جلال آباد شهريده گي پارتلشده اون آلتي كيشي جراحتلندي

افغانستان شرقي حدوديده جايلشگن ننگرهار ولايت رسميلري، بوگون صادر ايتيلگن پارتلشده ولايت محكمه سي رييسي وباشقه اون بیش کیشی تن جراحتي آلگني ني ايتگنلر،یره لنگن لر آره سیده عیاللر وباله لرهم بارلیگی ایتیلماقده.

ننگرهار حاكمي سوزچيسي احمد ضيا عبدالزي، عبدالقيوم بوگون ايرته لب ايش جاييگه كيته ياتگن چاغده جلال آباد شهري نينگ شرقي ساحه سيده گي تورت يول ده موتريگه قرشي هجوم اويوشتيريلگني ني تيلگه آلدي.

ننگرهار حاكمي سوزچيسي، اوزاق دن باشقريلاوچي اوسكونه بيلن پارتله تيلگن مذكور ماين دن مقصد ننگرهار محكمه سي رييسي بولگني ني ايتگن.

مذكور حادثه ده ايكي باله وايكي عيال هم يره لنگنلر. ننگرهار محكمه سي رييسي نينگ هيداوچيسي و ايكي قوريقچيسي هم تن جراحتي آلگن.

جلال آباد شفاخانه سي داكترلري يره لنگنلردن تورته سي جمله دن عبدالقيوم نينگ احوالي آغير ايكنليگي دن خبر بيرگنلر.

بو هجوم، هندوستان نينگ جلال آباد ده گي قونسلي قرشي سيده روي بيرگن خودكش هجوم دن بيركون كيين، روي بيرماقده.

مذكور هجوم ده كميده 9 نفر تينچ اهالي هلاك و 21 نفر يره لنگن. جمهور رييس كرزي اداره سي تمانيدن نشر ايتيلگن اعلاميه گه كوره، قربان لردن اكثريتي مسجدده قرآن اوقي ديگن باله لر بولگن.

كرزي جنابلري اوتگن كونگي هجوم ني قاره لب، اوني افغانستان دشمنلريگه نسبت بيرگن.

ايچكي ايشلروزيرليگي مذكور هجوم ني منطقه حاميلري همكارليگيده بجريلگن طالبان نينگ فتنه سي ديه توصيفله گن. اما طالبان ايسه، هندوستان قونسلي قرشي سيده صادر ايتيلگن هجوم مسووليتي ني ايلكه سيگه آلمه گن.