اجتماعي ترماغلرعادی حیات جریانیگه قنچه تاثیر قالدرماقده؟

Image caption "ني" اداره سي اجتماغي ترماغلر مملكت ملي تقويمي و شونينگديك بيرلشگن ملتلر خلق ارا تقويمي گه كيريتيليشي گه سعي و حركت آليب باره ماقده.

اوتگن ييل عين شو هفته افغانستانده ايركين مطبوعات ني حمايه ايتووچي "ني" اداره سي تدبيري بيلن شو نامگه قوييلدي. "ني" اداره سي اجتماغي ترماغلر مملكت ملي تقويمي و شونينگديك بيرلشگن ملتلر خلق ارا تقويمي گه كيريتيليشي گه سعي و حركت آليب باره ماقده. اوشبو اداره مسووللري، اوتگن ييل انترنت اجتماعي ترماغلر مشتريلر افغانستانده آشيب، فقطگينه فيسبوك مشتريلري ساني اوتگن ييلگه نسبتآ اوچ برابر آشگني ني دن خبر بيرگنلر.

بوندن بير نيچه آي آلدين كابل شهريده بير پوليس منصبداري ترافيك خادمي ني كلتكله گن ويديوسي فيسبوك صفحيه سيده نشر ايتيلگني، مينگلب فيسبوك مشتريلري نينگ قتيق تنقيدي گه سبب بولدي. فيسبوكدن فايده لنووچي افغان لرنينگ تنقيدي ايرته سي كون ايچكي ايشلر وزيرليگي كلتكله گن شخص ني حبسگه آليب، مذكور شخص اونلب رسانه آرقه لي اوز قيلميشي باره سيده عذر سوره شي گه هم سبب بولدي.

افغانستانده روي بيريب اجتماعي ترماغلرده چيقه ديگن بونده ي واقعه لر كوپ اوچره يدي.

بوگونگي كونده افغانستانده ياشلردن اكثريتي اجتماعي ترماغلر اينيقسه فيسبوككه كيريب، فكر و ملاحظه لري، تنقيد، هزل و تورلي طرفه موضوعلرني عكس ايتديرمافده لر. اولر دنيا آدملري بيلن تنيشيب، فكر المشتيره ديلر.

افغان ياشلريني اوزيگه جلب فيسبوك ترماغيده سياسي، اجتماعي، اقتصادي و مدني موضوعلر عكس ايتديريليب، قيزغين بحث لر گه ايله نيب كيلينماقده. فيسبوكدن فايده لنووچيلرگه كوره، اجتماعي ترماغ لردن آدملر هر خيل يعني ايجابي وسلبي فايده لنه ديلر.

ايريم حالتلرده سلبي فايده لنيش و قلبكي صحيفه آچيشلر، بيرقطار آدملر نينگ تشويشيگه هم سبب بولگن، اما عمومآ آليب قره گنده، يخشي تمان يامان تمانيگه كوره، كوپراق.

شو مناسبت بيلن بوگون ايركين مطبوعات ني حمايه ايتووچي ني اداره سي هم كابلده اجتماعي ترماغلر هفته سي نينگ ايكينچي ييلليگي ني نشانله دي. ني اداره سي تمانيدن، اوتگن بير ييل جريانيده عملگه آشيرگن حساباتگه كوره، اجتماعي ترماغلر دن فايده لنووچيلر ساني كوزگه كورينرلي درجه گه آشگن.

ني موسسه سي رييسي مجيب خلوتگلر، فيسبوك دن فايده لنووچي لر ساني اوتگن ييلگه نسبتآ كميده اوچ برابر كوپه يگن دييدي.

اكت: ني اداره سي اوتگن ييل بير حسابات اوتكزگن ايدي، اونده اجتماعي ترماغلر دن بيري بولگن فيسبوك صحيفه سي دن 2 يوز و 50 مينگ افغانستانليك فايده لنووچي موجود ايدي. حاضر شو رقم 750 مينگ نفرگه ييته دي. بو اوزي اجتماعي ترماغلرنينگ رواجلنيب باره ياتگني ني كورسته دي. و فايده لنووچيلرساني كوندن كونگه آشه دي.

افغانستان ده اجتماعي ترماغلردن فايده لنووچي لر ساني حقيده انيق حسابات موجود ايمس، اما مسوول شخصلر، فيسبوك و تيويتيردن بولك، آدملر يوتوب و گوگل ترماغلريدن قيزيقيب فايده لنه ياتگنليگي ني ايتماقده لر.

اوتگن ييل ني اداره سي، رسمي شكل ده افغانستان دولتي و بيرلشگن ملتلر تشكيلاتي دن اجتماعي ترماغلر هفته سيني رسمي تقويم گه كيريتيشي ني سوره گن ايدي. اما حاضر هنوز گچه هيچ بير تقويم گه كيريتيلمه گن.