"طالبان اهالی اویلرینی قیصارده یاقیب یوبارگن"

Image caption قیصار تومنی سونگی وقتلرده ناقرارلیکلرگه گواه بولیب کیلماقده.

فاریاب ولایتی قیصار تومنی نینگ "باشیلمس" قیشلاق اهالیسی نینگ ایتیشیچه طالبان عصیانکارلری یوزگه یقین اوینی یاقیب یوبارگن.

محلی اهالی حادثه ده ایککی باله داخل بیرنیچه کیشی هم هلاک بولگنینی ادعا قیلگن. قیصار تومن حاکمی عبدالجلیل صدیقی، اون گه یقین اویگه طالبان اوت قویگنینی تصدیق له گن .

منطقه یشاوچیلریگه کوره بوندن اوچ کون مقدم، طالبان عصیانچیلری "باشیلمس" محلله سیگه هجوم اویوشتیریب، نیچه ساعت آتیشمه دن سونگ منطقه نی تصرف ایتگنلر.

منطقه یشاوچیلریدن بیری معاذالله بی بی سی بیلن بولگن صحبتیده یوزدن آرتیق اوی طالبان تمانیدن اوت قوییلگنینی ایته دی:" طالبان منطقه نی تصرف ایتگنیدن سونگ اویلرنی اوت بیردی نتیجه ده ایککی باله و تورت کیشی هلاک بولدی .شونینگدیک بیرقنچه چاروا مال هم تلف بولگن. بیزگه هیچ نرسه قالمه دی. "

معاذالله نینگ ایتیشیچه "باشیلمس" قیشلاغی و بو قیشلاق اطرافیده جایلشگن منطقه لردن قریب تورت یوز عایله اوز اوی جایلرینی ترک ایتیشگه مجبور بولگنلر..

قیصار تومن حاکمی عبدالجلیل صدیقی طالبان و محلی پلیس کوچلری اره سیده یوزبیرگن توقنه شووده، اوچ محلی پلیس هلاک وباشقه بیش پلیس هم یره لنگنینی ایته دی، عینی حالده صدیقی جنابلری باشیلمس منطقه سیده اوندن ارتیق اوی طالبان تمانیدن اوت قوییلگنینی تصدیق له دی. اما تینچ فقرا هلاکتی باره سیده هیچ نرسه ایتمه دی.

شونینگ دیک قیصار تومن حاکمی، بیرقنچه عایله اوروشلر باعث منطقه نی ترک ایتگنینی ایتدی. اونگه کوره، اوزمنطقه سیدن چیققن اهالیگه حاضرگه قدرهم قانیقرلی یاردم بولمه گن.

بوندن الدین هم قیصار تومنیده طالبان و افغان امنیتی کوچلری آره سیده قتیق توقنه شوولر یوزبیرگن ایدی.

طالبان عصیانچیلری حاضرگه قدرهم بوخصوصده هیچ قندی فکر بیلدیرمه گن.