قیزلر مکتب لریده باله لر باغچه سی بولمه گنی اوقیتوچیلراوچون کتته معما یره تگن

تخارولايتي ده گي قيز مكتب لريده باله لر باغچه سي بولمگني اوقيتوچي لر گه كاته معما يره تگن ليگي ايتيله دي.

اوقيتوچي لرگه كوره باله لر باغچه سي بولمگني حتي اولرنينگ درس بيريش سيستميگه هم اوزگريش لراليب كيلگن كه بو ايسه كوپلب اوقيتوچي لرني معين زمانده درسليك صنف لرده حاضر بولالمسليگي گه سبب بولگن.

تالقان شهريده جايلشگن نمبر اول دیب اتلگن قيزلر ليسه سيده گي اوقيتوچي لريدن بيري فوزيه عزيزي نينگ ايتيشچه مكتب لرده باله لر باغچه سي بولمگني سبب حتي بيرقنچه اوقيتوچي لر اوز وظيفه لرني ترك ايتيشيگه مجبور بولگن لر:"حقيقتدن برچه معلم لر بو معماگه دوچ كيليشگن لر، كوپي معلم لر باله لرنينگ تربيه لشيگه ايتالمسليگي اوچون حتي اوز وظيفه لرني ترك ايتيشگه مجبور بولدي لر ، چونكه اولرنينگ اوي لريده باشقه بيرار كيشي باله لريني سقلش و تربيه لشيگه يوق ايدي ، باشقه باربولگن معلم لر هم كه كيچيك باله لرگه ايگه اولرهم كته قيين چيليك لرگه قالگن لر ديدي اوقيتوچي لردن بيري فوزيه عزيزي ."

معلومات لرگه كوره بعضي اوقيتوچي لر باله لريني يخشي تربيه لشي همده سقلشي اوچون بعضي بير مكتب لرده شخصي شكلده باله لريگه باغچه ايجاد ايتگن لر ، بيراق معلم لردن بيري فريبا محمدي گه كوره حاضركي شرايطده كوپلب معلم لرنينگ امكانيت لري آز لیگی اوچون اولر شخصي باغچه لرده پول تولشگه قادر ايمس لر:"" بعضي مكتب لرده باله لر باغچه سي ايجاد ايتيلگن ، اما بو باغچه لرده اوقيتوچي لر آي ليك لريدن پول توليديلر ، بير معلم اينگ از 6 يا 7 مينگ افغاني آي ليك اله دي ،‌اوني اوييده كيره ك بولگن نرسه لرگه صرف له سینمی یا‌ باله سي اوچون باغچه ده بيرسين ، نيگه دولت بو باره ده اعتبار بيرميدي " عين دمده تخارولايتي نينگ معارف اداره سي مسؤوللري قيزلر مكتب لريده باله لر باغچه سي بولمگني سبب معلم لر تورلي خيل معمالربيلن دوچ کیله یاتگنینی تصديق ليديلر، بيراق اولرگه كوره، معارف وزيرليگي تمانيدن يكه معلم تربيه لش مركزلرده باله لرباغچه سي ايجاد ايتيلگن.

معارف اداره سي سوزچي سي گل آغا ده نظري گه كوره مكتب لرده باغچه لرنينگ ايجاد ايتيشي اوچون علیحیده بودیجه اجره تیلمه گن:" تأسف بيلن معارف اداره سي تشكيلاتي ده باله لرباغچه سي نينگ بارليگي ياده مكتب لرده باله لرگه باغچه ايجاد ايتيش اوچون قندي دير برنامه موجود ايمس ،‌ فكر قيلسم كه حاضرگه چه بو خصوصده بيرار بير اداره ياده عيال اوقيتوچي لر تمانيدن قندي دير رسمي طلب بولمگن كه مكتب لرده باله لر باغچه سي ايجاد ايتيلسين ديدي تخارولايتي نينگ معارف سوزچي نظري جنابلري."

رسمي معلومات لرگه كوره شمالي شرقي تخارولايتي نينگ تورلي حدود لريده خاتين قيز لر اوچون قريب 110 مكتب موجود كه اشبو مكتب لرده قريب 3000 عيال اوقيتوچي صفتیده درس بیریب کیلماقده لر.