غزني ده تورمه دن آزاد ايتيلگن طالبلر، جنگ ميدانيگه قيتيشماقده لر

Image caption غزني ولايت حاكمي معاوني محمد علي احمدي طالبان نينگ قوييب يوباريليشي ني تنقيد ايتيب، بو مسله مملكتده گي اوروش نينگ دوامي گه سبب بولگني ني ايتماقده.

غزني محل ملازملري، او ولايت نينگ تورمه لريدن آزاد قيلينگن محبوس طالبلرنينگ اكثريتي قيته دن صفيگه قوشيله ياتگني ني ايتگنلر. سونگيده بير محبوس طالب بگرام قماقخانه سيدن آزاد ايتليب، خارجي لرگه قرشي اوروش ده نابود بولگني مسله سي، خارجي كوچلرنينگ تنقيديگه سبب بولگن. كابل ـ قندهار ترانسپورت قتناويولي آقيميده جايلشگن غزني ولايتي ده سونگي قوراللي مخالفلرنينگ فعاليتي آشگني ايتيله دي. افغانستان تورمه لريده قنچه طالب سقلنه ياتگني حقيده انيق معلومات قولده ايمس.، اما اوشبو محبوسلردن بير قطاري آزاد ايتيلگندن سونگ، قيته دن آلدينگي قرارگاه لريگه قيتيشه ياتگني ايتيلماقده.

غزني ولايت حاكمي معاوني محمد علي احمدي طالبان نينگ قوييب يوباريليشي ني تنقيد ايتيب، بو مسله مملكتده گي اوروش نينگ دوامي گه سبب بولگني ني ايتماقده. احمدي جنابلري، ولايت برقرارليگي ني برهم اوره ياتگن جنگريلردن اكثريتي، تورمه لردن آزاد قيلينگن طالبان دن عبارت دييدي:" بير كيشي بگرام تورمه سيدن تينچليك كينگشي نينگ واسطه چيليگي بيلن آزاد ايتيلدي، او بوندن آلدين بير بار غزني تورمه سيده و كيين ايسه بگرامگه آليب كيتيلدي. بگرام دن قوييب يوياريلگني دن طالبان گه قوشيليب، خارجي لرگه قرشي جنگ قيلدي، جنگ ده نابود بولدي، خارجي لر اونينگ جسدي ني غزني گه آليب، بو آدملرني سيزلر قيسي بير حجت ودليل اساسيده آزاد ايته سيزلر ديدي. بو بيز اوچون صادقانه ايتسم، كونده ليك معماگه ايلنگن".

عزني ولايت معاوني، ايريم حالتلرده، طالبان نينگ باسمي آستيده گي قوم آقساقاللري و علما كينگشيلري محل ملازملريدن طالبان نفرلريني آزاد ايتيليشيني سوره ب كيلماقده دييدي:"افسوس كه بونده ي قوييب يوباريشلر و يا هم اولرنينگ آزادليگي اوچون فرمان صادر ايتيشلر، اوزي جنگ ني كوچه يتيريب، اوروش نينگ دوام ايتيشيگه سبب بوله دي. تورمه لردن آزاد ايتيلگن بو شخصلر نينگ قيته دن اوروش ميداني گه باره ياتگني، باشقه لرني هم ترغيبله يدي. حكومت مخالفلر وطالبان گه قرشي كوره شيشده جدي اراده گه ايگه ايمس".

كابل ـ قندهار قتناو يولي آقيميده جايلشگن غزني ولايتي، اهالي سي نينگ ايتيشيچه، سونگي ده ولايت ده خوفسيزليك وضعيت يامانلشگن. اوتگن ايكي هفته ايچيده مذكورشهرده ايكي تيرور حادثه سي عملگه آشيريلگن. غزني محل ملازملري، تينچسيزليكلر ميزاني آشيب باره ياتگني ني تصديقلب، تورمه لردن قوييب يوباريلگن طالبلردن اكثريتي حاضرگي كونده بير نيچه تومنده افغان و خارجي كوچلر گه قرشي جنگ قيليشه ياتگني ني ايتماقده لر. كوپچيليك آدملر حكومت نينگ طالبان ني صلح جرياني گه ترغيبلش اوچون اولرني قيته دن آزاد قيليش سياستي ني تنقيد له ايتيشماقده لر.