قندهار ده 16 کیشی نی اولدیرگن امريكاليك عسكر، ابدي حبسگه حكم قيليندي

حكم اعلان ايتيليشي چاغيده 39 ياشر رابرت بيلز اوزيدن عكس العمل كورستمه دي.اوتگن ييلي قندهار ده 16 نفر تينچ اهاليني اولديرگن امريكاليك بير عسكر، حربي محكمه ده عمرباد قماق جزاسيگه حكم قيليندي.

محكمه جريانيده دوسيه ني تيكشيرووچي قاضي جي مورس:"سرجوخه بيلز، اخلاق سيز بيركيشي دير، اوزيدن باشقه هيچ بير شخص و هيچ نرسه اونينگ گناه كارليگيني بيله آلمه يدي" ديدي.

اونگه كوره، مذكورحادثه ده 48 باله هجوم گه آلينگن، يره لنگن و اولگن ويا هم اوز يقينلري نينگ قتل صحنه سيني تماشه قيلگنلر.

قندهار ده امريكاليك بير عسكر تمانيدن صادر ايتيلگن قتل عام، ويتنام جنگي دن سونگ، اينگ دهشتلي واقعه توصيف لنگن.

او يريم تونده ايكي قيشلاققه كيريب باريب، تينچ اهاليگه قره ته اوق اوزگن.

حادثه ده اكثرآ باله لر وعياللر قربان بوليشگنلر.

بو حكم اونگه قوييلگن اينگ آغير جزا سنه له دي، او بوندن ايكي آي آلدين اوليم جزاسي دن قاچيش اوچون اوز گناهيگه اعتراف قيلگن ايدي.

بو عسكرنينگ گناهيگه قره گنده، عفو سوره شگه حقلي ايمس، اما 20 ييل دن سونگ، آزادليككه چيقيش اوچون عفو سوره ش امكاني بيريليشي ممكن.

رابرت بيلزنينگ محكمه جرياني بيش كون دوام ايتدي.

قربان لربيرقطار يقينلري و عايله اعضالري محكمه حكمي ني عدالتلي بيلمه ي، اونگه اوليم جزاسي قوييليشيني سوره شماقده لر.

محلي خبر آژانسي نينگ بيرگن معلوماتيگه كوره، گواه لردن بيري" محكمه جرياني دن سونگ:" بيز بو قاتل نينگ اعدام ايتيليشيني خواهلرديك، افغانستاندن كيليب عدالتلي حكم چيقه ريش ني خواهلرديك، اما بو حكم عدالتلي ايمس"ديدي.

امريكا اردوسي 9 نفر افغانستانليك ني واشينگتن گه محكمه ده گواه ليك بيريش اوچون آليب كيلگن.

گواه لردن بيري حاجي محمد وزيردير، اونينگ 11 ته يقينلريدن جمله دن آنه سي، خاتيني و آلتي فرزندي مذكور حاده سيده هلاك بولگن.

اونينگ ايتيشيچه، اونينگ حياتي اوشه كيچه برباد قيليندي.