افغانستان دولتي: تيرورچيليك هجوملرآرتيده خارجي قولي بار

Image caption افغانستان ملي خوفسيزليك اداره سي اوزي نينگ بير خبرنامه سيده، رمضان آييده اونلب تيرورچييك هجوملر بيكارقيلينگني دن خبر بيرگن

افغانستان نينگ شرقي حدوديده جايلشگن جلال آباد شهريده عملگه آشيريلگن پارتلشده اون آلتي كيشي جراحتلنگن. اوتگن كون عين شهرده صادر ايتيلگن هجوم ده هم، اونلب انسان اوليب يره لنگندي.

عين دمده افغانستان ملي خوفسيزليك اداره سي اوزي نينگ بير خبرنامه سيده، رمضان آييده اونلب تيرورچييك هجوملر بيكارقيلينگني دن خبر بيرگن

شنبه و يكشنبه كونلري افغانستان نينگ پاكستان بيلن چيگره داش بولگن ننگرهار ولايتي ده ايكي قانلي حادثه صادر ايتيلدي. اوتگن شنبه كونگي خودكش هجومده 9 كيشي تينچ اهالي حياتي يوقاتدي و 21 كيشي جراحتلندي. بو هجوم، هندوستان نينگ جلال آباد شهريده گي قونسلي قرشي سيده عملگه آشيريلدي. هجومده قونسلي يانيده جايلشگن مسجد ده گي قران اوقووچي باله لر قربان بولگني ايتيلگن.

اما بوگون صادر قيلينگن پارتلشده ننگرهار محكمه سي رييسي عبدالقيوم نشانگه آلينگن. بو پارتلشده محكمه رييسي شامل ايكي باله ، ايكي عيال؛ بير هيداوچي و اونينگ ايكي قوريقچيسي تن جراحتي آلگن.

سونگي هفته ده ولايت نينگ شيرزاد تومنيده هم دولت و قوراللي طالبان اورته سيده روي بيرگن توقنه شووده اونلب آدم قربان بولگني حقيده خبر قيلينگن ايدي.

جلال آباد ده ايكي كون ايچيده كيتمه كيت ايكي پارتلش صادر ايتيلگني و تينچ فقراگه تلفات ييته ياتگني، او ولايت اهاليسي ني خواطرگه سالگن. اما دولت ايسه، بو هجوملر قه ييرده تشكيللشتيريله ياتگني ني بيز تيكشيره ميز دييدي. تشقي ايشلروزيرليگي سوزچيسي جانان موسي زي"بو وحشيليك تيرور هجوملر آرتيده خارجي قوللر بارليگيگه ايشانه ميز. اولر تيروريزم ني انديشه وي و مالي جهتدن حمايه قيليب، تيروزم دن بير واسطه صفتيده فايده لنه ديلر. بونگه هيچ قنده ي شبهه يوق. بو هجوملر قه ييرده و كيم تمانيدن تشكيلشتيريلگني و تيرورچيلر قيسي يولدن افغانستانگه كيريب كيلگني باره سيده تحقيقات دوام ايتماقده".

باشقه تماندن، افغانستان جمهور رييسليك اداره سي، صادر ايتيلگن ايكله حادثه ني قارلب، بونده ي هجوملر ممكلت دشمنلري تمانيدن پلانلشتيريله ياتگنيني ايتگن.

افغانستان ايچكي ايشلر وزيرليگي هم مذكور هجوم ني، منطقه حمايه چيلري همكارليگيده بجريلگن طالبان نينگ فتنه سي ديه توصيفله گن. اما طالبان ايسه، هندوستان قونسلي قرشي سيده صادر ايتيلگن هجوم مسووليتي ني تن آلمه گن.

عين دمده افغانستان ملي خوفسيزليك اداره سي رمضان آييده كابل و قندهار ولايتلريده اويوشتيريليشي مولجللنگن ايكي كته تيرورچيليك هجوم ني موفقيتليك بيلن بيكار قيلگني دن خبر بيرگن. بو اداره شونينگ ديك، پارلمان، ماليه وزيرليگي، ملي خوفسيزليك اداره سي و كابل سيرينا هوتلي گه هم اويوشتيريله ديگن هجوملرنينگ آلدي آلينگني حقيده خبر نامه نشر ايتگن. خبرنامه ده تيرورچيلرنينگ شونگه اوخشه گن باشقه اونلب تيرور فعاليتلري بيكار قيلينيب، اولردن بيرقطاري قولگه آلينگني قيد ايتيلگن.