تآريخي فوتبال اوچره شووي: بو نهايت افغانستان پاكستانگه قرشي

20 آگيست كوني ايكي رقيب قريب 40 ييل ديگنده ايلك بار بير ـ بيريلريگه قرشي ميدانگه توشيشه دي.

ايكاولري هم پايتخت كابلده گي اوچره شوو بيلن 2014 ييلگي آسيا كنفدراسيوني چقيرووي اساسيده حاضرليك كوريشماقچي.

تآريخي خلق ارا اورتاقليك اوچره شووي ايرته گه محلي وقت بيلن توشدن كيينگي ساعت 3 ده افغانستان نينگ طالبان دوريده تيلگه توشگن" غازي" استديويده بوليب اوته دي.

قوشني پاكستان تماني هله قچان بونده ي امكانيتدن ممنون ايكنليگي ني اظهار ايتماقده.

اولرگه كوره، بيرته فوتبال اوچره شووي نينگ اوزي هم اوز ارا علاقه لري نينگ ينه ده مستحكملنيشيگه يول آچيشي ممكن.

"اوز ملي تيرمه جماعه ني قوشني افغانستان گه يوباريشدن جوده هيجانده ميز، 20 آگيست ده گي اويين تآريخي حادثه بوله دي. چونكه بيز 1977 ييلدن بويان بير بيريميزگه قرشي توپ سورمه گنميز"، ديب ايتگن پاكستان فوتبال فدراسيوني كاتبي احمد يارخان" اسوشيتدپرس اخبارات آژانسيگه.

كابل ايسه، بو كبي خلق ارا اورتاقليك اوچره شوولريگه سونگي بار ميلادي 2003 ييلده ميزبانليك قيلگن و اوشنده توركمنستان ني اوز ميدانيده قبول قيلگندي.

پاكستان و افغانستان اورته سيده گي فوتبال بيله شوولري شورالر اتفاقي نينگ 1979 ييلگي اشغالي آرتيدن برهم تاپگن.

2014 ييلگي آسيا كنفدراسيوني چقيروو كوبا نينگ ايكينچي باسقيچ سره لش بيله شوولري شو ييل سينتيبير آييده نيپالده باشلنه دي.

پاكستان " آ " گروهيده هندوستان، بنگله ديش و ميزبان نيپال بيلن بيله شه دي.

افغانستان ايسه، " ب " گروهيده مالديو، سريلنكا و بوتان گه قرشي توپ سوره دي.

عين اورينده سوني هم تاكيدلب اوتيش جايزكه، افغانستان 20011 ييلده هندوستان ده بوليب اوتگن جنوبي آسيا فوتبال فدراسيوني آلتين كوباگي تورتينچي فاينل حسابلنه دي.

افغانستان نينگ جاري پتيده فيفا اعضاليگي ني ايگللب بوتوند موقع هم قوشني سي پاكستانيكي دن انچه يوقاري.

افغانستان خلق ارا فوتبال تشكيلاتي نينگ بو آيگي رويخطي ده 139 ـ اوزين ني ايگللب تورگن بولسه، پاكستان نينگ اورني اوندن 28 پغانه پست.

بوندن تشقري، افغانستان گروهي دن 2014 ييلگي آسيا كنفدراسيوني چقيروو كوباگي ايكينچي باسقيچ بيله شوولريگه بيرار بير مغلوبيت سيز چيققن نيپالده گي تورنير غالبلري ايسه، 2015 ييلگي آسيا كوباگيگه يوللنمه آليش يكوني فاينل باسقيچيده لاهوس، فلسطين، قيزغيزستان، برما و توركمنستان بيلن بيرگه بيله شيشه دي.

2015 ييلگي آسيا كوباگي آستراليا ده بوليب اوته دي.

Бу мавзуда батафсилроқ