بیرلشگن ملتلر تشکيلاتی: افغانستانده عادی اهالی تلفاتی ميزاني آشیب بارماقده

بیرلشگن ملتلر تشکیلاتی نینگ افغانستان ده گي وکالتخانه سی تمانیدن ترقه تیلگن حساباتده، جاری ییل نينگ اولگي آلتی آیي ني اوتگن ییل نینگ عینی زمانی بیلن سالشتیرگنده، عادی اهالی تلفاتی ميزاني 23 فایزگه آشگنی معلوم قیلینگن.

حساباتده یازیليشیچه، جاری ییل نینگ اولگي آلتي آييده یوزبیرگن نابرقرارلیکلرده کمیده 1300 تینچ فقرا قربان و 2500 کیشی یره لنگن. تلفات نینگ يیتمیش ایکی فایزیگه عصیانچیلر مسوول صفتيده قيد ايتيلگن.

عین حالده، تشکیلات اوز حساباتیده بو رقم میلادی 2012- ییل نینگ عین زمانیده 16 فایزگه آشگنینی معلوم قیلگن.

شونینگ دیک، تلفات نینگ توقیز فایزیگه افغانستان حکومتی عیبدارایکنی تاکیدلنگن.

بیرلشگن ملتلر تشکیلاتی نینگ افغانستانده گی وکیلی یان کوبیش، یوزبیریب کیله یاتگن ناقرارلیکلرده اهالی تلفاتی آلدی آلینیشینی طلب قیلگن.

ترقه تیلگن حساباتده، تلفات نینگ 35 فایزیگه یول چیککه سیده اورنه تیلگن ماینلر پارتلشي سبب بولگنی ایتیلگن. شونینگدیک اهالی تلفاتی آشیشیگه افغان امنیتی کوچلری و طالبان عصیانچیلری آره سیده یوزبیرگن توقنه شوولر، ایککینچی عامل قيليب کورسه تیلگن.

باشقه تماندن حساباتده، حکومت نینگ نا دولت خادملرینی نشانگه آلیش حاللری هم ارتیب باره یاتگنیدن خواطر بیلدیریلگن.

بیرلشگن ملتلر تشکیلاتی نینگ انسان حقلری بویيچه اداره سي مسوولی جورجتی گگنن 2013 – ییلده عیاللر و باله لر تلفاتی ميزاني آشگني، اوروش نینگ شدت له نیب باره یاتگنی دن دلالت بيره دي دیب فکر بیلدیردی:" 2013 – آلتی آیی اولیده عیاللر و باله لر تلفاتی 38 فایزگه آشگن، بوایسه افغانستانده دوام ايتيب کیله یاتگن اوروش نی شدت له نیب باره یاتگنی ني کورسه ته دی."

حساباتده قيد ايتيليشيچه، اوتگن آلتی آي دوامیده 160 خاتین قیز یول چیککه سیگه اورنه تیلگن ماین پارتلشي نتیجه سیده قربان بولگن و 241 خاتین قیز هم یره لنگن. بو ايسه اوتگن ییلگه قره گنده، 61 فایزگه آشگنینی کورسه ته دی. همده حساباتده، جاری ییل آلتی آی اولیده 231 باله قربان بولگنی معلوم قیلینگن. طالبان عصیانچیلری بیرلشگن ملتلر تمانیدن نشرايتيلگن مذکور حسابات نی رد ایتگنلر.