اولوسي جرگه بير اعضاسي سوء قصد دن امان قالدي

بلخ ولايتي اهالي سي نينگ اولوسي جرگه ده گي نماينده سي احمد شاه رمضان جانيگه اويوشتيريلگن سوء قص دن امان قالدي، اما اونينگ اوچ قوريقچيسي اوليب باشقه تورت ته سي يره لندي.

احمدشاه رمضان نينگ بي بي سي گه ايتيشيچه:" بيز كيچه ساعت ايكي ده بلخ دن كابلگه تمان يول آلديك، پلخمري و دوسي منطقه سيده كيينگي موتريميز ماينگه دوچ كيلدي".

يولگه چيككه سيگه اورنه تيلگن ماين گه دوچ كيلگن اولوسي جرگه بو اعضاسي گه ضرر ييتمه گن، پارتلش دن كيين مزارشريفگه قيتيب كيلگن.

رمضان جنابلري گه كوره، واقعه ده يره لنگن لردن ايكي ته سي نينگ احوالي آغير بولگن اولرني ايسه دوالش اوچون كابلگه يوبارگن.

رمضان جنابلريگه بلخ دن كابلگه تمان يول آلسمدن آلدين خوفسيزليك كوچلريني سفرينگيز باره سيده خبر قيلمه گندينگيزمي؟ ديگن سوال گه:" خوفسيزليك كوچلريگه بيرگنده ايديك، تيريك قالمس ايديك، خوفسيزليك كوچلريگه بير فايز هم ايشانچ يوق"ديدي.

او، بلخ و كابل قتناو يوليده روي بيرگن بو حادثه ايلك بار ايمس، بلكه يوزلب شوكبي حادثه لر عملگه آشيريلگن و هيچ كيم اوني تيكشيرمه گن دييدي.

رمضان جنابلري بو حادثه ني وطن دشمنلري يعني طالبان والقاعده گروهيگه نسبت بيريب، اولر مملكت ني تينچسيز قيليش اوچون شونده ي عمللرگه قول اوره دي دييدي.

حاضر گچه هيچ بير گروه يا شخص بو حادثه مسووليتي ني اوز بوينيگه آلمه گن.

احمدشاه رمضان آلدينگي دور پارلمانده، سنامجليسي نينگ انتصابي اعضاسي ايدي.

بوندن آلدين اونينگ اكه سي اشرف رمضان بلخ ده گي نامزد لر ارا اينگ يوقاري آوازني قولگه كيريتگن نامزدلردن ايدي، او سيلاولر جرياني يكونلگني دن سونگ مزارشريف ده اولديريلدي.