هراتده ايران قونسولخانه سيگه قرشی اويوشتيريلگن نمايشده بير كيشي قربان بولدي

افغانستان غربيده جايلشگن هرات ولايتيده ايران قونسولخانه سي گه قرشي اويوشتيريلگن نمايشده بير كيشي حياتي ني يوقاتيب، باشقه تورت نفر يره لنگن. پوليس، اعتراضچيلر ايران قونسولخانه سي گه هجوم اويوشتيرماقچي ايكني ني ايتگن.

نمايش ايرته لب ساعت 8 ده باشله نيب، زوره وانليككه دوچ كيلدي. اعتراض جريانيده اوق آوازي هم ايشيتيلگن.

بو نمايش، ايران نينگ هرات ده گي قونسولخانه مسووللري نينگ هرات اهالي سي دن ويزه بيريش چاغيده كفالت اساسيده آلگن مبلغ لري قيته ريب بيريلمه ياتگني گه قرشي، پلانلشتيريلگن.

اعتراضچيلرگه كوره، ايران نينگ هراتده گي قونسولخانه سي، ايران گه سفر قيله ديگن هر بير كيشي دن كفالت اساسيده 300 يورو آلگن، اما اونينگ قيته توله شيني انكار قيليشگن.

هرات مركزي كسلخانه مسووللري، مذكور حادثه ده بير تينچ اهالي اوليب، تورت نفر يره لنگني ني تصديقله گنلر.

اولر شونينگ ديك، مذكور شخص اوق بيلن آتيب اولديريلگنینی تاکیدله گن.

هرات پوليسي، خوفسيزليك كوچلري نمايشچيلرگه ايران قونسولخانه سيگه كيريشگه رخصت بيرمه گن دن سونگ، زوره وانليك يوز بيرگني ني ايتگن.

هرات پوليس اداره سي مسووللريدن بيري عبدالحميد حميد، نمايشچيلر ايچيده بوزمه كار شخصلر بارليگي سبب، پوليس ويرانگرليك واوغرچيليك ني آلديني آليش مقصديده، اره لشيشگه مجبور بولگني ني تاكيدله گن.

حميد جنابلري، پوليس اعتراضچيلرني تيتيب يوباريش اوچون، هوا گه اوق اوزگنيني تصديقله گن.

پوليس، بيرتعداد اعتراضچي، اولرگه قرشي تاش و چوپ آتيشگني ني ايتگن.

مذكور نمايشده شونينگ ديك، ايران قونسولخانه سي يقينيده گي بير نيچه دكان و ماركيتلر گه خساره ييتگني ايتيله دي.