افغانستان ملي خوفسيزليك كينگشي، هراتده خوفسيزليك يامانلنگنيدن تشويش بيلديرماقده

Image caption هرات ده سونگي پيتلر وضعيت يامانلنگني، اهالي نينگ تشويشيگه هم سبب بولگن

افغانستان جمهور ریسلیک سرایي تمانیدن نشر ایتيلگن خبرنامه ده كيليتريليشيچه، ملی خوفسیزلیک کينگشی، هراتده خوفسيزليك وضعيت يامانلنيشي آلديني آليشگه جدی چاره تدبیر کوریيب چيقيليشي باره سيده مملکت حربی کوچلریگه بويروغ صادر قيلگن. معلوماتلرگه کوره، حاضرگي كونده هرات ولایتی بیر قطار اولوسواللیک لریده اونلبچه ناقانونی قوراللی گروه لر فعالیتي آليب باره ياتگني محل اهاليسي نينگ تشويشيگه سبب بولگن.

هرات ولايتي برچه حدودلري نينگ خوفسيزليك مسووليتي بوندن آلتي آي مقدم افغان خوفسيزليك كوچلري گه تاپشيريلگن. هرات خوفسيزليك اداره مسوللري خوفسيزليك ني تامينلشده ييترلي درجه ده امكانيت موجودايكنليكي ني تاكيدلب كيلگني گه قره مه ي، ولايت اهالي سي اوز خوفسيزليكلري تامين ايمسليكلري باره سيده تشويش بيلديريب كيلماقده. هرات ولايت كينكشي رييسي سيد قتالي" هرات تومنلريده گي كيچيك مخالف گروه لرنينگ موجودليگي بيز ني تشويشگه سالمه يدي، بلكه زمانوي قورال اسلحه بيلن جهاز لنگن اوچ يوزگه يقين قوراللي گروه ني بيزني تشويشلنتيرگن. اولرنينگ هر بيرگروهي ده مخصوص ماين توزه تيش فن اوسته لري موجود. ماين و پارتلاوچي ماده لرقيردن اولرنينگ اختياريگه قويليب، قوييليمسليگي بيلمه ي ميز. هراتده باشقه ولايتلرگه نسبتآ خوفسيزليك كوچلر ساني آز بولگني گه قره مه ي، قوراللي مخالف گروه گه قرشي كوره شيش قابليتيگه ايگه. اما حكومت مخالف گروه لرگه قرشي كوره شيش ده هيچ قنده ي اراده كورستمه يدي و حربي كوچلري هم اولرگه قرشي كوره ش ده ييرلي درجه ده صلاحيت بيريلمه يدي" دييدي قتالي. افغانستان جمهور ريسي نينگ ملي خوفسيزليك بوييچه مصلتچيسي ددادفر رنگين سپنتا نينگ ايناغه سي بوندن بيرنيچه آلدين كرخ تومنيده آتيب اولديريلگنيدن سونگ، هرات خوفسيزليك وضعيتي مملكت خوفسيزليك ملي كينگشيده محاكمه ايتيلماقده. بو ولايت محل رسميلري، حاضرگي كونده ولايت ده 50 گه يقين ناقانون قوراللي گروه فعاليت آليب باره ياتگني ني ايتيب، اولردن بيرقطاري تينچليك جريانيگه قوشيليشگه رغبت كورستگنيدن خبر بيرماقده لر. هرات امنيه قومانداني رحمت الله صافي، حاضرگي كونده هراتده ساني 1300 نفرگه ييته ديگن قريب 47 تورلي طرفه ناراضي گروه لر فعاليت يوريته ياتگني دن خبربيردي، اما هرات حاكمي، تينچليك عالي كينگشي و ايريم خوفسيزليك اداره مسووللري، مذكور گروه لرني تيننچليك جريانيگه ترغيبلش ايشلري دوام ايته ياتگني ني تاكيدله ماقده لر. هرات امينه قومانداني شونينگ ديك، ناراضي گروه لردن 64 نفرليك بير گروهي تينچليك جريانيگه قوشيليشگه رغبت كورستگني باره سيده اميد بيلديردي. هرات ده سونگي پيتلر وضعيت يامانلنگني، اهالي نينگ تشويشيگه هم سبب بولگن. وضعيت ني عادي حالتگه قيتيريش و بونگه حق يوللرني قيديريش اوچون، ولايت كينگشي ده محل مسووللري، قوم آق سقاللري، سياسي همده مدني فعاللرنينگ اشتراكي بيلن ييغين اوتكزيلدي. ييغينده، معما ايتيليشي اوچون محلي حاكميت اوزي نينگ قوليده گي برچه امكانلردن فايده لنيشي ممكنليگي هم تاكيدلندي.