"ایتالیا نینگ افغانستانده گی حربی ماموریتی 2014 ییلدن سونگ هم دوام ایته دی"

ایتالیا باش وزیری انریکولتا کابل گه قيلگن سفری چاغيده، میلادی 2014 ییلدن سونگ، خلق ارا کوچلر افغانستان نی ترک ایتگن حالده هم، ایتالیا کوچلری اوزي نينگ افغانستانده گی مآموریتیگه دوام ایتديریشی ممکنلیگی نی تاکیدله دی.

لتا جنابلری، جمهوررییس کرزی بیلن اوتکزگن مطبوعات انجمنیده، میلادی 2014 – ییلدن سونگ قنچه ایتالیالیک حربی افغانستانده قالیشی باره سیده معلومات بیرمه دی، اما او، قاله دیگن کوچلر مشق و تیارگرلیکدن اوتکزیش دستورلریگه اعتبار قره تیشی ممکنلیگینی تیلگه آلدي.

عین حالده، ايتاليا باش وزيري اوز مملكتي افغانستان دولتی گه اوزاق مدتگچه همکارلیک كورستيش وعده سینی بیردی:" شبهه سيز، بيز بيرگن وعده لريميزگه بنآ، ياردملريميزني ايكي تمانلمه همكارليكلر اساسيده دوام ايتديره ميز. بوندن تشقري هر تمانلمه ياردم كورستيشگه تيارميز. چونكه بيز قوشمه همكارليك اعضاسي حسابلنه ميز".

ناتو كوچلري هر تمانلمه همكارليك تشكيلاتلريدن بيري سنه له دي. اتياليا باش وزيريگه كوره، او مملكت شو بيتيم آرقه لي افغانستان ني ياردم قيله دي.

شونگه قوشيمچه، ايتاليا نينگ افغانستانده گي كوچلري ميلادي 2014 ييلدن كيين هم، افغان كوچلري ني تيارگرليك دن اوتكزيش دستورلريگه قره ته دي.

ايتاليا باش وزيري، افغانستانده قنچه حربيلري قاليشي باره سيده انيق رقم ني اعلان قيلمه دي، بيراق بوندن آلدين او مملكت مدافعه وزيري اوزي نينگ افغانستانگه قيلگن سفري چاغيده، 2014 ييلدن كيين 500 ــ 700 گه قدر حربي قاليشي ممكنليگي ني معلوم قيلگن ايدي.

شونينگ ديك، ايتاليا باش وزيري ميلادي 2014 ييلدن سونگ، افغانستان ني حربي و خوفسيزليك بوليملريده ايمس، بلكه اقتصاد، تعلیم و قیشلاق لرنی رواجلنتیریش بولیم لریده هم ایتالیا دولتی یاردم بيريش وعده سيني بيره دي، ديدي:"مین جمهوررییس کرزیگه افغانستان نینگ یالغیز قویمسلیک ایشانچینی بیردیم" دیب ایتدی ایتالیا باش وزیری لتا جنابلری.

افغانستان جمهورريیسی حامدکرزی قوشمه مطبوعات انجمنیده شونده ی دیدی:" ایشانچ بیلن سیزگه ایته آله من، میلادی 2014 – ییلدن سونگ، افغانستان ایتالیا حضورینی خوش قرشی له یدی".

افغانستان جمهوررییسی ایتالیا حربیلری نینگ افغانستانده گی 12 ییلیک مآموریتی، امنیت و اقتصاد بولیملریده قیلگن همکارلیکلرینی آلقیشله دی.

اوتگن کون افغانستان جمهورریسی حامدکرزی ناتو گه اعضا مملکت لردن افغانستانده گی حربی ماموریتیگه دوام ایتيریشینی طلب قیلگن ایدی.