حامدكرزي نينگ پاكستان گه قيلگن سفري ينه بيركونگه اوزيتيريلدي

حامدكرزي و نوازشريف بوگون بير مطبوعات ييغينيده سوزگه چيققلر

افغانستان رسميلري، جمهور رئيس كرزي اوزي نينگ پاكستان قيلگن سفريني پاكستان رسميلري نينگ تكليفي اساسيده بير كون اوزيتيرگني ني معلوم قيلگنلر.

افغانستان جمهور رييسليك سوزچيسي ايمل فيضي، ايلكه مملكت رهبرلري نينگ مطبوعات ييغينيدن سونگ، بي بي سيگه ايتيشيچه، سفرنينگ اوزيتيريلگني دن اساسي مقصد، ايكله مملكت اورته سيده مذاكره لر دوام ايتديريليشي و ايجابي نتيجه گه ايريشيش دن عبارت.

فيضي جنابلري:"مذاكره لر دوام ايتماقده ايكله تمان بير دستور العمل اوستيده كيليشيب آليشلري كوتيله دي. شو پلان اساسيده ايكله مملكت تينچ ليك تامينلنيشي اوچون طالبان رهبرلريني مذاكره لرگه تيارلش امكاني ني مهيا قيليشگه حركت قيليشه دي".

بوندن آلدين جمهور رييس كرزي پاكستان دن افغانستان دولتي و قوراللي طالبان ارا مذاكره لر باشله نيشي اوچون، واسطه چيليك قيليشي ني سوره گن ايدي.

پاكستان باش وزيري نواز شريف بيلن بير قوشمه مطبوعات ييغينيده قتنشگن جناب كرزي، افغانستان و پاكستان نينگ قوشمه همكارليك سيزليگي ده هيچ بير مملكت ده تينچليك تامينلنمسليگي ني تاكيدله دي. او پاكستان باش وزيريدن افغانستان ني تيروزيم گه قرشي كوره شده ياردم كورستيشيني طلب قيلدي.

پاكستان باش وزيري نواز شريف هم مطبوعات چيقيشيده، پاكستان افغانستان ده گي تينچليك جرياني ني چين دلدن حمايه ايتيشي ني تاكيدله دي.

اونگه كوره، افغانستانده صلح تامينلنيش جرياني هر تمانلمه بوليب، افغان لر تمانيدن رهبرليك قيلينيشي كيره ك. او افغانستان جمهور رييسي حامدكرزيگه اوز مملكتي افغانستانده تينچليك تامينلنيشي اوچون سعي و حركت آليب باريشيني وعده قيلگن.

پاكستان بوندن آلدين، حامدكرزي پاكستانگه بير كونليك سفر قيليشي ني معلوم قيلگن ايدي.

افغانستان دولتي طالبان نينگ اساسي مركزلري پاكستانده بولگني، افغانستان ده گي زوره وانليكلر ميزاني آشيشي گه سبب بولگني ني تاكيدلب كيلگن.

پاكستان استخبارات تشكيلاتي نينگ ايريم بوليملري كوپ وقتلردن بيري طالبان ني حمايه قيله ياتليك و اولرگه باش پنه بيرگنليكده عيبلنيب كيلگن، اما اسلام آباد بو عيبلاولرني رد ايتماقده.

حامدكرزي نينگ بو سفري، نواز شريف بوندن ايكي آي آلدين پاكستان باش وزيري صفتيده سيلنگني دن سونگ، ايلك سفر حسابلنه دي.

كرزي جنابلري شونينگ ديك، پاكستان قماقخانه لريده گي طالبان يوقاري مرتبه لي رسميلريني آزاد ايتيشي ني سوره گن. بي بي سي دركچيسي گه كوره، بو تكليفلر طالبان بيلن مذاكره لر باشلنگن دن سونگ، عملگه آشيريليشي ممكن.

عين حالده، اوشبو سفر ده افغانستان و پاكستان ماليه وزيرلري ايكله مملكت اورته سيده گي اقتصادي و سودا علاقه لري مستحكملنيشي اوچون، بير كيليشوونامه گه هم قول قويگنلر.