حامدكرزي: هندوستان وافغانستان قوشمه تهديد و منفعتگه ايگه

افغانستان جمهور رييسي حامدكرزي اوزي نينگ پاكستان گه قيله ديگن سفري عرفه سيده، هندوستان تشقي ايشلروزيرليگي معاوني سوجيتا سينگ بيلن اوچره شگن.

افغانستان اوز مملكتي اوچون مخصوص اهميتگه ايگه، دييدي كابل گه سفر قيلگن هندوستان تشقي ايشلروزيرليگي معاوني

بو اوچره شووده، ايكله تمان اوز مملكتلري علاقه لري باره سيده مذاكره قيليب، اقتصادي و سياسي وعده لريگه قايم ايكنليكلري باره سيده تاكيدله گنلر.

جمهور رييسليك اداره سي تمانيدن نشر ايتيلگن بير خبرنامه ده، جمهور رييس كرزي افغانستان و هندوستان قوشمه تهديد و قوشمه منفعتگه ايگه ايكني ني ايتگن. خبرنامه ده تهديد و منفعتلر دن آت توتيلمه گن.

كرزي جنابلري شونينگ ديك، ينگي دهلي و كابل علاقه لريني اورتاغليك توصيفلب، هندوستاندن افغانستان اهاليسي اوچون كورستگن ياردملري باره سيده اينيقسه، افغان ياشلري اوچون بيرگن تحصيلي بورسيه لري وباشقه ياردملري اوچون منتدارچيليك بيلديرگن.

افغانستان جمهور رييسي حامدكرزي ايرته پاكستانگه سفر قيله ياتگن بير چاغده، ايكي مملكت يوقاري مرتبه لي رسمي سي ملاقات اوتكزماقده لر.

كرزي جنابلري پاكستانگه قيله ديگن سفري ني مهم توصيفلب، بو سفري افغانستان ده صلح تامينلنيشي اوچون يخشي نتيجه بيريشي گه اميد قيلگن.

هندوستان منطقه ده پاكستان اوچون اينگ اساسي رقيب حسابلنه دي، و افغانستان اوتگن ييللرده ايكله مملكت اورته سيده عدالت ني تامينلشگه حركت قيلگن.

هندوستان تشقي ايشلروزيرليگي معاوني سوجيتا سينگ، حامدكرزي دن بولك، جمله دن تشقي ايشلر وزيري بيلن هم ديدارلشگن.

خانم سينگ مذكور اوچره شووده ايكينچي معاون كريم خليلي نينگ هندوستان گه قيلگن سونگي سفريگه اشاره قيليب، اوز مملكتي افغانستان گه اوزاق مدتلي همكارليككه دوام ايتديريشيني تاكيدله گن.

خليلي جنابلري اوتگن سه شنبه كوني اقتصادي و حربي هيات تركيبيده هندوستانگه سفر قيليب، او مملكت نينگ يوقاري مرتبه لي رسميلري بيلن ايكله مملكت ارا امضالنگن خوفسيزليك كيليشوونامه باره سيده مذاكره قيليب، اوچره شدي.

هندوستان و افغانستان ميلادي 2011 ييلده استراتيژيك همكارليك حجتي ني امضاله دي.