قبرستانده روی بیرگن پارتلشده 14 کیشی قربان بولگن

ننگرهار ولایتی نینگ غنی خیل تومنیده گی قبرستان لردن بیریده یوزبیرگن ماین پارتلشی عاقبتیده محلی رسمیلرگه کوره، 7 عیال و 7 باله قربان بولگن، هلاک بولگنلر سابق جهادی قوماندانلردن بیری نینگ یقینلری بولگنی ایتیله دی.

ننگرهار ولایتی نینگ ولایت حاکمی سوزچیسی احمدضیا عبدالزی بی بی سی بیلن بولگن صحبتیده، قبرستانده ییرلشتریلگن ماین پارتلشی عاقبتیده یتتی عیال و یتتی باله هلاک بولگنینی تصدیق له دی.

همده اونگه کوره مذکور حادثه ده اوچ عیال وبیر باله هم یره لنگن، قربانلر سابق جهادی قوماندانلردن بیری قوماندان غالب نینگ یقینلری بولگنی ایتیله دی.

قوماندان غالب ، طالبلر بیلن همکارلیکده عیبله نیب،بیش ییل گوانتانامو قماقخانه سیده قماقده ایکن.

حاضر دولت طرفدارلریدن بولگن قوماندان غالب طالبلر بیلن قندی دشمنلیگی بولمه گنینی ایتیب، مذکور هجومدن مقصد عایله سی بولگنینی تاکیدله گن.

اونینگ ایتیشیچه، بیرینچی عمر یولداشی نینگ قرق کونلیک وفاتی مناسبتی بیلن قبرستانگه بارگن چاغی شوندی حادثه بیلن دوچ کیلگن.

اونگه کوره، هلاک بولگنلر نینگ برچه سی یقینلری بولیب ایکینچی عمر یولداشی هم قربانلر آرسیده بولگن.