افغانستان 2014 ييل ده گي اقتصادي خواطرلرني برطرف ايتيش اوچون ينگي لايحه ايشلب چيققن

اوشبو لايحه كيله سي 2014 ييلده روي بيره ديگن احتمالي تهديدلر و اهالي خواطريني برطرف ايتيش، همده سرمايه گذارلرني سرمايه ياتقيزيشگه ترغيبلش اوچون ايشلب چيقيلگن. مذکور لایحه اساسیده سرمایه یاتقیزه دیگن لرگه تیکینگه ییر بیریلیشی هم قید ایتیلگن.

مذكور لايحه اوتگن كون ماليه و تجارت وزيرلري تمانيدن اوتيش دور ده افغانستانده سرمايه ياتقيزووچيلرني ترغيبلش اوچون اقتصادي عالي كينگشي ييغينيگه تقديم ايتگن.

اوشبو لايحه ده، كيله سي ايكي ييلده افغانستان ده سرمايه ياتقيزه ديگن شخصلرگه تيكينگه يير، ييتي ييل ساليق توله مسليك، اوزاق مدتلي قرض و تجارت بوييچه ويزه بيريليشي قيد ايتيلگن.

"اوتيش دوري دير، تشويشلر پيدا بولگن. بيز بير طرف دن اهالي تشويشي ني برطرف ايتيب، باشقه تماندن سرمايه گزارلرني اوز ساغه لريميز بيلن تشويق و ترغيبلنتيرماقچي ميز" دييدي افغانستان تجارت وزيري.

جمهور رييسليك اداره سي تمانيدن نشر ايتيلگن بيرخبرنامه ده كيلتيريليشيچه، اقتصادي عالي كينش ييغيني وزيرلر، دولت اداره لري و سرمايه ياتقيزووچيلر نماينده لري نينگ اشتراكيده جمهور رييس كرزي نينگ باشچيليگيده اوتكزيليب، اونده اهالي نينگ كيله جككه نسبتآ، تشويشي ني برطرف ايتيش اوستيده بحث يوريتيلگن.

افغانستان ماليه و تجارت وزيرلري تمانيدن ايشلب چيقيلگن لايحه ده 2013 و 2014 ييللريده سرمايه ياتقيزووچيلر اوچون تورلي بوليملرده قوله يليك يره تيش و اولرني جلب ايتيش و سرمايه وايش زمينه لري قولدن كيتمسليگي اساسي مقصد قيليب كورستيلگن.

خبرنامه ده، شونينگ ديك، اقتصادي لايحه ده صنعت، قوريليش، زراعت، رواجلنيش، صادرات و كانلر دن عبارت بولگن بيش اساسي مقصد كيريتيلگني ايتيلگن.

افغانستان اقتصادي عالي كينگشي ده شونينگ ديك، اقتصاد و ماليه وزيرلري مذكور لايحه نينگ ايشي بير هفته ايچيده نهايي بوليب عملده تطبيق ايتيليشي تاكيدلنگن.

تجارت وزيري انور الحق احدي نينگ بي بي سي گه ايتيشيچه، مذكور لايحه دن مقصد، سرمايه ياتقيزووچيلرني ميلادي 2013 و 2014 ييللرده تشويش و ترغيب ايتيش دن عبارت بوليب، لايحه اقتصادي عالي كينگشي نينگ تصديقي دن اوتيب، ميلادي 2015 ييلگچه هم اوزه يتيريليشي ممكن.

احدي جنابلري گه كوره، مذكور لايحه ده ميلادي 2014 دن 2015 ييلگچه روي بيره ديگن احتمالي تهديدلر قمره ب آلينيشي ممكن.

افغانستان تجارت و صناعت اتاقي معاوني خان جان الكوزي نينگ بي بي سي بيلن اوتكزگن صحبتيده، افغانستان دولتي اوتگن ييللرده سرمايه ياتقيزگنلرگه امتياز بيريشي كيره ك ايدي، اما بيرمه گن دييدي.

اونگه كوره، دولت نينگ ينگي سرمايه گزارلرني حمايه ايته ياتگني، آلدينگي سرمايه ياتقيزووچيلرنينگ خفه بوليشي گه سبب بوله دي.

الكوزي جنابلري، خصوصي سرمايه گذارلرنينگ برچه تكليف لري دولت تمانيدن قبول قيلينگن، اما دولت نينگ خصوصي بوليم سرمايه گذارلرني حمايه ايتيشي ني خوش قرشيلب، دولت بيرگن وعده لريني عملده تطبيق ايتيشي ني اميد قيله ميز دييدي.