افغانستان٢هندوستان ٠: مسابقه افغانستان شمالیده جانلی کورسه تیلماقده

مسابقه نپال پایتختی کتماندو ده باشلندی و افغانستان ٢ینچی گلنی اوریشگه قادر بولگن.

شمالي مزارشريف شهريده افغانستان وهندوستان ارا فوتبال مسابقه سي جانلي شكلده شهرايچيده اورنه تيلگن كته تلويزيونلر آرقه لي نمايش ايتيلگن. اوشبو نمايشده يوزلب اهالي مسابقه ني يقيندن كوريب تماشه قيليشگن. تماشه چيلر، مسابقه نتيجه سيني تخمين قيليب، افغانستان غالب چيقيشي باره سيده اميد بيلديريشگن.

بو مسابقه نه فقط مزارشريف ده، بلكه كابل و هرات ده هم جانلي روشده نمايش ايتيله ياتگني ايتيلماقده. شونينگ ديك، فارياب، شبرغان و تخار ولايتلريده هم اهالي مسابقه ني صبرسيزليك بيلن اوز تلويزيونلري آرقه لي تماشه قيلشگه اينتيلماقده لر. اولر ايسه، افغانستان فوتبال تيمي هندوستان ني شكست گه دوچ قيليشي اوچون دعا قيليشگن.

شونينگ ديك، مزارشريف شهري ده گي برچه رستورانت و دم آليش جايلريده هم فوتبال مسابقه سي اهالي تمانيدن كوريب تماشه قيلينماقده.

مسابقه دن آلدين افغانستان ملي تيمي كاپيتاني اسلام الدين اميري بير مطبوعات ييغينده، افغانستان ملي فوتبال تيمي باشدن آخرگچه اويينلرده يخشي اوينه آلگن بولمه سه هم، زمان اوتيشي بيلن يخشي انتظام كورستيب، يريم نهايي مسابقه لرده يخشي اويين آليب بارگني ني تاكيدله دي.

او هندوستان فوتبال مسابقه سي اوته خطرلي بولگني گه قره مه ي، جدي و دقت بيلن اويين قيليشلريني ايتدي.

اونگه كوره، افغانستان تيمي قهرمانليك ني قولگه كيريتيشده سعي و حركت قيله دي.

افغانستان فوتبال تيمي فدراسيوني ياردمچي مربي سي علي جواد عطايي تيليدن يازيشيچه:" نهايي مسابقه شايسته و طرف سيز احكمگه ايگه بوليشي گه اميد قيله ميز" ديگن.

افغانستان فوتبال تيمي مربي سي يوسف كارگر هم ملي تيمي يانيده قاليب كيتيشي ني اعلان قيلگن.

او، هندوستان تيمي مدافعه خط لريده قيينچيليكلرگه رو په ره ايكني ني بيلديريب، افغان هجومچيلري بو خطلرني سينديريشگه موفق بوليشي ني تاكيدله دي.

افغانستان جمهور رييسي حامدكرزي هم حكومت مسووللريگه فوتبالچيلرني روحي حمايه لش اوچون نيپال گه سفرقيليشگه دستور صادر قيلگن.

حاضرگي افغانستان و هندوستان اورته سيده گي مسابقه نتيجه سي معلوم ايمس، اما افغانلر بو مسابقه ده غالب چيقيشيني اميد قيليشگن. ليكن هندوستان تيمي 2011 ييلده گي مسابقه ده افغانستان ني تورت ـ صفر مغلوب ايتگن ايدي.