قندهارولایتی ده انتحاری هجوم یوزبیردی

قندهار رسمیلری گه کوره قندهار شهریده جایلشگن کابل بانک بناسی مقابلیده انتحارچی بیرشخص اوزینی پارتله تگن، نتیجه ده بیش کیشی اولیب و 22 کیشی یره لنگن، قندهار ولایتی حاکمی نینگ سوزچیسی قربان لرنینگ اکثریسی تینچ فقرا بولگنینی ایتگن.

قندهار ولایتی نینگ ولایت حاکمی سوزچیسی جاوید فیصل بی بی سی بیلن بولگن صحبتیده مذکور انتحاری هجومده بیش کیشی اولب 22 کیشی یره لنگنینی تصدیق له دی.همده او، یره لنگن لردن بیرنیچیته سی نینگ وضعیتی آغیر بولگنینی معلوم قیلدی.

عین حالده فیصل جنابلری، هلاک و یره لنگن لرنینگ اکثریسی تینچ فقرا بولگنینی تیلگه آلدی:" محلی وقت بیلن ساعت اون بیر اطرافیده، انتحاری هجوم یوزبیردی، قربان لرنینگ اکثریسی تینچ فقرا بولگن اولر پول آلیش اوچون بانککه کیلگن ایکن. حادثه نی تیکشیریش اوچون پلیس اداره سیدن بیرهیات منطقه گه ییتیب کیلگن".

سونگی کونلرده افغانستان نینگ تورلی حدودلریده عصیانچیلیک فعالیت لری آرتیب بارماقده، اوتگن کون مملکت شمال شرقی ده جایلشگن قندوز ولایتی نینگ دشت ارچی تومنیده انتحاری هجوم روی بیردی. اوشبو هجوم نتیجه سیده دشت ارچی تومن حاکمی صدرالدین سعدی داخل توقیز کیشی هلاک و 11 کیشی هم یره لنگنی خبرقیلینگن ایدی.