بدخشانده اون طالب اولیب یره لنگن

بدخشان ولايتي نينگ خوف سيزليك مسؤل لريگه کوره، طالبان و افغان امنيتي كوچلراره سيده یوزبيرگن توقنه شوولرده كميده 10 طالب اوليب يره لنگن.شونینگ دیک بیرافغان عسکری هم مذکور توقنه شوولرده هلاک بولگنی تصدیق لنگن.

بدخشان ولايتي نينگ ولايت حاكمي سوزچي سي عبدالمعروف راسخ بي بي سي بيلن بولگن صحبتیده بو عمليات تناون كيچه ساعت سكيزاطرافيده ارغنچخواه تومني نينگ شيوه دیب اتلگن منطقه سيده يولگه قوييلگني ني معلوم قیلدی.

شونينگ ديك اونگه كوره عمليات كيچه ساعت بير اطرافيگه چه دوام تارتيب نتيچه ده 4 طالب هلاك ينه 6 طالب يره لنگن،شونگه قوشيمچه قيليب راسخ جنابلري عمليات جريانيده افغان امنیتی کوچلریدن بیرعسکر هلاک و ایکی عسکر یره لنگنینی تصدیق له دی.

محلي ملازم لرگه كوره، يولگه قوييلگن عملياتده عادي اهالي گه قندي ديرضرر ييتمه گن.عينی دمده طالبان گروهي بو باره ده حاضرگه چه مناسبت بيلديريمه گن.

ايتيليشچه اوتگن کیچه هم بدخشان ولايتي نينگ يفتل تومنيده طالبان عصیانچیلریگه قرشی يولگه قوييلگن حربي عمليات جريانيده 4 طالب هلاك وایکی طالب يره لنگدي.

بدخشان ولايتي تاغلي منطقه لردن عبارت بولیب چين ، تاجيكستان و پاكستان اولكه لري بيلن چيگره داش.شو اوچون هم مذکور ولایت نینگ ایریم حدودلریده طالبان عصیانچیلری نینگ فعالیتی آشیب باره یاتگنی ایتیله دی.

رسمي معلومات لرگه كوره بوندن تشقري بوولايت نينگ بعضي حدود لريده بنگي وار ماده لر قاچاق چي لري هم انچه فعال بوليب حتي عصیانچی گروه لر اولرتمانیدن مالی یاردم بولیب کیلینه یاتگنی ادعا قیلینه دی.