليگي باره سيده آگاه لنتيرماقچي، دييدي او. اونينگ ايتيشيچه، ناتو 2014 ييلده افغانستان ني ترك ايتگن ده، اوز قورال جهاز لري عصيانچيلرنينگ قوليگه توشمسليگي احتماليدن قورقيب، اولرني افغانستان دولتي گه بيرمسليگي ممكن. افغانستان مدافعه وزيرليگي، اوتگن آي خوفسيزليك مسووليتلر رهبرليگي افغان كوچلريگه تاپشيريليب، كيله سي ييل خارجي كوچلرنينگ حربي ماموريتي اوز پاياني گه ييتيشي بيلن، برچه خوفسيزليك مسووليتلر اوشبو كوچلرنينگ ذمه سيگه يوكلنيشي حقيده سوز كيته ياتگن بيرپيتده، اظهارات بيلديرماقد.