اولوسي جرگه اعضاسيني گيراوگه آلگنلر، تورت طالب آزاد ايتيليشيني سوره گنلر

غزني ولايتي رسميلري، قندهار ولايتي اهاليسي نينگ اولوسي جرگه ده گي نماينده سي فريبا كاكرني اوغيري گروه لر اسارتيدن آزاد قيليش اوچون سعي و حركتلر دوام ياتگني دن خبر يبرگنلر.

قندهار نماينده سي فريبا كاكلر قوراللي طالبان تمانيدن اوغيرلنيب، حاضر هم اولرنينگ قوليده اوشلب توريلگن.

اسمي فاش ايتيليشيني ايسته مه گن غزني ولايت رسملريدن بيري نينگ بي بي سي گه ايتيشيچه، خانم كاكر، ايكي كون آلدين كابل – قندهار قتناو يولي آقيميده جايلشگن غزني شهري نينگ اسفند ده منتطقه سيگه تيگيشيلي يولده طالبان گروهي تمانيدن اوغيرلنگن.

اوغيريلر خانم كاكرني قه ييرگه آليب كيتگني باره سيده بيرار معلومات قولده ايمس.

دولت بو رسمي سي گه كوره، خانم كاكر ني قوراللي طالبان قوليدن آزاد ايتيش اوچون محل قوم آقساقاللري تمانيدن واسط چيليك ايشلري باشلنگن.

اونينگ ايتيشيچه، بو سعي و حركت لرده نتيجه سيده كاكر خانم نينگ ايكي قيزي بير اوغلي و هيداوچيسي آزاد قيلينگن.

غزني محل مسووللري، كاكرخانم ني آزاد ايتيش ده قوراللي طالبان پول طلب قيلگنيني ايتيشماقده لر، اما قوم آقساقاللري بو ادعاني رد ايتيب، طالبان اوني آزاد ايتيش اورنيده تورت محبوس طالب قوييب يوباريليشيني طلب قيلگنلر.

افغانستان دولت رسميلري طالبان خانم كاكرني اوز مصلحت و صلاحيتلري اساسيده آزاد قيليش گه قادر ايمس ليگي ني ايتيب، اولر كويته ده گي مركزي رهبريتي بو حقده دستور بيرمه گونچه، اوني قوييب يوباره آلمسليگي ني تاكيدله گنلر.

عين حالده، طالبان گروهي اوغيرچيليك مسووليتي ني رسمي روشده اوز بوينيگه آلمه گن.

رسميلرگه كوره، خانم كاكر نينگ اوغيرلنگني دن بير نيچه كون اوتيب بارگني گه قره مه ي، دولت بو توغريده اوز سعي و حركتي ني باشله گن.